Лудӟи шур дурын…

Удмурт Дунне
By Удмурт Дунне 29 мая, 2012 10:08

Лудӟи шур дурын…

«Совхоз «Правда» огазеяськонлэн тӧроез В. Виноградов.

Туннэ югдурез котькызьы бергаты, но шаерысьтымы ваньмаз сямен ёросъёсын 3-4 хозяйствоос гинэ пыд йылазы возисько. Дэри ёросын огсыр тыршисьёсыз пӧлы пыре «Совхоз «Правда» огазеяськон. Лудӟи шур котыре интыяськем гуртъёс, нокыӵе шуг-секытъёслы сётскытэк, азьлане выль вамышъёс лэсьто, музъем ужанэ усто амалъёсты куто но пудо вордонзэс азинто. Вань со ужъёсын азьветлӥсь но кутскон сётӥсь луэ огазеяськонлэн тӧроез Василий Виноградов. Эштосэз ӝутон-юнматон вылысь со дырзэ но, кужымзэ но уг жаля.

— Василий Васильевич, туэ тӥ 35-тӥ тулысэз бусыын пумитады. Маин ке таиз пӧртэмгес луэ-а?

— Укыр бадӟым пӧр-тэмлыкез ӧвӧл, шуыны луоз. Куазь ӧз люкеты кысык ужъёсты агротехникалэн куронъёсызъя быдэсъяны. Валэс юосмы но ӟег удалтыны кулэ, миымлэсь ичи уз люкаськы: котькуд гектарысь шорлыдын 18-20 центнер кутсаны чакласьком. Туэ нырысьсэ Вавож ёросысь Мичурин нимо эштосысь 400 тонна элита кидыс басьтыны быгатӥм. Озьы чабей, йыды но сезьы туж чебер пушъё ни. Огазеяськонмылы одӥг килоез кидыс 3 манетэн усиз, нош кылем 7 манетсэ тыриз республика. Сыӵе юрттэт иназ мынӥз. Соин ӵош ик 40 тонна минерал сылалъёс — сложной удобрение — вуттӥм. Ваньзэ сое кидысэн ӵош музъеме согим. Оглом вераса, милемлы ваньзэ 3 сюрс тонна ю тысь люкано. Со тырмоз кидыслы кельтыны, пудоез сюдыны но калыклы ӝыны дунын вузаны.

Валтӥсь агроном А. Агафонова.

Хозяйствомы шоро-куспо: вань музъемъёсмы 4 но ӝыны сюрс гектар, со пӧлысь гыроно-кизёноез — 3 сюрс. Кык сюрс гектараз будэтӥськом тысё но пуртэсо юос, кылемаз — трос но одӥг аръем турынъёс. 40 гектар картофка мерттӥськом. Татын нош ик вератэк уг луы 2010-тӥ арез. Кӧс гужем милемлы но трос изъян вайиз. Клевермы кабзэ куасьмиз-быриз. Кылем тулыс ми 5 миллион манетлы пудо сиён гинэ басьтӥм. Уйпал ёросъёсы сяна, вуим Пермь но Тюмень улосъёсы. Государство копак ӧз кушты, юрттӥз, но ӝынызэ гинэ ыштонъёсмес берыктӥз. Со понна но тау кариськом. Кӧс гужемлэн бервылыз али но шӧдӥське на. Табере уногес будэтӥськом ни люцерна, козлятник но костёр турын.

Музъем ужез нуон но ю-нянь будэтон оскемын валтӥсь агрономлы Алевтина Петровна Агафоновалы. Ми соин огдырегес совхозын ужаны кутским. Чырткем кышномурт ужзэ быгатыса быдэсъя, усто специалист но зэмос профессионал луэ. Сюлмаськемез пусъемын уно данъян грамотаосын.

Азьло ми трос будэтӥськом вал бакча сиёнъёс, тужгес но кубиста. Но одӥг арын соин «ӝуам»: вузаны ӧм быгатэ но бадӟым изъян адӟим. Собере та ужлэсь палэнским. Нош берло дыре югдур чутрак воштӥськиз. 90 процентсэ доходэз сётэ пудо вордон. Со бен милям гинэ озьы ӧвӧл, быдэс шаерамы сыӵе югдур.

— Озьыен, та удыс али валтӥсез луэ.

ИжГСХА-ысь студент Е. Прозоров практикаын.

