Дауръёсын кылдэм пужы

Удмурт Дунне
By Удмурт Дунне Май 23, 2012 08:58

Дауръёсын кылдэм  пужы

Пичи Пурга ёросысь Вуж Мӧнья гуртысь усточиос Н. Тарасов но З. Силантьева.

«Дауръёсын кылдэм пужы» адӟытон усьтӥськиз Удмурт Республикаысь киужъёсъя юртын. Та рад асьсэлэсь усто луэмзэс Ижын улӥсьёслы возьмато Пичи Пурга ёросысь Вуж Мӧнья гуртысь кибашлыос.

Вуж Мӧньялась киужъёсъя юрт усьтэмын вал шаерамы нырысьёсыз радын, 1993-тӥ арын. Соин кивалтэ республикаысьтымы культура удысын дано ужась, Удмуртилэн Кун премиезлэн лауреатэз Николай Тарасов.

Николай Михайлович верамъя, Ижысь киужъёсъя центрын соослэн та 5-тӥез адӟытонзы ини. Таяз выставкае 19 усточилэсь 200-лэсь уно ужъёссэс вуттэмын. Соосты киужъёсъя юртысь ужасьёс гинэ ӧз лэсьтэ — гуртысьтызы кибашлыос но.

Пусйыны кулэ, ӵапак Вуж Мӧньяысь усточиос, вашкалаосмылэсь адӟем карыса, улӟытӥзы куролэсь мунёосты. Куролэсь пӧртэм киужъёс пӧрмытъяло Зоя Силантьева, Ольга Прохорова но Ольга Тарасова. Котькуд выставкае соос тунсыко но паймымон ужъёс дасяло. Таязэ вуттӥзы брангурт песяйёслы кельшись мунёоссэс но.

— Киужъёсъя юртамы 10 усточиос тыршо. Котькуд адӟытонлы ми маке выльзэ малпаськомы. Таяз паськытгес возьматыны тыршимы лыэн ужаны быгатэммес. Трос скульптураос вайим. Василий Мишинлэн но Игорь Абрамовлэн ужъёссы лэсьтэмын, фольклор вылэ пыкиськыса, отысь адӟыны луэ, кызьы песянай-песятайёсмы вӧсяськылӥзы, куно пумиталлязы, солдат келязы. Куиськон амалъёсмес но пичияк воштӥмы, вашкалазэ кельтыса ик, выльзэ утчаськом. Сое адӟыны луэ Елена Анисимовалэн, Любовь Имполитовалэн куэм ӝӧккышетъёсысьтызы, ӵушконъёсысьтызы, выж лёгетъёсысьтызы. Станислав Перевощиковлэн вышкыосыз, Сергей Овчинниковлэн кызьпу туйлэсь сарваосыз синэз шумпотто, — шуэ Николай Тарасов.

Вуж Мӧньяысь усточиослэн адӟытонзы ужалоз 13-тӥ июнёзь. Асьсэос кибашлыос ужтэк уг пуко, соос дасясько ини калыкез паймытыны тунсыко но чебер киужъёсынызы Герберын.

Галина Семёнова.

Удмурт Дунне
By Удмурт Дунне Май 23, 2012 08:58
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<