Котыр сюрес вӧё?

Удмурт Дунне
By Удмурт Дунне Апрель 13, 2012 09:50

Чупчи, Кильмезь, Вало шуръёс котырын улӥсьёс тулыс тудвулэсь кышкало.

Быдэс шаерез эскероно ке, бадӟым тудву вуэмын ӧвӧл на. Йӧ вырӟон вакытлы шаерысьтымы куд-ог ёросъёсын пуштытъян ужъёс ортчытыны чакламын.

Кызьы ивортӥз Россиысь МЧС-лэн Удмурт Республикая валтӥсь управлениысьтыз пресс-службаен кивалтӥсь Вероника Митрофанова, та вакытэ бадӟым шуръёсысь йӧ вырӟымтэ на. Ву шуак медаз ӝутскы шуыса, ӵыпетъёсысь вузэ пичиен-пичиен лэзё.

Тулыс тудву бадœым сюлмаськон вае Кез ёросысь Поломское черкогуртын улӥсьёслы. Та вакытэ 422 адями Удмуртилэсь чылкак люкемын, шуыны луоз. Сюресъёс вань дыръя ёрос центре 33 иськеме ветло: Чупчи шур вамен, Полом черкогурт пыр. Нош та вие соос куинь поллы кузьгес сюресэз ортчо, куинь ёрос пыр Кез каргуртэ шедё.

Поломское муниципал кылдытэтэ 6 гурт пыре. Гурт администрациысь валтӥсь специалист Ирина Волкова верамъя, шуг-секытъёс кылдо Чупчи шур вамен лэсьтэм выж бордысь. 2006-тӥ арысен кутскыса, «Удмуртавтодорын» ужасьёс сое тулыслы быдэ сэртто, нош выльысь интыяз пукто июнь толэзе гинэ. Туэ но 28-тӥ мартэ выжзэс басьтӥллям ни. Куд-ог дыръя туж кулэ ужпумъёсын гурт администрациязы вазиськоно луо ке, Поломское черкогуртын улӥсьёс Чупчи шур вамен, пыжен уяса, потало.

Тулыс тудву Поломское черкогуртын улӥсьёсты соин гинэ уг курадӟыты. Эгра ёросысь Зура черкогуртэ мынон сюрессы Кез ласянь гинэ сузяське: Эгра ёросысь Туга гурт быремен, Эграысь сюрес утялтӥсьёс табере отчыозь уг вуыло. Шуг-секытысь потон вылысь Кез ёрос администрациысь кивалтӥсьёс Эгра администрациен огкыл гожтӥзы. Табере Поломскоеын улӥсьёс доры ӝог юрттэт сётыны вуыны кулэ Эграысь тылпу кысӥсьёс но эмъясьёс.

Валентина Емельянова.

Удмурт Дунне
By Удмурт Дунне Апрель 13, 2012 09:50
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<