Уксё кисыез уг кыскы

Удмурт Дунне
By Удмурт Дунне 27 апреля, 2012 12:02

Уксё кисыез уг кыскы

Шаерамы 386 выжъёс, пӧлысьтызы 24-ез пулэсь лэсьтэмын.

Таяз арняе Кун Кенешысь депутатъёс люкаськылӥзы 33-тӥ сессие. Парламентэ быръемъёс эскерыны чаклазы 10 ужпумез. Но повесткае 11-тӥ юан — Балезиное кисьтэм химия суретъёсты утялтон сярысь — пыртыны куризы коммунистъёс. Сессие вуэм депутатъёс пӧлысь тросэз куаразэс сётӥзы та ужпумъя отчётэз кылзон понна.

 

70 процентэз сюресъёс тупатъямез витё

Парламентарийёслэн таиз кенешонзы радъяськиз капчи тулкым вылын. Коньдон ужпумъёсъя министрлэн воштӥсез Станислав Евдокимов ивортӥз, туэлы чаклам бюджетэ ватсаса 1,5 миллиард манетлэсь ятыр коньдон вуэм сярысь. 1 миллиард манет потӥз огазеяськонъёслэн табышсылы выт чотын, 501 миллион манет — мувӧй продуктъёслы акцизъёс тырем чотын. Эшшо бюджетэ уксё вуоз пӧртэм федерал программаосъя.

Таин валче 1 миллиард манет висъяськоз Лэсьтӥськонъя, архитектурая но улон инты политикая министерстволы. Уксё мыноз чаклам объектъёсты ӝутыны. Кылсярысь, Дэбес ёросысь Удмурт Льӧм гуртын школа ӝутскоз. Выль нылпи садъёс пуктӥськозы Можга городын, Красногорск, Балезино но Вавож черкогуртъёсын. Ижын но Сарапулын нылпи садъёс выльдӥськозы. Оглом, та миллиард мыноз социальной объектъёсты ӝутонэ.

501 миллион манетлы йылоз республикаысьтымы Сюресъёсъя фонд. Та коньдонэз чакламын городъёс вискын люкыны. Тросгес уксё мыноз Ижлы — 100 миллион, тужгес ичи — Можгалы, татчы 15 миллион манет келялозы. Озьы ик Транспортъя но сюрес хозяйствоя министерство 154 миллион манет висъялоз выжъёсты ӝутон-выльдонлы. Та коньдон чотын ужъёс кутскозы Алнаш, Дэбес, Кез, Яр но мукет ёросъёсын. Нялтас вераса, шаерамы 386 выжъёс, пӧлысьтызы 24-ез пулэсь лэсьтэмын.

Туэ Сюресъёсъя фондлэн быдӟалаез 3 миллиард манет котыр люкаське. Кун Кенешлэн Тӧроез Александр Соловьёв сюрес лэсьтонын кылдэм югдурез котькинлэсь ӟеч тодэ. Та удысын со 20 арлэсь кема ужамын.

— Берло аръёсы 70 процентэз сюресъёс вылын тупатъян ужъёс ӧз нуиське. Уксё уг тырмы. Соин выльдэм сюресъёс но, 2 ар ортчыса, куашканы ӧдъяло. Тырмоз «пасьёсты» кышъяны, сюрес вӧлдоно ни рос-прос, иськемъёсын, — пусйиз Александр Соловьёв.

Зэм, но тулыс ӵоже вуэм коньдонэз люкон понна тендеръёс радъяськозы на. Ку сюрес лэсьтӥсьёс уж борды кутскозы — тодмо ӧвӧл.

Депутатъёслы мукет ӟеч иворез вераз Кун Кенешысь Бюджетъя, вытъя но коньдон ужпумъёсъя ялан ужась комиссилэн тӧроез Софья Широбокова. Бюджетэ ватсаса вуэм коньдон юрттоз 16 процентлы кулэстыны республикалэсь пунэмъёссэ. Акцизъёс понна уксё туэ эшшо вуоз на. Азьланяз та уксёез но пайдаен кутоно мед луоз.

