Быдэс дунне тодматскысал удмуртъёсын

Удмурт Дунне
By Удмурт Дунне 30 мая, 2012 09:59

Быдэс дунне тодматскысал удмуртъёсын

Удмуртие лыктэме бере ик удмурт кыл но калыклэн лулчеберетэз туж тунсыко потыны кутскиз. Вань дуннелы та мылкыды сярысь мадьысал кадь.

Мар бордысен кутсконо? Удмурт кырӟанъёсты берыктыны кутски. Калыклэсь менталитетсэ крезьгур тужгес умой возьматэ, озьы ведь? Берлогес туж шумпотӥ, кылысь кылэ берыктэм кырӟанъёсы мукет муртъёслы но кельшизы шуыса. Польшаын улӥсь анае но кык кырӟанэз дышетӥз.

Собере малпай: кырӟанъёс гинэ удмурт шаерлэсь чеберлыксэ уг возьмато ук. Со вие ик йырам лыктӥз: удмурт киноез испан кылэ берыктоно! Испан кылын субтитръёсты бызьыса кадь дасяй но киноез вотэсэ келяй. Арня но ӧз ортчы, «Узы-боры» котырын огыр-бугыр улон кутскиз: трос пӧртэм интыосын улӥсьёс киноез учкиллям, кылсярысь, Испаниын, Америкаын, Мексикаын но мукет. Учкиллям — соиз умой, но кыӵе cоослэн мылкыдзы, малпанзы?

Мынам юанэлы Интернетысь Youtube-ын одӥг тунсыко комментарий учырам. Тереса, Аргентинаысь инженер, литератураез яратӥсь, тазьы гожтэм:

Тереса.

Яратон сярысь историос мыным сокем тунсыко уг пото, озьы ке но таиз кино умой возьматэ гуртын но карын улонлэсь бадӟым пӧртэмлыксэс. Ог-огзылэсь висъясько шутэтскон но шулдыръяськон амалъёс, эшъёсты дунъян, ог-огедлы юрттон но сюлмаськон. Максимлэн песятаеныз вераськемез тужгес но пыриз сюлэмам: удмурт луэмезлэсь, анай кылызлэсь но ас выжыезлэсь егит мурт медаз возьдаськы, шуиз со. Мынам малпамея, туала глобализация но калыкъёсты выжытэм кельтӥсь гомогенизация процессъёс вакытэ ас калыкедлэн оглюкетэз луэмдэ шӧдон секытэн сётӥське. Удмуртъёс мед утиськозы вылэм лулчеберетсы но сям-йылолъёссы пыр. Со сяна, кельшизы инкуазь суредъёс — кызьы гуртысь, озьы ик Ижкарысь. Крезьгурез но туж сюлэме пырымон потӥз.

Мукет гожтэт Facebook пыр Гватемалаысь лыктэм, мон сое сак лыдӟи.

Эрик.

Ӟечбур! Тон-а удмурт киноез келяд? Мон сое учки. Асьмеос ноку но маке вылезлы дышетскемысь ум дугдэ, бен-а? Мон нырысьсэ удмуртъёс сярысь кылӥ.

Озьы вераськыны кутскимы. Эрик — егит пияш, химиез дышетэ но киноез туж яратэ. Со «Узы-боры» сярысь одӥг ӟуч эшмылэсь тодэм. Солэн верамезъя, трос мукет калыкъёслэн но югдурзы-улонзы туала удмуртъёслэн кадь ик.

Эрик гожтэ: Зэмзэ вераса, мон азьло ноку но ӧй кылылы вал удмуртъёс сярысь. Нырысьсэ тодӥ, куке Москваысь эше «Узы-боры» киноез учкыны мыным ссылка сётӥз. Быдэс дуннеысь киноен тунсыкъяськисько бере, мон мылысь-кыдысь учки та киноез, со ортчыт тунсыко потӥз. Удмуртъёс мыным йӧтӥзы лачмытэсь но востэмесь. Соос семьязэс но эшъёссэс туж гажало, дыр. Синйылтӥ на: соослэн, мукет калыкъёслэн сямен ик, социальной ужпумъёссы лачак.

Мон шонер валай ке, майя калыклэн но удмуртъёслэн одӥг кадь югдурзы. Гватемалаын (кытын мон вордскемын) улӥсьёс пӧлын майяос лыдзыя тужгес тросэз луо. Трос луэмзы шоры учкытэк но, соосты уггес гажало. Мон малпамъя, соос туала ӝог бызись улонлэн куронъёсызъя ӧз тупатске. Оло, соин но менталитетсы жуг-жаген но кырсен тырмемын ӧвӧл.

Нокыӵе кино умой ӧй пӧрмысал, со сярысь критика ӧй ке луысал. Испан эшъёсыным вераськыкум, мон валай: соос пӧлын сыӵе но адямиос вань — «Узы-боры» киноын возьматэм улонэз син азязы пуктыны ик уг быгато. Соин ик киноез умой уг валало. Амаля, ӵош дышетскем тодмое, гожтэ:

Мон малпамъя, та киноын осконтэм югдуръёсыз-учыръёсыз вань, кылсярысь, луд сценаын. Малы соос турнам турынэз мотое поно — трактор интые? Нош городын, дискотекаын, мыным потӥз, калык дэремен дӥсяськем валтӥсь герой укыр зол висъяське туала обстановкаын. Вераме потэ на, киноысь вераськонъёсты Испаниын нокытысь ӧй кылысал, со кылъёсты мыным нокин ӧй верасал — уката ик нырысетӥ сценаын, озьы ик узырлэсь узыр пуштросо кылъёс чузъясько геройлэн песятаеныз кенешон люкетын.

Мон малпасько, вань та мылкыдъёс валамонэсь. Асьмеос, мар веранэз, пӧртэмесь. Ваньмы огкадесь лусалмы ке, мӧзмыт луысал, озьы ведь? Кельшиз-а, ӧз-а, ваньмыз соглаш луизы-а, ӧз-а, со шоры учкытэк, пусъеме потэ: сыӵе инициативаос пичи калыкъёслы туж кулэ. Мон шумпотӥсько: кунгож сьӧрысь тросэз тодмоосы (озьы ик тодмотэм адямиос но) киноен тунсыкъяськиллям. Та дырлы Уoutube сервисын 4,5 сюрс пала адямиос кинолэсь испан кылын версизэ учкыны пыраллям.

Ма бен, та ужез азьланьтоно, та йылпумъян медаз луы! Мылысь-кыдысь учкысалмы на трос выль удмурт киноосты, мультфильмъёсты, документальной фильмъёсты… Озьыен, удмуртъёс, басьтӥське выль проектъёс борды, ми чидатэк возьмаськом. Эн вунэтэ: быдэс дуннелэн тӥледын тодматскемез потэ!

Мария Мазур.

Удмурт Дунне
By Удмурт Дунне 30 мая, 2012 09:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<