Котькуд нунал модель уд луы

Удмурт Дунне
By Удмурт Дунне 30 мая, 2012 09:13

Котькуд нунал модель уд луы

Рок-крезьгурчи но модель Иван Белослудцев.

Ваня Белослудцев Удмурт кун университетысь удмурт кылосбур факультетын дышетске. Кезысь Ижкаре вуэмез бере куаш-куаш куара поттэмез ӧй вал. Дыр вуиз быгатонлыкъёссэ шараяны!

Павел Поздеевлэн верамезъя, «удмурт бритпоплэн осконэз» 17-тӥ куартолэзе Ivan Belosludsev & Cheber pios группаеныз йӧн-йӧн концерт возьматӥз, нош 26-тӥ мае шулдыртӥз Шор площадьын. Татын люкаськизы Брангурт песянайёс понна висисьёс — кырӟазы уно удмурт группаос. Ваня таблоидъёсы мукет муген но сюриз ни: шоркарысьтымы «Gorod» журналлэн кыкетӥ номераз сое туж тузӥ модель тусын адӟыны кылдӥз.

— Огнам кырӟаса но гитараен шудыса, акыльтӥ ни, — мылкыдзэ шарая Иван, — мае ке но выльзэ утчам потӥз. Кемалась потэ ни вал кырӟанъёсме группаен ӵош быдэстэме, тани луонлык но сюриз. Электрогитараен шудэ Ваня Лошманов, барабанъёс сьӧрын — Саша Илларионов, бас-гитараен — Саша Чазов, клавишаосын — Дима Якимов. Вань ужез бергатыны юрттӥзы «Сайлент Ву Гур» группаысь Света Ручкина но Толя Галиханов.

Фотосессия понна туж бадӟым тау шуэме потэ Юлия Спешиловалы. Ми соин одӥг гуртысь луиськомы. Cо иворчиосты мон доры келяз. Туж тунсыко адӟыны аслэсьтыд тусбуйдэ глянцевой журналысь… Со сяна, возьматыны сое ӵыжы-выжыослы. Соос мон понна туж шумпото!

Фотосессиын нырысь кӧня ке возьдаськи-а, мар-а, шуод, малы ке шуоно мон котькуд нунал модель уг луиськы. Нош бӧрысь шӧмзэ шӧдӥ, возьдаськонэ ортчиз но, олокыӵе но выросъёслы дыши…

Удмурт глянец но, малпасько, одно ик кулэ. Удмуртъёс но мукет калыкъёслэсь номырин пӧртэм ӧвӧл. Мед возьматозы быгатонлыкъёссэс!

Дарали Лели.

Удмурт Дунне
By Удмурт Дунне 30 мая, 2012 09:13
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<