Висёнмы — шальтрам сюресъёс

Удмурт Дунне
By Удмурт Дунне 11 мая, 2012 09:03

Правительствоын ортчиз сюресъёсты выль технологиосын лэсьтон-тупатон ужпумъёслы сӥзем Россиысь автомобиль сюресъёсъя управленилэн комиссиезлэн (РАДОР) кенешез.

Отчы пыриськизы «Росавтодор» агентстволэн, 31 улосысь сюрес управлениослэн кивалтӥсьёссы, сюрес хозяйствоен герӟаськем огазеяськонъёс, техника поттӥсь предприятиосысь специалистъёс. Люкаськемъёсты шуныт пумитаз Правительстволэн Тӧроез Юрий Питкевич:

— Шальтрам сюресъёс — быдэс кунмылэн висёнэз, — шуиз со. — Жаляса верано, 90-тӥ аръёсы Сюресъёсъя фонд быриз. Соин сэрен уноез азьвыл лэсьтэм сюресъёс куашкан калэ вуизы. Туэ ми выльысь улӟытӥм та фондэз. Табере сюлмаськоно солы висъям коньдонэз пайдаё кутон сярысь.

Транспортъя но сюрес хозяйствоя министр Олег Гарин пусйиз:

— Та дырлы министерство чакласа возе шаерысьтымы 6 сюрс 17 иськем сюресъёсты, 386 выжез. Туэ Сюресъёсъя фондлы висъяськоз ог 3 миллиард манет. Со кутӥськоз сюресъёсты возёнлы, соосты чылкытатонлы, пусъёс пуктылонлы но мукет. Туэ тупатэмын луоз 50 иськем сюрес.

Кылем арын бадӟым уж лэсьтэмын пичи гуртъёсысь сюресъёсты бадӟым сюресъёсын герӟан ласянь. Республикалэн но федерацилэн коньдонэнызы выльдэмын 62,4 иськем гурт сюресъёс. Озьы 27 гурт герӟаськиз бадӟым сюресъёсын. Пусъёно: та уж туэ но азьланьтӥськоз. Федерация бюджетысь висъяны чакламын 436 миллион манет, нош Удмуртилэн кисыысьтыз — 75,6 миллион манет. Озьы 17 гурт герӟаськоз бадӟым сюресъёсын.

Сюресъёсъя фондысь ог 5 процентэз коньдон мыноз трос квартираё коркаослэсь азбаръёссэс, отчы пыран-потан сюресъёссэс тупатонлы. Кылем арын таӵе ужъёс тросгес нуиськизы Ижевскын, туэ радъяськозы мукет городъёсын но. 2012-тӥ арын нимысьтыз техника басьтонлы Сюресъёсъя фондысь висъяськоз оглом 150 миллион манет. Та дырлы вуиз ни 13 трактор-машина.

Ушъямон: министерство бюджет чотын ужась «Сюрес вылын кышкытлыклэсь утиськон» огазеяськон кылдытӥз. Со улсын усьтэмын грузэн тырмытэм бадӟым машинаослэсь секталазэс эскеронъя интызэ вошъясь 7 пост. Туэ постъёслэсь лыдзэс тросгес карыны чакламын.

РАДОР-лэн валтӥсь директорез Игорь Старыгин но пумиськонын, малпанъёссэ усьтытэк, ӧз чида:

— Та выллем люкаськылонъёс, Москваын сяна, ньыль пол ортчылӥзы ни мукет улосъёсын но. Сюресъёс лэсьтонын Россиын азьпалан мыно Москва, Ленинград, Ярославль, Новосибирск улосъёс, Татарстан, Башкортостан республикаос. Вань, мае асэстыны Удмуртилэсь но. Шуом, республикады ӝог усьтӥз Сюресъёсъя фондэз. Али со 83 улосъёсын вань ни.

Та сяна, сюресъёс вылысь бадӟым машинаослэсь секталазэс мертась постъёсты но адӟем карымон. Но Америкаысь но Европаысь кунъёсын та ужез быдэсъяло ке автоматъёс, асьмелэн сыӵе радлык пуктэмын ай Вологда-Новая Ладога федерал сюрес вылын гинэ. Озьы ик учёнойёс ялан ужало кема аръёслы чидась сюрес шобрет кылдытон но та ужъёслы выль техника лэсьтон бордын. Со понна кылдытэмын нимысьтыз институтъёс но предприятиос.

Быдэс дуннеын сямен ик, Россиын тужгес вӧлмемын кык амалъя сюрес лэсьтон: асфальтэн но цементобетонэн. Тужгес но кема чида цементобетон. Нырысьсэ соин герӟаськизы Удмуртиысь Вотка но Пермь улосысь Чайковский городъёс. Ижевск-Сарапул сюреслэн оглюкетэз та материалэн шобыртэмын. Озьы ке но цементобетонэз асфальт ворме ик. Со дуно усе ке но, асфальтэз ӝоггес вӧлдыны но тупатыны луэ. Соин ик учёнойёс ӵапак солэсь ӟечлыксэ ӝутыны тыршо. Та дырлы асфальтэ 4-5 пумо ватсэтъёс малпамын ни: огез шыръя битумез, мукетыз ӝог сӥя, куинетӥзэ вӧлдыны капчи, ньылетӥез уг пилиськы.

Иван Аркашев.

Удмурт Дунне
By Удмурт Дунне 11 мая, 2012 09:03