Йӧ принцесса

Удмурт Дунне
By Удмурт Дунне 3 апреля, 2012 13:45

Йӧ принцесса

А. Волков дорын: Елизавета Туктамышева анаеныз но тренереныз.

Кылем арня пумын Александр Волков пумиськылžз Елизавета Туктамышеваен — Австриысь Инсбрукын ортчем егитъёслэн нырысетӥ тол Олимпиадаязы зарни медаль басьтэм фигуристкаен.

Та пумиськонэ Лиза лыктэм анаеныз Елена Сергеевнаен, тренереныз Светлана Веретенниковаен. Конькиен нискылась спортсменка Глазовын вордскемын, но берло дыре отчы туж шер вуылэ. Та вакытэ быдэс семьяенызы Санкт-Петербургын уло. Нылаш мугорзэ кыдатэ Россиысь одӥгез кужмоез тренер Алексей Мишин дорын. Коньки вылын нырысетӥ вамышъёссэ лэсьтыны дышетскемын Глазовысь йӧ дворецын.

— Нылмы пичи дыръяз ик туж шаплы будӥз, 4 аресказ 7 пол турникын ӝуткаськыны быгатэ вал, — шуэ Елена Сергеевна. — Лизаез кытчы карыны ик паймылӥмы. Мынам потэ вал эктонъя кружоке гожтэме, но 7 арес тырмытэк, отчы ӧз кутэ. Соку атаез сое спортъя секцие гожтӥз. Талы мон туж пумит вал, тодӥсько: спортын даур вакчи. Ярам, пумиськыны кылдӥз усто тренерен — Светлана Михайловнаен. Озьы 4 но ӝыны аресказ нырысьсэ коньки вылэ султӥз.

Та вакытэ Глазовын 3 тренер ужа, 150 пала нылпиос коньки вылын нискыланы дышетско. Соос пӧлын ик пичи Лиза но кыдаз.

— Эшъёсызлэсь ӧз висъяськылы ке но, нискыланы кутскемез бере синйылтӥ: коньки вылын сылыны быгатонлыкъёсыз Инмарен сётэмын, сыӵе нылпиос туж шер пумиськыло, — вера тренер Светлана Веретенникова. Ог-огмес туж ӝог валамы, котькуд тренировкае капчи мылкыдын ветлӥмы. 9 аресаз Россиын но сое синйылтӥзы, вылӥегес ӝутскон понна Россиысь дано тренер Алексей Мишин доры, юрттэт курыса, вазиськимы. Кӧня ке ар ӵоже толэзьлы быдэ командировкаосы Санкт-Петербурге ветлылӥмы. Трос дырмы сюрес вылэ бырылӥз, йӧнала дышетскыса но, мугормес кыдатыса но ӧм вуттылэ. Соку ини ваньмы Санкт-Петербурге выжоно кариськимы.

2014-тӥ арын Сочиын ортчоно Олимпиадае Удмуртиысь фигуристкалэн шедёнэзлы быдэс Россия оске. Та нуналъёсы нылаш сюлмаськыса учке дуннелэсь чемпионатсэ. Жаляса верано, сыӵе ӵошатсконъёсы 16 аресысен гинэ куто. Нылашлэн быгатонлыкъёсызлы оске Удмуртилэн Президентэз Александр Волков но.

— Берло дыре Россиысь спортсменъёс туж бездыт адско Олимпиадаосын, — шуиз Александр Волков. — Ялан маке валэктыны выро: куассы уг нуы, сюрес гылыт, йӧ укыр чурыт я кунгож сьӧрысь тренер уг кельшы. Азьвыл аръёсы трос ӧз ӝожтӥськылэ, котькуд стартын медаль басьтылӥзы. Тодӥсько, Лиза, эшъёсыдлэсь вазьгес кыданы кылдӥз, оскисько, бадӟым спортсменъёс пӧлын но вормонъёс басьтод шуыса.

10-тӥ классын дышетскись нылаш парта сьӧрын пукыса ик уг вутты. Лумбытъёсын йӧ вылын нискыла ке но, дышетсконаз «быжъёсыз» ӧвӧл. Анаез но юрттэ, со дышетӥсь, алгебра но геометрия предметъёсыз нуэ. Бадӟым будыса, Лиза луыны малпа спортъя психолог.

— Эшъёсы но мылкыдме ӝуто, — шуэ Елизавета Туктамышева. — Бертонме тодыса, быдэс классэн вокзалэ лыктӥллям. Ваньмыныз ӟыгыръяськи, жаляса верано, вордскем палъёсам арнялы сяна бертылыны уг быгатӥськы. Нош ик йӧ вылэ потоно, выль сезонлы дасяськоно.

Валентина Емельянова.

Удмурт Дунне
By Удмурт Дунне 3 апреля, 2012 13:45