Мынам кизилие

Удмурт Дунне
By Удмурт Дунне 29 мая, 2012 10:18

Мынам кизилие

«Особое задание» спектакльысь суред. Артистъёс В. Перевощиков, Т. Фанталова но Г. Соловьёв.

28-тӥ мае 80 арес тырмысал Тамара Николаевалы — тодмо удмурт драматурглэн но писательлэн Игнатий Гавриловлэн но УАССР-ысь калык артисткалэн Клавдия Гавриловалэн нылзылы.

Тамара Игнатьевна артистка луиз. Озьы ик со дышетӥсь но вал. Трос аръёс ӵоже Тамара Фанталова Удмурт музыкально-драматической театрын учкисьсэ шумпоттӥз. Сцена вылын со анаезлэн ныл дыр фамилиеныз тодмо луиз.

Одӥг пол школаын косӥзы «Мынам яратоно эше» сочинение гожтыны. Эшъёсы мынам соку трос вал. Но соос пӧлысь тужгес но висъямонэз — Тамара Гаврилова. Со мынэсьтым ӝыны арлы гинэ бадӟым вал, озьы ке но со аслэсьтым трослы вќжогес потылӥз. Пичи дырысеныз со крезьгуръя школае ветлӥз (со вакытэ сыӵеосты шер пумиталод вал). Кырӟаз, эктӥз, трос лыдӟиськиз, умой дышетскиз — котьмар ласянь синмаськымон но вожъяськымон будӥз. Мыным кельшо вал Тамаралэн сьӧд-пурысь синъёсыз. Пиньёсыз марӟан кадь тӧдьы-тӧдьыесь, жильк-жильк чебересь. Нош йырсиез, тӧдьы но сое уд шу, суд но, туж чебер, бабля. Бӧрдыса, ӝожтӥськыса ветлэмзэ адӟылэме ӧй вал. Мон сое «мынам кизилие» шуылӥ. Тамараен ми пӧртэм школаосын дышетским. Но милемыз матэ каре вал, дыр, анай-атайёсмылэн театрын ӵош ужамзы. Ми но, артистъёслэн нылпиоссы, асьмеды солэн бурд улаз шӧдылӥмы. Угось пичи дырмы театрын ортчиз.

Игнатий Гаврилович тодмо драматург вал. Со ик Удмурт театрен но кивалтӥз. Мукет артистъёслэн семьяосынызы ӵошатыса, Гавриловъёс бусьтыр улӥзы. Соин, лэся, актёръёслэн нылпиоссы праздникъёсты ортчытон вылысь Гавриловъёслэн бадӟым квартираысьтызы одӥгаз комнатаязы ӵемысь люкаськылӥзы.

Гавриловъёслэн нылпиосынызы ӵош будон улонамы трос юрттӥз. Тужгес но Вася агаелы. Со артист луиз, Василийлы шуд усиз Игнатий Гавриловичлэн пьесаосаз шудыны.

Пичи дырмы лек войнаен ӵош тупаз. Игнатий Гаврилович ас мылкыд каремезъя фронтэ кошкиз. Со «Победа за нами» фронтовой газетын корреспондент луыса ужаз. Нош Тамаралэн мамаез, Клавдия Кузьминична, Удмурт филармониысь концертной бригадаен гуртъёстӥ, концертъёс возьматъяса, ветлӥз. Ми со вакытэ эшеным люкиським. Тамара вынъёсыныз ӵош Вавож ёросын улӥсь песянаез доры келямын вал. Нош ми театрен ӵош потӥмы Алнаше, отӥяз Можгае.

1945-тӥ арын 9-тӥ майлы ваньмы Ижын вал ини. Вормон сярысь кылыса, Тамараен школае ӧм мынэ. Балконэ потыса, калыклэсь шулдыръяськемзэ учким, соосын ӵош шумпотӥм.

Гавриловъёс Прибалтикаын улыку, ми Тамараен ог-огмылы гожтэтъёс лэзьямы. (Игнатий Гаврилович война бере Вентспилс городын корреспондент луыса ужаз на. Соин ик семьязэ но дораз нуиз.) Тамара ивортылӥз война бере кышкыт суредъёсты адӟылэмез сярысь: пыд улын снарядъёс, минаос, коркаослэн борддоръёссы пуляосын пасямын, тросэз юртъёс куашкамын…

Латвиысь бертэмез бере Игнатий Гавриловичез Удмурт театре директоре пук-тӥзы. Ми соку Тамараен одӥг спектаклез но учкытэк ӧм кыльылэ. Одӥгаз война вакытысь нылпиослэсь рользэс но шудыны шуд усиз.

