Интыысь вырӟон

Удмурт Дунне
By Удмурт Дунне 10 апреля, 2012 11:02

Интыысь вырӟон

Кужымзэс эскеро следж-хоккеен шудӥсьёс.

20 ар талэсь азьло Удмуртиын кылдытэмын ампутантъёслэн футболъя клубзы. Шаерысьтымы инвалидъёсты люкан борды соку басьтӥськиз футболъя калыккуспо классъем спортъя мастер Виктор Кузнецов.

Аръёс ортчыса, инвалид спортсменъёс азьлань вамыштӥзы. Туннэ нуналлы шаерысьтымы 2 сюрс 613 инвалид эшъяське спортэн. Кылем ар ӵоже 16 пол Россиысь, 6 пол дуннеысь ӵошатсконъёсы пыриськизы. Россилэн сборнояз 19 мурт кутэмын.

Футбол клубез кылдытыкуз, Виктор Кузнецов ӧз но малпаськылы Паралимпиадае пыриськон сярысь. Озьы ке но шаерысьтымы туп ӵыжасьёс дуннелэн чемпионатозяз вуизы. Со дырысен трос аръёс ортчизы, табере шаерысьтымы инвалид спортсменъёс туп ӵыжам сяна, куасэн бызьыло, биатлонъя ӵошатско, великен ворттыло. Спортсменъёслы кыкетӥ оскон пыӵатӥз, шуыны луоз, Виктор Кузнецов. Та удысэз ӝутыны юрттэмез понна кемалась ик ӧвӧл сое бырйизы шаерысьтымы Параспортъя федерациен кивалтӥсе.

Та федерацие вазиськисьёсты Виктор Николаевич аслэсьтыз пиналъёссэ кадь пумита. Туннэ кадь ик тодаз возе Алнаш ёросысь Блатгуртысь Владислав Лекомцевлэсь анаеныз дораз лыктэмзэ. Гуртысь егит пияш синъёссэ ик ӝутыны дӥсьтымтэ соку. Табере со куасэн бызьылонъя но биатлонъя ӵошатсконъёсы пыриське, быдэс дуннеез котыръя. Мукет инвалидъёс но солэсь адӟем мед карысалзы.

Виктор Николаевич шумпотэ, ог-огзылэсь адӟем карыса, гуртъёсысь мукет инвалидъёс но мугорзэс кыдатыны кутско шуыса. Тужгес кужмоосызлы удалтэ Россилэн чемпионатаз пыриськыны. Кемалась ик ӧвӧл хоккеен шудӥсь инвалидъёс Россиысь азвесь медален бертӥзы. Бадӟым ӵошатсконысь вуэмзы бере трос шутэтскыны ӧз кылды, нош ик сюрес вылэ дасясько. Висёнъёссы вылэ ӝожтӥськыны дырзы уг кыльы ни. Араз 9 толэзь ӵоже мугорзэс кыдато. Та спортсменъёс азе туэ бадӟым ужпум пуктэмын. Та дырозь Россиысь инвалид спортсменъёс 5 амалъя гинэ ӵошатсконъёсы пыриськылӥзы, нош 2014-тӥ арын Сочиын ортчоно Паралимпиадалы бадӟымгес команда люканы дасясько. Следж-хоккеен шудӥсьёс но кужымзэс эскерыны, медаль понна нюръяськыны кулэ.

Россиысь следж-хоккеен шудӥсьёслэн сборноязы Удмуртиысь 7 мурт кутэмын: Можга ёросысь Евгений Петров, Иван Кузнецов но Руслан Тучин, Дэри ёросысь Андрей Двинянинов но Алексей Лысов, Сюмсиысь Максим Кузьминых, Кизнерысь Сергей Пудов. Соос шоры учкыса, гуртъёсысь мукет инвалидъёс но интыысьтызы вырӟыны кутскизы.

— Паралимпиадаозь дасяськыны дыр но, луонлык но тырмыт, — веранзэ азьланьтэ Виктор Кузнецов. — Умоезлы осконзэс, чиданлыксэс гинэ медаз ыштэ. Ярано коть, милесьтым сюлмаськонъёсмес шаерысьтымы кивалтӥсьёс кыло. Та вакытэ вань мылкыд карисьёс хоккеен шудыны быгато, инвентарьмы тырмыт. Азьвыл аръёсы шуг-секытъёс кылдылӥзы йӧ шедьтон ласянь. Кылем арысен югдурмы тупатскиз, нуналлы быдэ 3 час «Чекерил» спорткомплексын шудӥськом. Выль пуктӥськись липетэн катокез лэсьтӥсьёс но инвалидъёслэсь куронзэс лыдэ басьтӥзы.

— Та командаын кыкетӥ арзэ гинэ шудӥсько, — шуэ Андрей Двинянинов, — эшъёсы туж кельшо. Татчы вуыса, выльысь вордскем кадь потӥ. Нырысь нуналъёсаз трос усьылӥ ке но, татчы вуэмме ӧй жаля. Россиысь чемпионатын сяна, Европаысь инвалид спортсменъёс пӧлын но кужыммес эскеримы ни. Кунгож сьӧрысь ӵошатсконъёсын вормон понна эшшо золгес дасяськоно. Азьланяз но кун ласянь юрттӥсьёс луизы ке, ваньмыз вӧй вылтӥ кадь ортчыны кулэ.

Хоккеен зэмос воргоронъёс шудо шуо ке но, Виктор Николаевичлэн сюлмыз биниськемын футбол борды. Та дырозь футболэн шудӥсь инвалидъёс понна Паралимпиадае сюрес пытсамын вал. Калыккуспо паралимпийской комитет кенешемъя кылем ар пумын таӵе пыкъетэз басьтӥзы. 2016-тӥ арын Рио-де-Жанейроын ортчоно Паралимпиадае пыриськозы дуннеысь футболэн шудӥсьёс. В. Кузнецов оске, Удмуртиысь инвалидъёс отчы одно ик шедёзы шуыса.

Валентина Емельянова.

Удмурт Дунне
By Удмурт Дунне 10 апреля, 2012 11:02