Удмурт культура — сюсьтыл кадь

Удмурт Дунне
By Удмурт Дунне 4 апреля, 2012 11:54

Удмурт культура — сюсьтыл кадь

Кузебай Гердэз буре ваён ужрад ортчиз 1-тӥ ноябре 2011-тӥ арын.

XX даур. 1934-тӥ ар. Соловки шормуӵ. Кузебай Герд пытсэт сьӧрын. Тазалыкез лябӟемын, мылкыдыз пуксемын. Тае шӧдыны луэ Иосиф Алексеевич Наговицынлы ыстэм гожтэтэз пыр.

Та гожтэт Гердлэн бер-пуметӥ куараез кадь луэ. Со ивортэ тазалыкезлэн лябӟемез сярысь. Сюлмаське, кин кие кылёз архивез, уно аръёс ӵоже люкам материалъёсыз. Гожтэтэз пыр Герд вазиське И. Наговицынлы: курисько — вотякъёс сярысь бичам библиотекаме утелэ вал…

Тодӥськомы: сюсьтыл валикъёс вылэ гожъям материалъёссэ утиз Вера Николаевна Недзвецкая — Гердлэн Москваын улӥсь матысь эшез. Солы луыса асьмелэн луонлыкмы вань Гердлэсь зэмос куаразэ кылыны. Озьы ке но туж трос материал ышемын.

XXI даур. Туннэ нуналъёс. Гердлэн куараез нош ик чузъяське. Сое валаны луэ таӵе учыръя. 2010-тӥ ар, 11-тӥ толсур, кӧснунал. Кабинетам вахтёр жингыртӥз но ивортӥз: музее вуэм адями наукая сотрудникез юа. Потӥ. Азям сылэ арлыдо ӝужыт пиосмурт. Ӟуч кылын вазиськиз: «Мон Кувшинов Леонид Геннадьевич. Дальний Востокын служить кари, пенсие потӥ но Иже берытски. Анае, Кувшинова Роза Андреевна, Гердлэн племянницаез луэ. Со трос материалъёс музее сётъяз. Анае кулэм бере мон кие шыкыс кылиз — отын люкамын Гердлэн материалъёсыз. Мон али квартираям ремонт лэсьтӥсько, со шыкыс люкетэ. Оло, со тӥледлы кулэ луоз?» Телефон номерзэ кельтыса но милемын герӟаськыны мылкыд карыса, воргорон кошкиз.

Трос пол жингыръяй мон солы, ӧтчалляй Кузебай Гердлэн вордӥськем нуналаз но. Ӧз лыкты, шыкысысь кагазъёсты но ӧз возьматы, музее но ӧз вайы. Уг тодћськы, малы.

Та учыр сярысь лад-лад гожъямын Интернетын. Гердлэн шыкысэз сярысь ивор тросэзлэсь сюлэмзэс бугыртӥз. Егитъёс акция дасян борды но басьтӥськизы. Нимысьтыз ӧтёнъёс но гожтӥзы.

Но шыкысысь материалъёс ми кие ӧз вуэ. Туэ 15-тӥ толшоре (Гердлэсь вордӥськем нуналзэ пусъем бере) сайтлэн бамаз выль комментарий кылдӥз. Солэн авторез — Кувшинов Игорь Леонидович. Оло, со Леонид Геннадьевичлэн пиез? Озьыен, оскон кылдэ: кагазъёс ышемын ӧвӧл!

Вераны кулэ: Кузебай Гердлэн нимыз паськыт вӧлмемын ни Удмурт шаермылэн пӧртэм сэрегъёсаз. Туннэ нуналлы асьмелэн вань К. Герд нимо Национальной музеймы, К. Герд нимо гимназимы, солэсь нимзэ нуллӥсь ульчамы, солы сӥзем синпелетмы, К. Герд нимо премимы, радъясько та дано тодосчимылы сӥзем лыдӟонъёс но уно мукет ужрадъёс.

Тросэзлэн адӟемез вань, дыр, Ижысь юртъёслэн борддоръёссы вылысь Гердлэсь суредам тусбуйзэ. Стрит-арт амалэн лэсьтэмын со. Туж сюлмаськытэ монэ та югдур. Борддор вылын пиштэ ялон: «Бесплатная помощь наркозависимым, алкоголезависимым», нош вӧзаз — Гердлэн тусыз… Зэм, удмуртлыксэ гажась пияш Гердлэсь туссэ-буйзэ калык пӧлы озьы вӧлмытыны тырше. Но мукет пала медаз берытскы вылэм тыршемез…

Арлы быдэ 14-тӥ толшоре — Кузебай Гердлэн вордӥськем нуналаз — солэн синпелетэз доры удмуртъёс люкаськыло. Ӝуало сюсьтылъёс, чузъясько Гердлэн кылбуръёсыз, вуэм калыкез гожъямъёсынызы тодмато егит кылбурчиос. Одӥгез таӵе ужрад бере одӥгез тодмо блоггер Интернет-бамаз гожтћз: «Ӝытазе валай: удмурт культура — со Кузебай Гердлы сӥзем синпелет дорысь сюсьтылъёс кадь. Сюсьтыл-кырӟан, сюсьтыл-эктон, сюсьтыл-кыл… Глобализация палась тӧл пельтӥз ке — сюсьтыл кысоз. Тылэз котьку но возьыны кулэ. Нош куке трос сюсьтылъёс ӝуало — туж чебер, кысонтэм со».

