Ольга Тронина: шудтэм луэме уг поты

Удмурт Дунне
By Удмурт Дунне 30 мая, 2012 09:43

Аспӧртэм но быгатӥсь нылмурт Ольга Тронина, Удмурт кун университетысь удмурт кылосбур факультетын 5-тӥ курсын дышетскись, луэ егитъёслэн «Шунды» дэменлыксылэн тӧроез. Мыло-кыдо пыриське пӧртэм ужрадъёсы, конференциосы, корреспондент луыса «Ӟечбур!» газетын ужа, со дыре ик школаын удмурт кыллы дышетэ. «Кытын мынам ошмесэ?» (2007) но «Йыромем йыртэмась» (2011) кылбур бичетъёслэн авторзы. Ачиз сярысь тазьы вера:

 

«Шунды»

— Егитъёслэн огазеяськонэнызы, Сэп школаын дышетскыкум, тодматски. Эгра ёросын «шундыосын» вырись Татьяна Петровна Селивёрстова ӧтиз Шаркан ёросысь «Эру» празднике. Соку командамы нырысетӥ интые потӥз. Со бордысен общественной улон бордаз кыскиз: «Шундыкар» бӧрсьы — «Вамыш» лагерь… Юлия Никитина вӧзын кивалтэтлэн ёзчиез луи, шӧртчи пыриськи дэменлыклэн улоназ. Юля дышетӥсе но нодъясе луиз, борысь ачим но — юрттӥсез, бур киыз.

Туэ 2-тӥ тулыспалэ «Шундылэн» председателез луи. Валай, макем та секыт ныпъет. Мыным туж юртто «Шундылэн» кивалтэтысьтыз егитъёс, тужгес но Дима Софронов но Оля Прокопьева (воштӥсе).

 

Удмурт факультет

Тани быре ини дышетсконэ. Специализацие — удмурт кыл но филология удысын выль ивор технологиос. Факультет быръеме сярысь воксё но уг жаляськы: со выль инвисъёс усьтӥз, но специализацие пыр-поч малпамын ӧвӧл на ай. Выпускникъёс мультимедиа проектъёс кылдытъяны кулэ вал, озьы ик азинтыны удмуртлыкез Интернетын — озьы ке но тыро-пыдо тодон-валанмы уг тырмы.

Мон дышетскон куспамы ваньзэ веръяны тырши, дырме пайдаё ортчытыны турттӥ. Туж юрттӥз мыным та ласянь наукая кивалтћсе Наталья Владимировна Кондратьева. Со паськытатӥз дышетскон бусымес но: пыриським конференциосы, Венгрие дышетскыны ветлӥ, троссэ выльзэ тодӥ удмурт кыл сярысь, удмурт суффиксъёс пӧлын гинэ ӧй пыкмы. Тырши лад-лад, мукетъёслэсь висъяськись студент луыны: ӟеч дышетски (дипломам одӥг гинэ «ньыле» вань), кылтодос ужен выри, шутэтскон ужрадъёсы пыриськи (таиз наркотик кадь — огпол пыриськид ке, дугдэмед уз луы ни). Факультетмы быгатонлыкъёсме усьтыны юрттӥз, асме шедьтӥ — мукет факультетын ышыны но быгатысал.

 

Диплом

«Общественно-политическая лексика удмуртского языка» нимо уж гожтӥсько. Та темаез Н. В. Кондратьева эшшо нырысетӥ курсын дэмлаз. Со мыным тунсыко гинэ уг поты, туннэ нуналлы но тупа — таӵе терминология удмурт кылын рос-прос эскеремын но, уже кутэмын но ӧвӧл.

Обществознаниысь но химиысь терминъёсты удмурт кылэ берыктонэ пыриськи. Кыллюкам тусын соос диплом ужам приложениен ватсамын (обществознаниысь 500 пала термин).

