Куное — дэрие

Удмурт Дунне
By Удмурт Дунне 13 апреля, 2012 09:55

Куное — дэрие

Гурт шудонъёслы дасяськон мынэ.

Куинь толэзь пала ортчыса, 4-тӥ июле, шаерысьтымы гурт спортсменъёс Дэри черкогуртэ люкаськозы. Али отын огыр-бугыр: лэсьтӥськон ужъёс мытэмын, культурая юртын ужасьёс куно пумитаны дасясько. 21-тӥ Гурт шудонъёслы дасяськонэз эскерыны вуылӥз Удмуртилэн Президентэз Александр Волков.

Дэриын спортсменъёсыз пумитаны тыро-пыдо спортзалзы ӧвӧл. Соин ик кылем арын выль стадион пуктыны кутскемын. Куазь кӧсгес кариськиз ке, бызьылон сюресъёс лэсьтон борды басьтӥськозы. Стадион котырысь административной юрт пуксе ни липет улэ. Спорт-школа кемалась выльдэмез кулэ каре: борддоръёс куашкан калэ вуэмын, выж ларганы кутскемын, липет ӟиза. Озьы ке но та вакытэ отын мугорзэс кыдато пиналъёс но, арлыдоос но. Спортшколалэн кивалтӥсез Владимир Байков ивортэмъя, нуналлы быдэ пӧртэм секциосы 250 пала адямиос ветло. Гурт шудонъёс дыръя ӵапак отын кужымзэс эскерозы волейболистъёс. Александр Волков спортзалэз выльдонлы 3 миллион манет висъяны чаклаз. Залысь омырез чылкытатон вылысь вентиляция пуктоно на, шуиз.

Дэри шор ёзо школа но 2 номеро нылпи сад выльдэм-тупатъямез кулэ каро. Угось ӵапак тросэз спортсменъёс улыны интыямын луозы школае.

Вань интыосты эскеремез бере Удмуртилэн Президентэз куриз: 4-тӥ июльлы Дэри черкогуртын ворекъяны кулэ туала куронъёслы тупась стадион. Спортзалэз, школаез но нылпи садэз выльдонлы, черкогуртлэсь туссэ чеберъянлы шаермылэн бюджетысьтыз 10 миллион манет пала коньдон висъямын луоз.

Валентина Емельянова.

Удмурт Дунне
By Удмурт Дунне 13 апреля, 2012 09:55