Малы можгаос ӵужонлэсь уг кышкало?

Удмурт Дунне
By Удмурт Дунне 24 апреля, 2012 12:33

Кылем арняе Удмуртиын ужаз Кун Думаысь депутат Николай Аброськин. Со калыкен пумиськылӥз Ижын, Можгалан но Сарапулын.

Нялтас вераса, Николай Павловичлы оскемын республикаысьтымы городъёсын улӥсьёслэсь шугъяськонъёссэс но ужпумъёссэс быдэсъяны. Районъёсысь калыкен ужаны кулэ мукетыз депутат — Бекхан Агаев.

Кун Думае Удмуртия ласянь быръем депутатлы шаермы котыр ласянь тунсыко потэ. Николай Аброськин выль синмын учке калык шоры, соку ик адӟе, макем висъясько куспазы городъёсмы.

Тани Можгалы депутат паймиз но со дыре ик синмаськиз. Ульчаосын лымы шуназ гинэ — можгаос басьтӥськизы утялскон борды. Кӧня ке нунал куспын город сузямын, жуг-жаг бичамын ни. Нош Ижын улӥсьёс ӵужон кутыны уг дырто, шуэ депутат, возьмало, кин ке ӝуткалоз соосты яке воксё но урамъёссэс утялтыса сётоз шуыса.

Можгалан Николай Аброськин пыриськиз город Думалэн 2-тӥ сессияз, тодматскиз городысь кивалтӥсьёсын. Синмаськиз «Красная звезда» фабрикалы. Татын ужзы дугдылытэк мынэ. Калык 2-3 сменаен тырше. Уката шумпотымонэз — поттэм продукцизы складын уг кылльы.

Можгаын берло аръёсы йыло нылпиос — озьы город вордскисьёслэн лыдзыя республикаын кыкетӥ интыын мынэ. Таин валче городын шугъяськонъёс кылдо, нылпи поликлиникаын инты ёркыт луэмен.

— Поликлиникаын мыным чик ӧз кельшы, — шуэ депутат Аброськин, — пырон дорын ик коляскаос кельтэмын, мукет инты талы чакламын ӧвӧл, шӧдске. Больницаын интыез туж ӝикыт — «Огъя Россия» партилэсь «Улонлэн ӟечлыкез. Тазалык» проектсэ быдэсъяку, поликлиникалы но саклык мед сюрысал.

Сарапулын улӥсьёс депутат доры пӧртэм юанъёсын вуизы. 5 муртлэсь шугъяськонзэ сэрттыны-пертчыны быгатӥзы пумиськон дыръя ик. Соосты быдэстыны быгатысалзы интыысь чиновникъёс ик, но оло калык пумозяз уг вала кинлы вазиськыны, оло интыысь кивалтӥсьёс аналско, пусъе депутат.

Городысь огез сюлмаськон герӟаськемын чугун сюресэн. Сарапул пыр ортчись ньыль поезд уг дугдылы татысь станцие. Соин городын улӥсьёслы поездэ пуксён понна бускель станцие мыноно луэ. Уг луы шат, азьвыл аръёсы сямен, радъяны ог кык минутъем дугдылон. Тазэ ужпумез сэрттон-пертчон депутатлы быдэстыны оскемын.

Ижын пумиськонъёс но пайдатэк ӧз ортче. Аброськин доры вазиськизы армиез пырпотэм ветеранъёс. Службаын дыръязы пиосъёсты ысъяллям радиация вӧлмем интыосты утялтыны. Аръёс ортчыса, таӵе «ужамзы» воргоронъёслэн тазалыксы вылын шӧдӥськиз — Удмуртиын сыӵеос 300 адями. Нош льготаос соослы чакламтэ. Та пумысен но депутатлы сюлмаськоно.

-Ӝоген Россиын ортчоз Президентлэн инаугурациез. Кылдоз выль Правительство. Кивалтон удысэ вуозы выль адямиос. Оскисько, соосын быгато огкыл шедьтыны, таин валче республикалы шӧдскымон пайда вайыны пӧрмыто, — оскытӥз Николай Аброськин.

Елена Скворцова.

Удмурт Дунне
By Удмурт Дунне 24 апреля, 2012 12:33
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<