Сизьым полэс адскымон

Удмурт Дунне
By Удмурт Дунне 13 апреля, 2012 09:56

Элькунамы потӥсь «Удмуртская правда» газет сизьыметӥзэ бырйиз «Арлэсь адямиоссэ». Сыӵе малпан кылдӥз вал 2004-тӥ арын: лыдӟисьёс быръемъя тужгес усто кивалтӥсьёсты но пӧртэм удысъёсын тыршисьёсты газетчиос, нимысьтыз данъяса, гожто, яркыт журналын печатлало.

Та вакыт ӵоже ваньмыз сямен гожъямын ни кадь, соин редакция малпаськылӥз проектэз пытсан сярысь. Но шуныт кылъёс мултэс уг луо — адямиос асьсэос жингыръяны кутскизы, данъяно нимтулъёсты ӵектыса. Озьы туэ потӥз 2010-тӥ-2011-тӥ аръёсы тужгес висъяськем адямиос сярысь очеркъёсын журнал. Пӧлазы — Вавож ёросысь Мичурин нимо гурт предприятилэн кивалтӥсез Валентин Калинин.

Презентация дыръя Президент Александр Волков со сярысь нимысьтыз вераз, ваньзэс адӟем карыны куриз, председательлы тау кариз.

— Валентин Егорович шаерамы гинэ ӧвӧл, быдэс Россиын паймытъя, — вераз со, заллы вазиськыса. — Малпаськоды, 75 аресказ со няньлы ёрмыса, ватсаса копейка поттон понна ужа? Уг. Тырше, малы ке шуоно ужатэк улэмез уг луы: ӵукна мукетъёслэсь вазьгес султэ, ӝыт бергес выдэ. Со туннэ но малпаське бадӟымгес привесъёс басьтон, тросгес ю-нянь октон сярысь. Колхозаз ужаны мыдкыд карисьёс черодэ султо, адямиос городынлэсь трос уждун басьто. Калинин шоры учкыса, мукетъёсыз но золгес ужало. Туннэ нуналлы Вавож ёрос тужгес устоез луэ — совето вакытъёсын ӵошатыса, 2,5 поллы тросгес йӧл кыскыны кутскизы. Сыӵе адямиослы дипломъёс гинэ ӧвӧл, орденъёс сётъяно!

Ваньмыз-ӧвӧлэз пусъемын 50 мурт, пӧлазы тросгес предпринимательёс но кивалтӥсьёс. Соин уката тунсыко тодматыны Дэри ёросысь Пыӵанка гуртысь Инесса Степанова сярысь — со ас мылкыдызъя ёросысь калыкез лулчеберетэн тодматэ, Пушкинлы сӥзем праздникъёс радъя. Та ужрадын но Инесса Павловна кылбураса тулыс мылкыд пыӵатӥз.

Ольга Зорина.

Удмурт Дунне
By Удмурт Дунне 13 апреля, 2012 09:56