Нормальной нылъёс клубе уг ветло?

Удмурт Дунне
By Удмурт Дунне 30 мая, 2012 10:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Нормальной нылъёс клубе  уг ветло?

Дунне шоры чиньы пыртӥд эн учкы.

Дасо ар талэсь азьвыл гинэ ай гурт шоры учкылӥзы: тани кытын чылкыт адями кусыпъёс, ог-огзэс гажась нылъёс но пиос. Нош туннэ?

Вордскемея Алнаш палась мон. Но озьы пӧрмиз: ёросысь огзэ школаез йылпумъяме бере дас ар ӵоже отчы ӧй берталля. Алигес вуи но гуньдӥ: гуртын улон чылкак воштӥськем.

Отысь улон шоры учкыса, нырысь-валысь дыльдыдэ ик ньылод гочаменыд. Омыр чылкыт. Автобусъёс ветло ӵем. Кудаз ке пуксьыны ӧд шедьы ке, такси ныр улын ик.

Юртъёс но татын вӧл-вӧлэсь — дворецлы укшало. Кыӵе ке узыр муртъёс уло, кожалод. Калык, ог-огез сьӧры уйиськыса, лэся, озьы пуктӥське. Ву лыктэ. Мунчо но артэ. Эх, райын кадь!

Но таӵе мылкыдэз сура-пожа ӝыт. Егит ӵыжы-выжыелэсь дӥсяськемзэ адӟыса, ваземме ик ӧй вала: кут монэ сьӧрад, мынам но эктэме потэ.

 

* * *

Клубе пыри но тамак ӵынлэсь но аракы зынъёслэсь ӵогӟи. Дыр 11 часысь потэмын. Егитъёсты кызьы меда пыдъёссы возё на — олокызьы но позыръясько. Юонэн шузимытэм йырзы номыре уг вала ни. Оло, соин но куд-ог нылъёс чап-чарап кылиськыны кутскемын — вылысьтызы кофтаоссы кытын но отын пазямын. Тыбыръёс гольыкесь. Гадьёссэс гинэ на вато векчи майкаоссы. Юбкаоссы воксё но юдэс басма быдӟаесь гинэ — каллен кыскы но кесиськоз. Та дыдыос 8-тӥ-9-тӥ классын гинэ дышетско ай.

Ми но егит дыръямы святоесь ӧй вал. Тамак но, вина но веръяллямы. Вакчигес дӥсь но выламы золтыны вырылӥмы. Но ваньмыз со таӵе шара ӧй вал. Со сяна, дискотекае поталлязы бадӟым классын дышетскисьёс но школаысь потэмъёс гинэ. Туннэ клубын одӥг суред: мугорзэс возьматыны лыктэмъёс… Нокыӵе комендант час но таосты уг зуркатъя, лэся.

Сыӵе малпанъёсме «кылӥллям», шӧдске. Огез нылаш, бордам юромо зырӟиськыса, кошкиз но серектӥз:

— «Старой перхоть» вуэм.

Солэн синмыныз мон, оло, зэмен ик сыџе: кузь брюкиен, ворсам кофтаен. Мон кадь аресъемъёс татын воксё ӧвӧл. Пиослы но мон кадь мӧйыос кулэ ӧвӧл — потӥ но кошки. Пельын жон вазе — электрокрезьгур шуккем, шӧдске.

Со куспын Дима ну-кыртӥз: мон тыныд верай вал. Артэ ужа кафе. 1 час уйинозь отын пукыны луэ, џектћз со.

Ӵапак татчы дискотряскалэсь пегӟемъёс люкасько, лэся. Кин ке сур юэ, кин ке курытсэгес ӟамыртэ, кынтэм сие. Но мыным ӝӧк сьӧрын инты ӧз сюры ни. Вуз карисьёс буйгатыны выризы ик: таос одӥг час шулдыръяськозы на, собере машинаосазы пуксьыса, Можгала ширтозы. Таосты городысь дискотека бордаз кыске.

 

* * *

Сюлэм куриськиз до-ре. Егит дыръя ортчем ульчаостӥ огнам берто ай, малпай. Но пумитам лыктӥсь еж бандалэсь кышкай. Димаез келяны косӥ. Со ик шуиз: туала пиос шорад кема уз учке, тышкалозы но телефондэ, уксёдэ качалозы. Сыӵе учыръёс трос кылӥсько. Туала экеос участковой ки улэ сюремлэсь но уг кышкало. Ушъясько ай эшъёссылы участоке вуылэмзы, формаен адямилы мытылэмзы сярысь.

Мон будон вакытэ но артэ гуртысь пиос дискотека дыръя ог-огенызы жугиськылӥзы. Возьматэмзы потылӥз, лэся, кин татын кузё. Но урам кузя мынӥсь муртэ юнме ӧз исаллялэ. Шулдыръяськыны мукет амалъёс но утчаллямы: кудмы ке доры люкаськыса, гитараен шудэм улсын кырӟаллямы. Инкуазе шашлык я картошка пыжыны поталлямы. Но туннэ та ваньмыз «отстой» нимаське. Амалтэк валан кылдэ: курытсэ ӟамыртытэк, шулдыр пукыны уг луы ни.