— Шонер. Табере пудо вордонлы нимысьтыз саклык висъяськом, пудо уллёез ялан йылэтӥськом. Али милям 1 сюрс 350 йыр сюро таза пудомы, со пӧлысь 540-эз — скалъёс. 2004-тӥ арысен кутскыса, котькуд скаллэсь 5 сюрс килограммлэсь уно йӧл кыскиськом. Сьӧд-тӧдьы вы-жы пудомес голштин ошъёсын тазамытӥськом, кидыс басьтӥськом Ижысь «Удмуртская» племстанциысь. Та вакытэ скаллы быдэ 15 килограмм ёрос йӧл люкаськом, яке ваньзэ 7 тонна, огдыре 8-озь вуылӥм. Алигес ӝынызэ скалъёсмес лагере поттӥм, кылемзэ гидын возиськом.

Котькуд 100 скаллэсь 80 кунян басьтӥськом. Но гидъёсмы вужесь ни, соосты ялан выльдӥськом, пичи тракторен коть сиён пыртылыны мед луоз шуыса. Вань миксермы, ваньмыз сямен пудо уллёмы интыямын Совхозной черкогуртын. Та удысэз валаса нуо валтӥсь зоотехник Ольга Леонидовна Глухова но валтӥсь пудо першал Людмила Михайловна Казанцева. Соослэн матысь юрттӥсьсы луэ йӧл кысконъя бригадир Валентина Николаевна Синцова.

Нимаз лэсьтэмын йӧл кутон инты. Отчы пуктэмын 3 но 4 тоннаем йӧл сӥятон танк. Миым выль молоковоз басьтӥм. Йӧлмес вузаськом Дэри ёросысь, Сарапулысь но Уваысь йӧл заводъёсы. Али одӥг литрез шорлыдын 12,5 манетэн кошке, толалтэ 13,5 вал. Напез 3,7-3,8 процент возиське. Ӝынызэ пала вылӥ сортэн вузаськом.

— Котькуд эштосын сямен ик тӥляд но ӟеч ужасьёсты трос.

— Музъем ужасьёс бордысен кутском. Тани механизаторъёс пӧлысь туж усто ужа Николай Филиппов. МТЗ-82 тракторзэ ӟеч уте, котькуд тулыс ю кизе, Афган оже ветлэмын. Тыршемез пусъемын Удмурт Правительстволэн Данъян грамотаеныз. Солэсь адӟем каро эшъёсыз Александр Корепанов, Александр Павлов но Николай Зюзиков. Берлоез ДТ-75 гусеничной тракторен ужа ай, Дэбес ёросысь лыктыса, дорамы корка пуктӥз.

Пудо утисьёсмы но бере уг кылё. Дояркаос пӧлысь синмаськымон тыршо Людмила Клековкина, Галина Шубакова, Нина Зорина, Людмила Марусова, Ираида Алексеева, Ольга Дорофеева но мукетъёсыз. Л. Клековкиналы сётэмын Удмуртиысь Гурт удысъя но сиён-юонъя министерстволэн Данъян грамотаез.

Пичи кунянъёсты мусояса-вешаса будэто Людмила Петрова но Елена Галкина. Скалъёсты, жадёнэз валатэк, умой сюдэ Фёдор Шубин, нош оператор Николай Васютов йӧл оборудованиез чылкыт возе.

— Василий Васильевич, мар меда туннэ тӥледды золгес сюлэмшугъяськытэ?

— Котькуд гурт хозяйстволэн аслаз сюлмаськонэз. Милям но озьы ик. Ижкарлы матэ пуксемын бере, ужасьёсмы уг тырмо. Дорамы котькыӵеез лыктэ, но тросгес — капчи уж утчасьёс. Соосын ужано луиськом. Али шорлыдын 170 мурт возиськом. Со тырмыт. Куд-огез кошке но, выльысь но берытске. Улон со!

Мукетыз ужпум герӟась-кемын эстӥськон дунэн. Со одӥг литр йӧл мында луысал ке, милемлы нокыӵе юрттэт, дотация кулэ ӧй луысал. Гурт понна таӵе кун политика тупатоно вылэм. Соку ми гадь тыр шокчысалмы. Али но бен мукетъёсызлэсь урод ум улӥське, шоро-куспо уждунмы толэзяз 8 сюрс манет усе. Соин ӵош ик гурт калыклы музон юрттэт сётӥськом, тужгес но — корка пуктӥсьёслы но пудо вордӥсьёслы.

Геннадий Романов.

Удмурт Дунне
By Удмурт Дунне 29 мая, 2012 10:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<