Жаляса верано, туннэ нуналлы выль кылъёс калыке укыр каллен вӧлмо. Ӵемысь кылӥськод, текстъёсты лыдӟо но уг валало шуыса. Та ужпумез кызьы ке сэрттыны-пертчыны кулэ. «Ӟечбур!» газетын валантэм кылъёсты скобкае пырто. Выль кылъёсты одно ик вераськонэ кутоно — иське соос озьы ик вормонтэм ныпъет кадь кыллёзы…

 

«Чипчирган» но «Неофолк»

УдГУ-э пыреме бере мон нырысь сураськи — маин меда выроно? Соку ваньзэ эскертыны малпай: пыри студсоветэ, студиосы ветлыны кутски.

«Чипчирган» котьку но мон понна выжыкыл выллем кылёз: котьку кырӟаны яратылӥ (укыр быгатӥсен асме ниманы уг быгатӥськы ке но), калык эктонъёс нош — со валантэм кужым, адямиез быдэсак усьтыны быгато. Репетициосын мур валай, макем чебер асьме фольклормы, сям-йылолъёсмес но ӟечгес тодӥ.

«Неофолк» этностудия — со факультетмылэн ымнырыз. Тросэз янгышен малпало, «неофолкъёс» выль дэремъёс вуро но сценатӥ гинэ ветло шуыса. Нырысь ик со чеберлыкез гажаны дышетскон. Кивалтӥсез Любовь Геннадьевна Розенфельд лачак нодъянъёс сётъя: макияж, причёска, мугоръя дӥсь быръён ласянь, фильмъёс но книгаос дэмла. «Неофолк» — со стильной удмуртлэн школаез. Тае Европа но дунъяз: кылем арын «Макс Мода» калыккуспо фестивальын тужгес но гламурной эстон журналлэсь гран-призэ басьтӥм, «Эмезе» коллекциез возьматыса.

 

Кылбурет

Нырысетӥ кылбурме 7-тӥ классын гожтӥ, валтӥсь темаосы соку тросэзлэн кутскись кылбурчиослэн кадь вал: коӵышъёс, сяськаос, бубылиос. Дунне шоры учконме «Ӟечбур!» газет, «Шундыкар» лагерь воштӥзы, соослы луыса журналистика но луиз гожъяськон улонэлэн люкетэз. Со тунсыкъяськон ик монэ гужем Университетлэн сменаяз вуттӥз (сое но факультетмы радъяз вал). Куинь пол отчы пыриськи, 2006-тӥ арын критика удысын нырысетӥ инты басьтӥ. Соин но мылкыды ӝутскиз удмурт факультетэ дышетскыны пырыны.

2007-тӥ арын «Ӟечбур!» газет нырысетӥ кылбур бичетме поттыны юрттӥз. Отчы мынам нырысетӥосыз, 11-тӥ классын дышетскисьлэн, кылбуръёсы пыризы: пинал муртлэн, наивноесь, ненегесь. Кылем арын кема витем кыкетӥ сборнике потӥз. Тазэ бичетме поттыны юрттӥз Финляндиысь студентъёслэн огазеяськонзы, проектэным соослы куриськон гожтӥ. Книга потэм бере матысь адямиосы туж паймизы, макем воштӥськиз улон шоры учконэ, творчествое. Тырши валэктыны: книгаын аслам гинэ опытэ ӧвӧл, матысь адямиосылэн но тодмоосылэн но улон гердъёссы бинисько. Кылбуръёсы «Финноугория» сайтын потэм бере коми поэт Нина Обрезкова мыным гожтӥз, соослэн таӵе шара гожъяськись кылбурчиоссы ӧвӧл шуыса.

Шуо, поэтъёс — шудтэм адямиос, нош мынам шудо луэме потэ. «Йыромем йыртэмась» книгае потэм бере одӥг кылбур но ӧй ни гожты, со берпуметӥ шокчем кадь луиз.

Поэзия сярысь вераськоно ке, мыным тужгес но кельше Азвесь даур, яратоноез кылбурчие — Сергей Есенин. «Москва кабацкая» сузьетсэ гажасько. Удмурт лирикаысь — Михаил Федотов но Алла Кузнецова. Соосты нош но нош лыдӟыны дась. Зэмзэ вераса, кылбур гожъясько ке но, тросгес проза лыдӟыны яратӥсько. Туж яратӥсько лыдӟиськыны! Быдэс нуналъёсын книгае согиськыса улыны дась.