Одӥг пол Тамараен поръяськом Максим Горький нимо садэтӥ. Спектакль но улон-вылон сярысь кенешиськом. Со вакытэ эше мынэсьтым киме шуак кырмиз но кеськиз: «Со ук со, со, учкы!» Мон, номырзэ валатэк, йырме сопала но тапала берыкъясько. Тамара дугдӥз но, шоканэз пытсаськыса сямен, каллен гинэ вераз: «Со Крючков ук!» Костюмен дӥсяськем ӝужыт но веськрес воргоронэз адӟыса, мон валай кинэн пумиськеммес. Сое адямиос котыртӥзы. Воргорон соос шоры шуныт пальпотӥз, мыло-кыдо вераськиз. Яратоно киноартисмы Николай Крючков Ижевске гастрольёсы лыктэм. Милемлы, Москвалэсь кыдёкын улӥсь адямиослы, со быдӟа кизилиен пумиськон паймонлэсь но паймымон вал.

 

* * *

Школазэ умой йылпумъяса, Тамара пыриз Москваысь консерваторие. Тодон-валан басьтон солы кельшиз. Тамара данъяське вал тодмо крезьгурчилэн Д. Кабалевскийлэн занятиосаз пукеменыз. Тамараен одӥг вакытэ Москваын дышетскиз Миша Петров. Удмуртие вуыса, со Удмурт театрын режиссёр луиз, трос гожъяськиз. Тамараен ӵош ик дышетскиз Гена Корепанов. Бӧрысь со тодмо композитор Корепанов-Камский луиз. Консерваториын дышетскыкуз, Москваысь студентъёслэн хоренызы ӵош Тамара пыриськиз Бухарестын ортчем дуннеысь егитъёслэн фестивалязы.

Кӧня ке ар ортчыса, мон Тамараез адӟи ини Ижысь сцена вылысь. Со ужаны интыяськиз Крезьгуръя но драмая театре. 1958-тӥ арын Удмурт драмая театр луиз Крезьгуръя но драмая театр. Соин ик отчы трос кулэ вал хорын кырӟасьёс, солистъёс, балетын эктӥсьёс но музон артистъёс. «Кезьыт ошмес», «Вуж Мултан» спектакльёсын артэ мынылӥзы ӟучъёсыз — «Летучая мышь» но «Холопка». Озьы тӥни одӥг театрын кык труппа ужаз.

Мынам эшелэн малпанэз быдэсмиз — артистка луиз. Со ассэ сцена вылысь туж ӝог шедьтӥз. Ачиз кадь ик мыло-кыдо, шудӥсь-серектӥсь нылашъёсты шудӥз. Театре вуэмез бере ик быгатыса возьматӥз «Свадьба в Малиновке» спектакльысь Яринкаез, «Простор широкий» пьесаын — Анюткаез, «Летучая мышьын» — Аделез.

Аръёс ортчемъя ми Тамараен шергес адӟиськылӥм ини. Со но, мон но семья кылдытӥмы. Тамара бызиз Виталий Николаев журналистлы. Виталий Удмурт телевидениын нырысетӥез диктор вал, «Ижевск вечерний» передачалэн редакторез. 50-тӥ-60-тӥ аръёсы Удмуртиын улӥсьёс со передачаез яратыса учкизы.

Бӧрысь Тамара дышетон уже выжиз. Тазалыкез лябӟемен, сцена вылысь кошконо луиз. Аръёс ортчыса, висён сое воксё зӥбиз, ужаны ӧз сёты ни. Отӥяз Тамара валесэ выдӥз. Артисткаез ӵош ужась эшъёсыз вунэтыны кутскизы, дораз эскерыны ветлӥсьёс быризы. Сыӵе ик гумыре вуиз Виталий Ильич но. Улонысь кошкиз пичиез пизы, отӥяз висён зӥбиз бадӟымзэ но пизэс.

60 арес тырмон юбилеяз Тамараез ӟечкыланы ветлӥ. Лыктэмелы кыкназы ик шум-потӥзы, шуизы: вуж эшъёс, выльёсыз сярысь, оскымонэсьгес луо. Тамара вашкала роялез сьӧры пуксиз. Солэн шудэмезъя ми Виталиен вальс бергамы. Синкыли пыр тодамы вайимы: пичи дыръямы ог-огмес вунэтонтэм вылысь кыл сётӥмы вал. Быдэ вуыса но, эшъяськонмы уз кысы, шуимы. Тамара весяк луоз чебер, Анна — егит.

Анна Евсеева.

Удмурт Дунне
By Удмурт Дунне 29 мая, 2012 10:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<