Тыршемедъя — кисыед

Удмурт Дунне
By Удмурт Дунне 10 апреля, 2012 10:18

Тыршемедъя — кисыед

Уждунэз выль сямен лыдъянлэсь пайдазэ шӧдӥзы ини эмъясьёс но.

1992-тӥ арысен 2008-тӥ арозь бюджет чотын тыршисьёслэн уждунзы лыдъяськиз, тарифъёсъя сетка вылэ пыкъяськыса. 2008-тӥ арлэн пумаз Россиысь Тазалыкез утёнъя но социальной улонэз азинтонъя министерство уждунэз лыдъяны выль амал ӵектӥз. Сое вакчияк НСОТ нимазы (новая система оплаты труда).

2009-тӥ арлэн шорысеныз НСОТ улонэ пыӵаны кутскиз улосъёсын но. Кызьы та реформа быдэсъяське? Со чотын узырмизы-а бюджет удысын тыршисьёс? Та ужпумъёсты ӝутӥзы Удмурт Республикаысь Правительстволэн юртаз люкаськемъёс. Нимысьтыз та ужрадэ вуиз Россиысь Тазалыкез утёнъя но социальной улонэз азинтонъя министерствоысь Уждун тыронъя, ужез утёнъя, социальной партнёрствоя департаментлэн кивалтӥсез Наталия Жарова.

Мар бордын выль системалэн пуштросэз? Азьвыл аръёсы кутӥськись тарифъёсъя системая бюджет чотын тыршисьёслы юнматӥськиз ваньзэ-ӧвӧлзэ 18 разряд. Соосты пуктылӥзы, ужасьлэсь квалификацизэ, быгатонлыкъёссэ, удысэзлэсь макем секыт луэмзэ санэ басьтыса. Таосъя ик юнматӥськиз адямилэн уждунэз но. Зэмзэ вераса, тросэз та амаллы пумит мылкыдын улӥзы: уждун угось огъя сеткая тыриськиз — улослэсь, нимаз удыслэсь аспӧртэмлыкъёссэ лыдэ басьтытэк.

2008-тӥ арлэн пумаз министерство тарифъёслэсь куштӥськыны ӵектӥз. Соя уждунэз лыдъян-чотан радъяськыны кутскиз, котькуд удыслэсь, шонергес луоз, ведомствоослэсь пӧртэмлыкъёссэс санэ басьтыса. Кылсярысь, Дышетонъя но наукая министерство дася дышетӥсьёслэсь уждунзэс лыдъянъя документъёс-амалъёс, Тазалыкез утёнъя министерство — эмъясьёслэсь, Культурая, печатья но ивор вӧлмытонъя министерство — культура юртъёсын, библиотекаосын но музейёсын тыршисьёслэсь. Та амал луонлык кылдытӥз ведомствоослы висъяськись коньдонэз пайдаёгес кутыны, та чотын калыклэсь уждунзэ йылтыны. Котькуд ведомствоын кылдӥзы квалификацияя группаос. Соос эскеро, кудӥз ужась быгатонлыкъёсызъя тупа соиз я таиз группалы, кудбыдӟа луыны кулэ солэн уждунэз.

Вераны кулэ тазэ но: тарифъёсъя системалэн тужгес но бадӟым шекез луиз со — разрядъёслэн пӧртэмлыксы кисы вылын пайдаен ӧз шӧдӥськылы. Соку малы ужасьлы квалификацизэ будэтонэз? Валамон, таӵе мылкыд соку ик шӧдӥськиз огъя уж вылын — калыклы малы пырсконэз, разрядэзъя пуктэм окладзэ со озьы-а, тазьы-а но басьтоз ук.

Ӵапак таӵе мылкыдъёслы пум поныны ик чакламын вал выль система. Но тужгес но валтӥсез — адямилы ужаны мылкыд сётон, уждунзэ тыршемезъя пуктон-юнматон. Выль амалъя уждун куинь люкетлэсь кылдэ: оклад, стимул сётӥсь но компенсацияя люкетъёс. Нялтас вераса, ведомствоос азе курон пуктэмын: стимул сётӥсь люкет уждунъя фондлэсь самой ӧжытсэ 30 процентсэ басьтыны кулэ.

Туэысен НСОТ система кунамы рос-прос ужаны кулэ ини. Та дырлы НСОТ быдэсъяське 71 улосын, 12-аз 50 процентлы гинэ пыӵа ай. Удмурт шаерын таӵе выльдӥськон вамышен-вамышен пыӵаз: нырысь быдэсъяськизы выль системалэн куд-ог куронъёсыз гинэ, нош 2010-тӥ арын шаерысьтымы вань бюджетникъёс уждунзэс НСОТ-ъя басьтыны кутскизы. Солэн быдӟалаез 32-34 процентлы йылӥз.