Алнаш ёрос администрациысь быдэ вуымтэосын ужанъя ёзэн кивалтӥсь Людмила Лермонтова малпанме воштыны выре ик:

— Котькуд субботае 10 часысен 1 час уйинозь ортчиськомы районысь муниципал кылдытэтъёстӥ нимысьтыз рейдэн. Ёросын туннэ ужа 26 клуб. Ваньмаз сямен ик радъяське дискотека. Зэм, егитъёс туж ик отчы уг люкасько. Тросэз вуо черкогуртэ. Но туннэ пинал муртъёс чакласько. Кылсярысь, 16 арессэс тырмытэмъёс пӧлысь 2-сэ гинэ ай юэмен кырмимы. Клубын но кафеын курытэныз 10 час бере вуз карыны юн алэмын. Кинэ ке долӟемен кутӥзы ке, кивалтӥсь штраф тыроз 30 сюрс манетозь. Со сяна, пичиосты анай-атайёстэк пырыны сыӵе интые уг лэзё. Зэм, 9-тӥ классын дышетскисьёс но вуыло черкогуртысь дискотекае. Но сыӵеос азе курон пуктэмын: кин ке келясь медло.

* * *

Зэм, ваньзы дискотекае уг ветло. Но сыӵеос дорысьтызы но уггес потало. Ӝыт вуэ но, компьютер сьӧрысьтызы уг вырӟыло ни. Уйшор берозь но Интернет вотэсын «калго». Отын улон шулдыргес, лэся. Туала удмурт крезьгур дуннее кыстӥсько Алнашысь композитор Саша Малков но кырӟась Алина Антонова. Спортэн эшъяськисьёс но вань: Настя Куликова штангаез выдыса ӝутъянъя дуннеысь чемпион луиз. Но ваньзы таос озьы ик доразы пуко. Куддыр концертъёсы потало, спортзалэ воллейболэн но баскетболэн шудыны вуыло. Егитъёслы дырзэс ортчытыны гуртын мукет луонлык ӧвӧл.

Лыдъяд ке, доразы шыпыт пукисьёс, гольтрес улонэз веръямтэос но солэсь палэнскисьёс тросгес, дискотекае потасьёсыныз ӵошатыса. Но доразы пукисьёс шыпытэсь, кыл-куаразы ӧвӧл. Оло, соин но таӵе мылкыд кылдэ: воксё но ӧвӧл соос. Гуртын кузёясько, кожалод, гольтыръяськисьёс.

Удмуртиысь егитъёсын ужанъя министр Владимир Соловьёв ивортэмъя, 14-16 аресъемъёс гуртын 22 сюрс 981 кузя, 17-19 аресъемъёс — 29 сюрс 317. Ваньмыз таос пӧлысь 51 процентэз нырысьсэ матысь кусыпъёсын выро 17 арес дыръязы, 34 процентэз сьӧлыко кусыпъёсы зымо 14 аресысен, 3 процентэз — талэсь но вазь.

Ярам, та лыдпусъёс йырсазьзылэсь, асшӧдонзылэсь будэмзэс но возьматысал ке. 15 процентэзлэн гинэ егитъёслэн дунне шоры асьсэлэн учконзы вань, мукетъёсыз политикаен но уг тунсыкъясько, семья кылдытыны но уг вамышто. 28,4 процентэз гинэ загсэ дырто. Соку но 25-30 арес котыразы гинэ. 79,5 процентэз егитъёс нылпи вайыны уг дырто. Котькуд 6-тћез гинэ сыӵе бадӟым вамыш лэсьтыны дӥсьтэ ке но, 1 нылпиез будэтыны сяна соглаш уг кариськы.

Приуральеысь калыкъёслэн историзыя но культуразыя институтысь тодосчи, история наукаосъя доктор, социолог Владимир Воронцов пумитэ куаретэ ик:

— Кин тӥледлы шуиз: кӧня ке ар талэсь азьло нылъёсты ало вал сюан шудэмлэсь азьвыл ик валесэ выдонлэсь? Кема аръёс ӵоже удмуртъёслэн сям-йылолъёсазы пыӵамын вал таӵе валан: егит пиосты кышнояно трослы асьсэлэсь бадӟымгес нылъёсын. Усто луоз, кышномуртэд нылпиен луиз ке. Соин ик та ласянь уг луы вераны, гурт али деградировать каре шуыса. Обществоын улыса, солэсь палэнэ кыльыны нокызьы уг луы. Нош берло 20 ар ӵоже зэмен но обществоын бадӟымесь воштӥськонъёс кылдӥзы. Асьмеос куштӥськимы вуж дунъетъёсмылэсь. Соос пыӵамын вал социалистической но коммунистической шӧмын. Нош выльзэ соку ик уд кылдыты. Ӵапак со кылдэм «вакууме» пырыны кутскизы мултэс гольтыръяськон, ашкынон. Патриотизммы гинэ но быриз. Мон егит дыръя на армие мынытэк кыль вал ай, ёзъёсыд сизьдэмен гинэ ӧй буйгасалзы — эшъяськемысь но дугдысалзы. Нош туннэ сурон сапег кутчанлэсь пегӟисьёсты инме ӝуто, соос армие сюремъёс шоры чиньыенызы возьмато: тон — лох. Жаляса верано, таӵе куашкан, астэ шедьтон, выль дунъетъёс утчан вакыт кема кыстӥськыны быгатоз на. Асьмелы пыӵатыны выро кадь: та улонын ваньзэ ворме уксё. Калык талы пумитъяське. Ӵапак со пумитъяськонлэн огез бервылыз — мултэс юон, калгон, гольтыръяськон. Тросэз дунне шоры чиньы пыртӥз учке. Уг валало уго: дуннеез воштыны быгатозы асьсэос гинэ.

Ӟудэм Апок.

Удмурт Дунне
By Удмурт Дунне 30 мая, 2012 10:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<