Туэ но люкаськылӥмы Гердлэсь вордскемзэ пусйыны. Музейын возьматэмын вал Гердлэн гожтэтэз, фонографез но печатлан машинкаез, улэп дыръяз потэм бичетъёсыз, «Гудыри» газетысь статьяосыз. Нош ик ӝуазы сюсьтылъёс, пиштӥзы яркыт бурдо сяськаос…

Туэ ортчись таӵе ужрадын калык трос ӧй вал. Нош ужрад сярысь газетъёс, сайтъёс пыр ивортӥмы вал, 1 сюрс 500 пала ӧтёнъёс келямы «Вконтакте» пыр, 140 электрон адресъёс но 200 пала смс-гожтэтъёс пыр. Нош вуиз 20 адями! Нимысьтыз тау кареммы потэ республикаысьтымы К. Герд нимо гимназиысь дышетӥсьёслы но дышетскисьёслы. Гимназия музейлэсь кыдёкын ке но интыяськемын, соос ӵем вуыло Гердлы сӥзем синпелет доры. Ӝытазе Герд дортӥ ортчиськод ке, лымыез но сузямын, сяськаос но понэмын, сюсьтылъёс но ӝуатэмын.

Кузебай Гердлэн вордӥсь-кем нуналэзлы кылдытэмын вал нимысьтыз сайт — www.kuzebaj-gerd.ru. Отысь шедьтыны луэ солэсь кылбуръёссэ, улон сюрессэ, библиографизэ, творчествоезлы сӥзем статьяосты.

Эстониын но Гердлэсь нимзэ уг вунэто. Отын арлы быдэ толшоре ортчо удмурт культуралы сӥзем нуналъёс. Радъяло соосты Эстониын дышетскись удмурт студентъёс. Со сяна, пырисько на Удмуртиысь вуэм куноос но. Вуылӥзы ни кырӟасьёс Надежда Уткина, Александр Катков, Кузебай Герд гимназиысь дышетӥсьёс.

2011-тӥ арын 1-тӥ шуркынмонэ нырысьсэ ортчытэмын Гердэз буре ваён акция. Ӵапак та нуналэ 1937-тӥ арын быдтэмын вал Кузебаймы. Куазь зориз ке но, адямиос вуизы. Чузъяськиз Гердлэн берпуметӥ гожтэтэз, лыктэмъёслэн луонлыксы вал Карелиысь Сандормох интыысь (ӵапак отын ыбемын вал Герд) ваем сюез киязы возьыны. 1937-тӥ арын 2 арня куспын со улосын быдтэмын вал 1 сюрс 111 адями. Кагазъёс вылын одӥг лыдпус гинэ пиштӥз-кузёяськиз — 1. Оло, юнме ӧвӧл со? Мукет лыдпус отын луыны ӧй но быгатысал. Со бырем адямиос вал нырысетӥосыз ас удысъёсазы, нырысетӥосыз асьсэлэн калыксы понна. Тунсыко, но буре ваён ужрад ортчиз, кызьы шуо, магической нуналэ — 1.11.11.

Ми, егитъёс, туж оскиськом, 1-тӥ шуркынмонэ-а, 14-тӥ толшоре-а, кыџе ке огшоры нуналэ-а — тӥ вуылоды Гердлы сӥзем синпелет доры. Нимысьтыз ӧтёнтэк, ивор келятэк. Пиналъёсыныды, внукъёсыныды лыктэ, сюсьтыл ӝуатэ, сяська понэ. Малпасько, со секыт ӧвӧл. Нош пиналлэн йыраз Гердэз гажан мылкыд быдэс улонэзлы кылёз.

Ижысь пиналъёслы экскурсия нуыкум, адӟисько: соос Гердлэсь нимзэ ӟеч тодо ни. Но луылэ сыӵеез но: куд-ог нылпиос малпало, Кузебай Герд нимо ульча — со «улица Кая и Герды» шуыса.

Ваньмыз ми бордысь потэ.

Евгения Сундукова.

К. Герд нимо музейысь наукая ужась

Удмурт Дунне
By Удмурт Дунне 4 апреля, 2012 11:54