— Выль системаез пы-ӵатыны кутскеммы бере бюджетникъёс кышкатскизы: табере уждунзы кулэсмоз, — вераз Наталия Жарова. — Но НСОТ-лэн валтӥсь пуштросэз — бюджет коньдонэз ӟечгес кутон, ужась муртлы тросгес уксё поттыны луонлыкъёс кылдытон но уждунзэ йылтон. Емышъёс син азьын ни. Кылсярысь, странамыя тазалыкез утён удысын тыршисьёслэн уждунзы берло дыре 31 процентлы йылӥз, дышетон удысын — 46 процентлы, культураын — 45 процентлы. Со вие ик тросгес полномочиос висъяськыны кутскизы кивалтӥсьёслы. Тросэзлэн йыразы соку ик юан кылдӥз: озьыен, кивалтӥсьёс, штатэз пичиятыса, коньдонэз шыръяны кутскозы. Но таӵеез уз луы, угось штатлэн быдӟалаез меӵак герӟаськемын кун заказэн. Со уг кулэсмы ке, кивалтӥсь ас мылкыдызъя штатэз кулэстыны уг быгаты.

Выльдӥськонъёсты пы-

ӵатыку, ӵемысь валамтэос кылдо. Та ласянь улосъёслы юрттон понна Тазалыкез утёнъя но социальной улонэз азинтонъя министерствоысь специалистъёс пӧртэм улосъёсы вуыло. Палэнэ ӧз кыльы Удмуртия но.

— Уждунэз выль сямен лыдъян-чотанын ми санэ басьтӥмы ужасьлэсь кун заказэз макем ӟеч быдэстэмзэ, — веранзэ мытӥз Удмурт Республикаысь тазалыкез утёнъя министрлэн воштӥсез Владимир Гаврилов. — Эмъясьлы тросгес уксё поттыны юрттӥсь луонлыкъёсты тупен-тупен чакламы. Кылсярысь, операциез ӟеч лэсьтэм, висисьсэ ӝог йӧнатэм, пациентъёсын курламтэ, йӧнатӥсь ужрадъёсты дыраз но валаса быдэсъям специалистъёс бадӟымгес уждун басьто — стимул сётӥсь но компенсацияя фондысь. Тазьы ужамзы кисызы вылын шӧдӥськиз ни: 2008-тӥ арен ӵошатыса, миым врачъёслэн уждунзы 21 сюрсозь будӥз, сюбег специалистъёслэн — 11 сюрс 200 манетозь, эмъясь сузэръёслэн — 6 сюрс 600 манетозь. Тросгес коньдон басьтыны кутскизы ӝог юрттэт сётӥсь станциосын ужасьёс, интыосъя юнматэм першалъёс.

Н. Жарова ӟечен пусйиз шаерысьтымы Тазалыкез утёнъя министерстволэсь НСОТ-эз пы-ӵатон ласянь тыршемзэ. Но юанъёс кылдӥзы эмъясьёслэн уйин ужамзы понна тыриськись уксё пумысен — таиз но висъяське стимул сётӥсь фондысь. Кӧня уксё тыроно уйин тыршем эмъясьлы? Н. Жарова пусйиз: та ватсанлэсь быдӟалазэ юнматэ федерал центр.

Дышетонъя но наукая министр Андрей Кузнецов ивортэмъя, дышетон удыс капчиен выжиз выль система вылэ. Уждунъя огъя фондысь 25 процентэз чакламын дышетӥсьёслы стимул сётӥсь ватсанъёслы. Кылсярысь, дано нимен пусъемъёс, дышетон удысын бадӟым стажен специалистъёс, класс нуон но ужрадъёс ортчытон борды басьтӥськемъёс окладзы вќзы ватсаса коньдон басьто.

— Та амал — туала, — шуиз министр. — Дышетӥсьёс табере тодо: быгатонлыкъёссэс, тодон-валанзэс ӧз будэтэ, дышетонлы саклык ичи висъязы ке, уждунзы но ушъямон уз луы. НСОТ-лэн емышез син азьын — дышетон удысын тыршисьёслэн уждунзы 34 процентлы йылӥз.

Культура удысын но выль системаез пыӵатон чакламъя радъяськиз. Культурая, печатья но ивор вӧлмытонъя министрлэн воштӥсез Наиля Собина ивортэмъя, тужгес но секытэн сётскиз музейёсын, библиотекаосын тыршисьёслэсь уждунзэс лыдъян-юнматон. Кызьы дунъялод соослэсь удыссылы макем бадӟым саклык висъямзэс? Кӧня адӟытон-ужрад ортчытэмзыя, калыклы кӧня книга сётэмзыя? Ярам, та ласянь огъя малпанэ вуыны кылдӥз. Культура удысын тыршисьёслэн уждунзы, 2008-тӥ арен ӵошатыса, 32 процентлы йылӥз.

Россиын бюджет удысын ваньзэ-ӧвӧлзэ 14 миллион адями тырше. Удмурт шаерын — 180 сюрс мурт. Соослэсь уждунзэс выль сямен лыдъян-чотан республикаямы рос-прос радъямын ни. Пусйыны кулэ, уж таин гинэ уз йылпумъяськы. Бюджетникъёслэсь уждунзэс йылтон арысь аре пайдаёгес радъяськоз.

Елена Никитина.

Удмурт Дунне
By Удмурт Дунне 10 апреля, 2012 10:18