Кияр быгыльскиз!

Удмурт Дунне
By Удмурт Дунне 10 апреля, 2012 10:54

Та нуналъёсы Ижысь «Грифон» галереяын усьтӥськиз егит удмурт суредаськисьлэн, Удмурт кун университетысь искусствоосъя но дизайнъя институтын дышетскисьлэн Евгений Бикузинлэн адӟытонэз. Кыстӥськоз со 17-тӥ оштолэзёзь.

 

Суредаськон — спорт кадь ик

Алнаш ёросысь Азамат гуртын будэм пияшлэн ужъёсаз бадӟым инты басьто пейзажъёс. Творчествояз озьы ик пумиськыло живопись, графика, старт-арт амалъёсъя быдэстэмъёсыз но.

Женя тодаз вае таӵе учырез: 6-тӥ классын суреданы косӥллям кельшоно удыссэс-ужзэс. Соку пияш ассэ суредаськисен син азяз пуктэм. Шуак кылдэм мылкыдыз юнме вылымтэ — школа бере вамыштӥз УдГУ-ысь искусствоосъя но дизайнъя институтэ. Ай дышетскыны пырон азяз тодматскиз Удмуртиысь калык суредасен Семён Виноградовен. Солэн дэмламезъя Женя суредасьёслэн курсъёсазы ветлыны кутскиз. Виноградовлэн верамез али но пель сьӧраз на: «Киярез мерттӥд ке, котькӧня ву кисьта, емышсэ со вазьгес уз сёты». Озьыен, ваньмызлэн аслаз дырыз.

Берло дыре Бикузинлы вазисько, портрет лэсьтыны курыса. Аслыз тужгес но яра тӧдьы бумага вылын сьӧд карандашен суредаськыны. Куддыр соин вырыны мылкыдыз пуксьылэ ке но, карандашез кутоно луэ ик. Суредаськон — спорт кадь ик: весь дасяськемез кулэ каре.

 

«Чипчирган» — тубат

Суредаськонэн ӵош Же­ня крезьгурен но тунсыкъяськыны кутскиз. Нырысь басьтӥськиз арган борды. Ӝоген кияз вуиз агаезлэн гитараез. Но таин гинэ крезьгур усьтонъёсыз ӧз йылпумъяське. Удмурт кун университетэ пыремез бере «Чипчирган» ансамбле вуиз. Отын удмурт эктон гуръёсты арганэн векчи кыскаса шудыны, кубызлэсь сиоссэ бичаны дышиз.

«Чипчирган» сярысь ке верано, пияшлы со туж кельшем вашкала удмурт крезьгуръёсты утеменыз.

— Быгатӥсь адямилы «Чипчирган» тубат выллем луэ, юрттэ будыны но азинскыны, — шуэ Женя. — Со удмурт егитъёслэн аспӧртэмлыко школазы, отысь пото зэмос азьветлӥсьёс.

Бикузин пыриськиз Петрозаводскын ортчем калыккуспо фестивале. Отын со, арганзэ векчи кыскаса, шудӥз. Та бӧрсьы «Чипчирган» вуылӥз Польшае.

— Соку мон нырысьсэ кунгож сьӧры потай. Мыным отын туж кельшиз. Пумитазы умой. Нырысь малпазы: ми — ӟучъёс, туж паймизы удмуртъёс шуыса тодэмзы бере. Нош 2011-тӥ арын Эстоние вуылыны удалтӥз, — шуэ усточи.

 

Шунды уг пуксьы на

Ижысь удмурт позыръяськонъёсты егит кырӟасьёс шулдыртыло. Соос пӧлын «Аmiso Wott» группа но. Женя соку «Шумпотон» ансамбльын акустика гитараен шудэ вал. Нош «Аmiso Wott»-лэн ӵапак гитараез вылымтэ. Озьы Бикузин та группалэн оглюкетэз луиз.

— Мынам, школаын дышетскыкум ик, льӧль малпанэ вал — кылдытоно рок-группа. Малпанэ быдэсмиз, шуыны луоз. Ми быдэсъяськом мылкыдэз ӝутӥсь, серемес кырӟанъёсты.

Азьланезлы планъёсыз сярысь пияш вераськыны уг яраты. Озьы ке но мылкыдъёссэ усьтӥз ик:

— УдГУ-эз йылпумъяса, дышетсконме азьланьтэме потэ Европаын. Кылсярысь, Таллинысь художественной академиын. Нош туэ гужем пуэз чильпан бордын выро.

Бикузинлы «Грифон» галереяын адӟытон ортчытыны ӵектӥз Александр Старков. Женялэн та нырысетӥ выставкаез. Ужъёсcэ учкыса, валано: пияш «будэм». Синме йӧтэ на соиз но: тросаз суредъёсаз возьматэмын шунды пуксён вакыт. Женялэн верамезъя, со солэн тужгес но яратоно дырыз. Озьы ик синйылтоно, макем Бикузин вордӥськем палъёссэ яратэ!

Адӟытонэз усьтонэ трос адями люкаськиз. Соосты шулдыртӥзы «Чипчирган» ансамбль, «Гаруда» группа, Дарали Лели dj-сетэныз. Люкаськем калык азьын Женя кык суред лэсьтӥз.

Маша Золотарёва.

Удмурт Дунне
By Удмурт Дунне 10 апреля, 2012 10:54