Шыръяны уд дышы — узыр уд улы

Удмурт Дунне
By Удмурт Дунне Апрель 13, 2012 10:02

Европаысь узыр кунъёсын но США-ен ӵошатоно ке, Россиын кык-куинь поллы бере кылиськом ужась киослэн азинлыксыя.

Кылем арын странамы пыриз ВТО-е. Озьыен, табере асьмеос ӵошатскыны кулэ, поттэм вузъёсмы ӟечлыксыя улӥгес медаз луэ шуыса. Со дыре ик быгатоно шыръяны тылэз, вуэз, шунытэз.

Та ужлэн быдэсъяськемез сярысь кенешизы Кун Кенешлэн Президиумаз но. Удмуртиын 2020-тӥ арозь 40 процентсэ ресурсъёсты шыръяны быгатоно. Таӵе план пуктэмын республикаысь программаын. Малпам ужъёсты быдэстонлы 6 миллиард манетлэсь трос уксё кулэ луоз. Пӧлысьтыз ог 5 миллиардэз вуыны кулэ федерал бюджетысь, республикалэн кисыысьтыз висъяно 1 миллиард манетлэсь ятыр, ивортӥз промышленностья но энергетикая министр Олег Радионов.

Озьы ке но тырмыт коньдон уг висъяськы. Тани кылем арын 103 миллион манет вуиз. Коньдонэз висъязы предприятиосы пӧсь но кезьыт вуэз шыръясь счётчикъёс пуктылыны. Та уж таяз аре но азинскоз.

Чакламын транспорт чотын но шыръяны. Кылсярысь, бензинэн ворттылӥсь автобусъёсты ик газ вылэ выжтыны. Нош таяз шуг-секытъёстэк ӧз ортчы. Уго автопаркъёсысь 80 процентэз машинаос выльдэмын, соосты газэн ужатон понна выльысь коньдон кисьтоно. Чакламын, мукетъят транспортлы висъям машинаосты газэн ужасьёссэ басьтоно шуыса.

Туэ программаез быдэсъяны бюджетын чакламын 70 миллион манет гинэ. Нош ужъёс малпамын вал 331 миллион манетлы. Республикалэн кисыяз тамында коньдон ӧз шедьы. Иське, быдэсмозы-а чаклам ужъёс 2020-тӥ арозь? Уз, шуо Кун Кенешлэн Тӧроез Александр Соловьёв но Экономикаысь политикая, промышленностья но инвестициосъя ялан ужась комиссилэн тӧроез Андрей Гальцин.

Тани Татарстанын но Башкортостанын та выллем программалы ик араз 750 миллион манет висъяло. Удмуртия быдӟагес ик улосын — Пензаын — 80 миллион. Соин Кун Кенешлэн Президиумез нимысьтыз постановлениен вазиське Правительствое, бюджетэ ватсаса вуэм уксёез программаез быдэсъянлы висъяно шуыса.

Елена Скворцова.

Удмурт Дунне
By Удмурт Дунне Апрель 13, 2012 10:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<