 

Капчиятонъёс юрттозы сюрс муртлы

Кылем арлы йылпумъянъёс лэсьтӥз Удмуртилэн Президентэзлэн но Правительствоезлэн администрациенызы кивалтӥсь Александр Горяинов. Таӵе отчёт чакламын «Удмурт Республикаын коррупциен нюръяськон сярысь» законлэн огаз статьяяз.

Арлы быдэ 1 сюрс 400-лэсь ятыр чиновникъёс ар ӵоже басьтэм доходъёссыя ивортон лэсьто. Кылем арын 8 госслужащийёслы пумит уголовной ужъёс ӝутэмын вал. 6 мурт кыл кутытэмын, огез чиновник — Камбарка ёрослэн йырыз — пытсэт сьӧры келямын.

Нырысетӥ лыдӟонъёсты пырпотӥзы «Удмурт Республикаын транспортъя выт сярысь» законэ воштонъёс. Афганистанын ожмаськемъёс, радиация катастрофаез утялтонэ пыриськемъёс кылем арын сӥзьыл «Калык бюджет» проект радъяськон дыръя веразы куронъёссэс. Табере соос кылэмын. Транспорт налоглэсь быдэсак мозмытэмын луозы ожын инвалид луэмъёс но Чернобыльын, мукет интыосын авариосыз утялтонын ужамъёс. Но капчиятон чакламын одӥг машиналы гинэ, солэн огъя вал кужымез 150-лэсь трос медаз луы.

Афганистан, Чечня но мукет пичи ожъёсы пыриськем ветеранъёслы транспорт налогзэс 50 процентлы кулэстозы. Но таяз учыре но капчиятон чакламын одӥг машиналы, солэн вал кужымез 100-лэсь уно медаз луы.

Бюджетъя, вытъя но коньдон ужпумъёсъя ялан ужась комиссилэн тӧроез Софья Широбокова верамъя, республикалэн кисыез таӵе капчиятонэн валче трослы уз векчия. Льгота юрттоз ог сюрс муртлы. Оглом вань капчиятонъёс 700 сюрс манет тыр усё.

 

Инкуазез саптасьёслы — бадӟым тыриськонъёс

ЛДПР фракцие пырись депутатъёс выль ӵектон дасязы Кун Думаысь эшъёссылы. Балезино посёлокын кышкыт ядэз кисьтэмен валче соос куро чурытгес карыны кыл кутытонэз. Инкуазез саптан учыръёс, Удмуртиын сяна, мукет улосъёсын но ӵем шараясько. Таӵе югдурез тупатыны юрттозы бадӟым штрафъёс гинэ. Соин тыриськонэз 1 миллион манетозь вуттоно — кылсярысь, али огазеяськонъёсты тужгес троссэ 100-250 сюрс манетэн кышкатыны луэ. Зэмалозы-а таӵе ӵектонъёс? Кужыме пырон понна та проект Кун Думаысь депутатъёс пыр ортчыны кулэ.

Правительстволэн Тӧроез-лэн воштӥсез Ильдар Бикбулатов депутатъёслы пыр-поч ивортӥз Балезиноын четырёххлористой углеродэз утялтон сярысь. Химия суретъёс октэмын. Ядэн тырмытэмын 112 контейнер. Кышкыт сурет ватӥськемын вал йӧ улэ. Корам йӧ шунтэмын. Сое фильтр пыр поттӥзы, соку шараяськиз, вуын четырёххлористой углеродэз ӧвӧл шуыса. Но ву туж трос люкаськиз — 407 кубометр. Таӵе вуэз специалистъёс шуо технической. Ву кисьтэмын Эгра ёросысь Чутыр-Кионгоп месторождение 1 сюрс 660 метр мурдалае. Ильдар Бикбулатов оскытӥз, таӵе ужез ортчытон понна вань чаклась ёзъёслэсь разрешение басьтэмын шуыса.

Елена Скворцова.

Удмурт Дунне
By Удмурт Дунне 27 апреля, 2012 12:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<