Ю калтон дыръя депутатъёсты уг быръё

Удмурт Дунне
By Удмурт Дунне Апрель 6, 2012 13:46
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Россиысь ЦИК кӧня ке арня талэсь ивортӥз: Кун Кенеше депутатъёсты быръён ортчоз туэ октябре.

Удмуртиысь парламентын таӵе решениен соглаш ӧй вал.

Таин валче Кун Кенешлэн Тӧроез Александр Соловьёв Москвае вуылӥз. Солэсь ӵектонзэ — быръёнъёсты 2013-тӥ арлы мартозь выжтон сярысь — ӧз кылэ Россиысь Президентлэн администрацияз но, «Огъя Россия» партиын но.

Таӵе дэмлан юнме шорысь ӧз кылды, пусъе Александр Васильевич. Уго берло дыре туж ӵем быръёнъёс тупаллязы ни — калык талэсь жадемын. Собере, июле Россиын ӝутскозы пӧртэм тыриськонъёслы дунъёс — адямиос таӵе ватсанъёсты шумпотыса уз пумиталэ. Куинетӥ муг но вань. Быръёнъёс азьын ортчытоно праймериз. Таосыз тупало май-июнь но август-сентябрь толэзьёсы. Асьме шаерамы ӵапак кысык вакыт — я гырон-кизён, я ю калтон дыр.

Вылаз ик быръёнъёсты берлолы кельтыны курисьёс, Удмуртия сяна но, вань на — Бурятиын но Смоленск улосын озьы ик выльдӥськозы парламентъёссы. 2013-тӥ арын мартэ 10 улосын пӧртэм пумо быръёнъёс ортчозы.

Таяз арняе «Огъя Россия» партилэн Удмурт ёзэзлэн политсоветаз Александр Соловьёв ивортћз: Кун Кенеше быръёнъёс тупалозы октябрь толэзе. Депутатлэсь мандатсэ басьтоз укмыстон мурт.

 Елена Скворцова.

 

Кылдӥз выль малпаськон

Александр Соловьёв пыриськиз ПФО-ысь Закон кылдытӥсь ёзъёслэн ассоциацизылэн кенешоназ. Со ортчиз 30-тӥ ползэ. Таяз радэ пӧртэм улосъёсысь парламентъёслэсь тӧрооссэс пумитаз Пенза.

Ассоциацие пырисьёс кенешизы пӧртэм юанъёсъя. Кылсярысь, кызьы ӟечгес радъяно улосъёсы инвестициосты кысконэз. Уго Россиысь Улосъёсты азинтонъя министерство бордын кылдытэмын Инвестициосъя федерал фонд. Татчы люкамын кун ласянь висъям уксё но, ужбергатӥсьёслэн сётэм коньдонзы но. Таӵе ик фондъёслы инъет чаклано котькуд республикаын но областьын.

Вылӥ кивалтӥсьёс пыр-поч вераськизы культура удыс сярысь. Пенза улос та ласянь адӟем карымон. Татын туж тузӥ драмая театрзы. Уката вожъяськымон но палёмымон библиотеказы. 10 этажъем выль юрт сылэ город шорын. Лэсьтӥськонлы 1,5 миллиард манет быдтэмын. Уксё юнме кисьтэмын ӧвӧл. Егитъёс но, мӧйыос но библиотекае мыло-кыдо ветло — татын вань туала технологиосъя ужаны луэ ни.

Мукетыз паймымон объект — «Дизель-Арена». Спортъя комплексын хоккей коробкаез гинэ кык. Татын радъясько бадӟым ӵошатсконъёс, мугорзэс кыдато профессионал спортсменъёс.

— Пенза улосын культура вунэтэмын ӧвӧл. Та удысын ужасьёслэн шоро-куспо уждунзы — 10 сюрс манет. Соин асьме дорын но та ужпумез ӝутоно, та пумысен кенешоно культурая министрен. Тани кылем сӥзьыл дышетон удысын ужасьёслэсь но воспитательёслэсь уждунъёссэс 30 процентлы ӝутыны быгатӥм. Озьыен, культураез но вунэтоно ӧвӧл, — шуиз Александр Соловьёв.

 Елена Скворцова.

 

Жуг-жаг утялтэмез яратэ

Кун Кенешысь Бюджетъя, вытъёсъя но коньдон ужпумъёсъя ялан ужась комиссиысь депутатъёс алигес ортчем пумиськоназы ӧтчазы инкуазь узырлыкъёсъя но инкуазез утёнъя министрез Михаил Кургузкинэз.

Берло аръёсы уг чалмыло отходъёсты быдтонъя завод, жуг-жагез сортировать каронъя станциос ёросъёсын усьтон пумысен кенешонъёс. Ку улонэ пыӵаны кутскозы та проектъёс?

— Станциосты усьтон понна Удмурт шаерез укмыс люкетлы висъямы, — веранзэ мытӥз министр. — Со полигонъёсы вуттэмын луозы матысь ёросъёсысь-гуртъёсысь отходъёс. Пусйыны кулэ: Воткинск но Глазов ёросъёсын таӵе станциос ужзэс радъяло ини. Мукет интыосын полигонъёсты ӝутоно ай. Туннэ вераны луоз ини: отходъёсты возёнъя но быдтонъя кун программа улонэ пыӵаны ӧдъяз. Талы угось коньдон висъяськыны кутскиз. Та вакытэ ужаськомы Ува палъёсын полигон пуктонлы документъёс дасян бордын. Ум вунэтӥське мукет ёросъёс сярысь но.

М. Кургузкин нимысьтыз саклык висъяз отходъёсты переработать каронъя комплекслы. Матысь дыре та проект но улонэ пыӵаны кутскоз. Сое быдэстонэ кыскемын луозы инвесторъёс.

Ку ужзэ мытоз комплекс? Туннэ та юанлы валэктон сётыны вазь на, угось инвесторъёслэн ӵектонъёссы пӧлысь быръёно тужгес но тупамонзэ, соосын огкыл юнматоно.

Министр пусйиз: та дырлы вераны луоз ни одӥгзэ — комплекс интыяськоз Дэри ёросэ яке Иж котыре. Шоркармы котырын улӥсез угось тросгес, соин ик отходъёс но ӝог кылдо. Комплекс чакламын луоз Камбаркаысь, Ижысь, Сарапулысь отходъёсты переработать каронлы.

Елена Тугашова.

Удмурт Дунне
By Удмурт Дунне Апрель 6, 2012 13:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<