Россимы асьмелэн одӥг

Удмурт Дунне
By Удмурт Дунне 13 апреля, 2012 09:53

Россимы асьмелэн одӥг

В. Путин.

Россиысь Правительстволэн Тӧроез Владимир Путин та нуналъёсы вазиськиз Кун Думаысь депутатъёслы — йылпумъянъёс лэсьтӥз Россиысь Правительстволэн кылем арын ужамезлы. Пумиськон ортчиз таӵе ӧтён улсын: «Россимы асьмелэн одӥг. Сое азинтон, туала улонъя тупатон — странаысьтымы политика кужымъёс понна валтӥсь ужъёс».

Кӧня ке арня ортчыса, 7-тӥ мае, В. Путин куинетӥзэ Президентэ пуксёз. Озьыен, премьер-министр чотын со берпуметӥзэ вазиськиз Кун Думаысь депутатъёслы. Ньыль час кыстӥськись ужрадын ӝутэмын вал пӧртэм ужпумъёс.

Премьер-министр вазиськонзэ мытӥз Россилэн кылем арын басьтэм вормонъёсыз пумысен. Кылсярысь, Россиысь калыклэн лыдыз, доходъёсыз йылэмын. Пенсиос, военнойёслэн уждунзы будэ, нош ужтэк пукисьёслэн лыдзы но инфляция — кулэсме. Таӵеезлы синмаськысалзы Европаын улӥсьёс но. Шуом, Испаниын ужтэк пукисьёслэн лыдзы вань калыксы пӧлысь 25 процентсэ (!) басьтэ — котькуд ньылетӥез дораз, ужлы ёрмыса, пуке. Нош Россиын кылем ар ӵоже безработица 7,8 процентысен 6,1 процентозь кулэсмиз.

Ӝоген Владимир Владимирович нош Президент луоз. Соин ик вазиськоназ пусйытэк ӧз кельты валтћсь ужпумъёс сярысь. Нырысь ик, басьтӥськоно калыкмес утён но солэсь лыдзэ уноятон борды. Трос нылпиё семья кылдытыны луонлыкъёсты паськытатоно. Кыкетӥез: азинтоно Россиез — тужгес но федерал центрлэсь кыдёке интыяськем улосъёсты — Сибирез но Дальний Востокез. Куинетӥез: Россиын улӥсьёслы ӵектоно-сётоно трос коньдоно но тунсыко уж. Ньылетӥез: экономикаез туала сямен радъяно, чурыт конкуренциын но азинскись кароно. Витетӥез: Россилэсь дуннеын данзэ ӝутоно. Та ласянь шӧдскымон юрттэт сётыны быгатысалзы Таможня союзэ пырись кунъёс, кылсярысь, Белоруссия, Казахстан. Асьмелы матысь куинь ар куспын дуннеысь тужгес но кужмо вить экономикаос пӧлы пыроно.

Кенешын В. Путинлы юанъёс сётъязы. «КПРФ» фракция тунсыкъяськиз: оло, пе, одӥг адямилы Президентэ трос пол пуксьыны луонлыкъёс сётоно ӧвӧл? В. Путин ганяк вазиз: асьмеос малпаськыны быгатӥсь, улонэз адӟем адямиос — та ужпум ласянь огъя малпанэ вуомы ай.

Матысь куать ар ӵоже В. Путин Кун Думалы вазиськылоз ни Президент чотын. Но та учырын депутатъёслэн луонлыксы уз луы ни юанъёсынызы вазиськыны — таӵе курон пуктэмын законын. Озьыен, В. Путинлы соос берпуметӥзэ вазиськизы чепыллясь юанъёсынызы. Жаляса верано, соослэн пуштроссы сокем мур ӧй вал…

Елена Никитина.

Удмурт Дунне
By Удмурт Дунне 13 апреля, 2012 09:53