 

Удмурт журналистика

Удмурт журнал-газет удыс, азьвыл аръёсын ӵошатоно ке, кыдёке азьлань вамыштӥз. Туннэ удмурт кыл вань СМИ-ос пӧлы портӥське, Интернет бусыын выль удмурт вотэсбамъёс, блогъёс кылдо. Нимысьтыз висъясал «Дарт» газетэз. Ыркыт тӧл пельтэм кадь луиз со.

Ачим но журналистика удысэн юн герӟаськемын — ньылетӥ арзэ ини «Ӟечбур!» газетын ужасько. Аудиторимы — бадӟым классъёсын дышетскись пиналъёс, толэзьлы одӥг пол егитъёслы выпуск потэ. «Ӟечбур!»-ез» но «Дартэз» ӵошатоно ке, нырысетӥез гуртысь пиналъёслыгес сӥземын. Ньыль ар ужай ини ке но, асме профиен ниманы уг на быгатӥськы, мон дышетскисько гинэ ай.

 

Егит фин-угоръёс

Берло дыре лэсьтӥсько проектъёс, кудъёсыз огазеяло пӧртэм егитъёсты, кылсярысь, «Егит фин-угор азьветлӥсьлэн школаез». Таӵе ужрадъёс трос пайдазэ ваё: ог-огдэ эскерон, ог-огедлэсь дышетскон, выль кусыпъёс, эшъяськон, малпанъёстэ улонэ пыӵатон.

Нырысьсэ кунгож сьӧры мон Янош Пустаи тодосчилэн курсъёсаз потай. Туж тунсыко дышетскон радъямын вал, венгер кылэн тодматским. Со дырысен дуннеез котыръясько, ИФУСКО конференцие Кудымкаре но Будапештэ вуылӥ.

Таяз арын тулыс «Шунды» огазеяськон Эстонилэн шоркараз Таллинын нылпиослы калыккуспо лагерязы пыриськиз. Можга ёросысь Бадӟым Кибъя гуртысь «Уӵыпи» ансамблен ветлӥмы. Отын пиналъёс эстон калык эктонъёсты дышетӥзы, кырӟазы, историез тодӥзы, ас ёзъёсынызы эшъяськыны вуттӥзы. Со бадӟым плюс — куке пиналъёс кунгож сьӧры потаны быгато, дуннеез адӟо.

Мыным 11-тӥ классозь Удмуртилэсь палэнэ потаны ӧз удалты. Куке мон нырысьсэ Москвае вуылӥ, пырай музейёсы, театре — туж пайми адӟемелы.

 

Удмурт кылъя дышетӥсь

Кылем арысен удмурт кыллы Ижкарысь 97 номеро школаын дышетӥсько. Нырысетӥ ужпум луиз методической юрттэт утчан. Городын удмурт кыллы дышетыны туж секыт, соин ик кыкетӥ ужпум — удмурт кылэз тунсыко карон. 5-тӥ-6-тӥ классын пиналлы валэктыны кулэ ӧвӧл на, малы кулэ удмурт кыл, нош 7-тӥ классын ӵем гинэ юаллясько… Куддыръя уг тодӥськы, мар вераны. Соку малпан кылдӥз, урокам егит удмурт азьветлӥсьёсты ӧтчаны — Анисимов Коляез, Воронцова Ксюшаез, Котков Лёшаез. Озьы ик вуылӥзы Польшаысь Петыр Палган но мукет кунгожсьӧр студентъёс. Таӵе муртъёсын тодматскон емышсэ кема ӧз витьыты: 7-тӥ классысь «характеро» нылашлэн удмурт кылэз дышетыны мылкыдыз пуромиз. Та мынам пичи вормонэ.

Маша Золотарёва.

Удмурт Дунне
By Удмурт Дунне 30 мая, 2012 09:43
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<