Нимтэм октет но «Уйвӧт»

Удмурт Дунне
By Удмурт Дунне 30 мая, 2012 09:38

Нимтэм октет но «Уйвӧт»

Валерия Фёдорова.

26-тӥ оштолэзе Ижысь «Квартира» барын ортчиз «Party for everybody» концерт-позыръяськон. Фестивалез радъяз выль огин — ЛАД-ЛАД промо: Лариса Дмитриева, Алексей Шкляев но Дарали Лели. Ужрадын ужаз куинь площадка: эктон азбар, синема кенос но майбыр чилл-аут, шутэтскон сэрег. Ӝытэз шулдыртӥзы егит удмурт кизилиос. Озьы ик воректӥзы трос выль нимъёс. Озьыен, тодматском!

 

Inkognito ассэ ӧз на тодма

Тужгес но егитэз группа — Inkognito (латин кылысь — лушкем, тодмамтэ). Егитъёс понна та нырысетӥ концерт луиз. Ог-огзэс соос умой уг на тодо вылэм. 56-тӥ гимназиын дышетскисьёс октет* кылдытћзы, 8 кузя люкаськыса: Валерия Фёдорова (кырӟась), Софья Россихина (барабанъёс), Даниль Галлеев (электроакустика), Алёна Васильева (бас-гитара), Лариса Хазиева (электрогитара), Лев Карпов (арган), Настя Рысаева (домра) но Ксения Касаткина (скрипка). Пыр-почгес тодматскыны луоз бамазы: http://vk.com/inkognito.band.

 

Валерия Фёдорова:

— Группа кылдытыны — милям Ксюша Касаткинаен малпанмы. Сое быдэстон понна тулыспалэ мон «Контактын» огин кылдытӥ но ялӥ: группае пыриськыны мылкыд карисьёс мед вазиськозы. Туннэ нуналлы группамылэн тупась нимыз но ӧвӧл ай — «Инкогнито» одно ик нимзэ воштоз. Нырысетӥ репетицимы кык арня талэсь азьло ортчиз. Ми фестивальлы кык кырӟан дасяса вуим. Малпаськом удмурт но фин калык кырӟанъёсыз быдэсъяны, унозэ калык гуръёсты адямиос уг тодо угось. Асьмеос но кырӟанъёс пӧрмытъялом, 2 кырӟанлы кылъёсмы но вань ини — крезьгур гожтыны гинэ кылиз на.

 

Софья Россихина:

— Валерия монэ группаяз чортӥз, мон барабанэн шудыны мылкыд кари. Нырысь малпай, кӧня ке шудо — дырме шулдыр ортчыто. Кутскизы репетициос — мылкыд ӝутӥськиз. Жаляса верано, удмурт кылэз мон уг тодӥськы, но туж шумпотӥсько, удмурт кырӟанъёсты быдэсъяськом шуыса.

«Инкогнито» — фолк-рок группа, тыршом удмурт калык кырӟанъёсы мар ке но выльзэ пыӵатыны, мед соос туала егитъёслы но тунсыко потозы.

 

Уйвот кадь пӧртэмесь

«Уйвӧт» коллективлэн пусэз.

Тазэ егит коллективез кылдытӥзы Кузебай Герд нимо гимназиысь дышетскисьёс — Влад Степанов, Юлия Гаврилова но Алексей Софронов. Куинь кузя соос сӥзьылысен шудо ини. Соосты Александр Катковлэн ансамбленыз «Шунды» огазеяськонлэн ужрадъёсаз ӧтчаллязы. «Уйвӧт» (http://vk.com/club37970564).

 

Юлия Гаврилова:

— Школаямы басьтӥзы барабанъёс, нош мынам пичи дырысен малпанэ — дыбырен (барабанэн) шудыны. Одӥг бит шуккыны возьматӥзы — мон дышетскыны кутски. Нырысь репетициын ик группа кылдытыны пӧрмиз. Кырӟась гинэ луыны медӥсько вал, нош пӧрми барабанэн шудӥсьлы. Озьыен, малпанэ быдэсмиз.

Ми туж кема бырйим группамылы ним. Нырысь Влад-Юля-Лёша гинэ нимаським. Собере англи сямен — The GROUP: паймымон, но со кылэз сомында янгышен гожъязы — воштоно луим. Малпаськыса «Уйв[э]т» нимаським, малы ке шуоно ми утчаськом мар ке но выльзэ, пӧртэм стильёсын крезьгуръёс быдэстӥськом, ми — уйвӧт кадь пӧртэмесь.

 

Влад Степанов:

— Гимназиын бас-гита-раоссы вал, но, жаляса верано, соос тэк кыллизы — мон «Амисо Вотт» группаын шудӥсько ни вал бере, мылкыды ӝутскиз школаын но туртскыны, аслэсьтым быгатонлыкъёсме волятыны. Зэмзэ ке верано, мон понна группамы вал адӟос-чаклос басьтон гинэ — вадесгожез ӝутон.

Ми понна валтӥсез — мед крезьгурмы кельшоз калыклы, нош кылъёсыз малпанъёсты, пушдуннеез усьтоз. Крезьгуръёсмес ваньмы ӵошен кылдытӥськом: котькудӥз аслэсьтыз партизэ малпа, собере ваньзэ бичаськом, тупатъяськом. Кырӟанъёс ӵемысь Юлялэн яке Лёшалэн кылбуръёссыя гожтӥськом, но тужгес но тодмо кырӟанмы — Ольга Трониналэн кылбурезъя гожтэм «Ӝокатӥсь зундэс».

Фестивальын милемыз калык туж умой пумитаз, милям мылкыдмы ик ӝутӥськиз азьланяз ужаны. Оскисько, школаез йылпумъяммы бере но люкаськылом, творчествомес азьланьтом.

Маша Золотарёва.

Удмурт Дунне
By Удмурт Дунне 30 мая, 2012 09:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<