Дуннеез утёз крезьгур!

Удмурт Дунне
By Удмурт Дунне 27 апреля, 2012 12:42

Дуннеез утёз крезьгур!

А. Фомин.

Та нуналъёсы шаерамы шукыръяське 55-тӥез Чайковский нимо фестиваль. Ижысь но Воткаысь концерт залъёсын чузъяське вылӥ крезьгур. Учкисьёс адӟизы ни Мос-кваысь классической балетъя кун академической театрлэсь «Сотворение мира» балетсэ, Россиысь калык артист Сергей Гармаш лыдӟиз Шарль Перролэсь «Спящая красавица» выжыкылзэ, нош туннэ ӝыт филармониын концерт сётоз Великобританиысь пианист Фредерик Кемпф — со али быдэс дуннеын тужгес кужмо музыкантэн лыдъяське.

Элькунысьтымы культура удыс понна Чайковский нимо фестиваль валтӥсез проект луэ. Искусствоез гажасьёс быгато зэмос профессионал музыкантъёсты кылзыны. Сыӵе ужрадэз йӧно ортчытон понна кулэ туж бадӟым мылкыд, быгатонлык но коньдон. Кыкетӥ тулыссэ сыӵе дано сюлмаськон усе Удмурт кун филармонилэн кивалтӥсез Алексей Фомин вылэ. Егит удмурт воргорон нуналмысь пумиськылэ, вераське зэмос кизилиосын.

Нялтас вераса, со ачиз но ужан сюрессэ мытӥз музыкант сямен: кӧня ке ар ӵоже ужаз дирижёр луыса Операя но балетъя театрын, бӧрысь валтӥсь дирижёре ӧтизы филармоние. Оркестрен кивалтӥсь огдыре юрттӥськиз филармонилэн директорезлы — солэн творчествоя воштӥсез вал. Нош ар талэсь азьвыл Алексей Фомин юнматэмын директоре.

Атаез вӧзын.

— Алексей Юрьевич, дирижёрлэн ужез ми кадь огшоры калык понна туж валантэм но сузёнтэм потэ. Кыӵе ке выжыкыл кадь: дирижёр бодыен сэзъялтэ но — крезьгур кисьтӥське…

— Котькудӥзлэн аслаз удысэз. Мон но тани туж паймисько, кызьы луэ сокем чебер суредаськыны, гожъяськыны. Со понна ик со искусство — адями сое ас понназ усьтыны, со дорозь кыстӥськыны мед тыршоз. Сотэк сюлэмез уд вырӟыты.

Мыным туж кельше оркестрен ужаны, но берло дыре кивалтон уж трос дырез тала, ваньмаз уг вутскиськы ни. Нош рос-прос репетициостэк сцена вылэ потыны уг яра — учкисез-кылзӥсез гажано. Астэ профессионал нимаськод ке, тынад одӥг нотаед но медаз кугӟа, ваньмыз вӧй вылтӥ кадь гылӟыны кулэ.

Кемалась ӧвӧл монэ ӧтчазы Операя но балетъя театре концертэ дирижёр чотын, мон вань сюлмысьтым тырши, но аслым ӧз кельшы, шӧдӥ: репетициос уг тырмо.

— Шуо, дирижёр концерт ӵоже шахтёрен огмында кужымзэ быдтэ.

— Озьы но, дыр. Концерт бере пуш буша, нош мугор пуме, висьымтэ интыез уг луы ни, соин мыным, кылсярысь, концерт бере выльысь улӟон понна сутка котыр кулэ.

— Гуртоос ӵемгес кыс-тӥсько арган, баян котыре…

— Шонер, малы ке шуоно мукет луонлык ӧвӧл. Озьы усьтӥськытэк кылё Инмарен сётэм быгатонлыкъёс. Мыным удалтӥз — мон ӟеч семьяын вордӥськи, анай-атае дышетӥсьёс вал. (Юрий Александрович Фомин кема аръёс кивалтӥз Калыкез дышетонъя министерствоысь анай кылъя ёзэн, Валентина Зотовна Фомина — математикая дышетӥсь — авт.)

Пинал баянист.

Вордӥськи Пичи Пурга ёросысь Баграш-Бигра гуртын, собере мон пичи дыръя ик семьямы выжиз Дэри ёросысь Ягулэ. Монэ сётӥзы крезьгуро школае. Нош куинетӥ классэз йылпумъяме бере келязы Иже, элькунысьтымы усточи пиналъёслэн школа-интернатазы. Бӧрысь анай-атай но сузэреным городэ выжизы. Интернатын — со дорын ӧвӧл, адӟиськыны шутэтскон нуналъёслы гинэ лэзьылӥзы. Пичи дыръязы тросэз пиналъёс крезьгуро школае ветло, но ваньмыз уг вормо сое, ӝыныё кушто. Огъя но крезьгуро школаын дышетскыны капчи ӧвӧл, пиналлы секыт йӧтэ: эшъёс бызьыло, нош тон сольфеджиоен курадӟиськод. Сыӵе учыре туж кулэ ӟеч юрттӥсь, индылӥсь-косӥсь. Мыным крезьгурен вырон мылкыдыя вал, но жадён, аналскон учыръёс луылӥзы. Но мон кылзӥськись пинал вал, соин вогъяськыны йырам ӧз лыктылы: анай-атай уродзэ уз сӥзе ук, озьы кулэ, иське. Туж тыршыса дышетски. Жалясько огзэ гинэ — баян отделение шедемме. Огласянь, котькудӥз инструмент синмаськымон, соин усто шудӥськод ке, но мыным сюлэмыягес саксофон. Школа бере мон малпай, мар пазяськонэз на, соин крезьгуръя училищеын но азьланьтӥ баянэн шудонме. Но Урал консерваториын дышетски дирижёрлы. Со кыџе ке выль шокан усьтӥз. Мыным туж кельше академической крезьгур. Тодон-валанме муромытон понна пыри на аспирантурае — удысэ озьы ик герӟаськемын оперно-симфонической дирижированиен.

Егит кузпалъёс толлы дасясько.

— Табере Тӥ кивалтӥсь-коды филармониен, вань луонлыкты крезьгур искусствоез калык пӧлы паськытгес вӧлмытыны. Туж жаль, Чайковский нимо фестивальёс дыръя но концертъёсы туж ӧжыт калык шеде, сыӵе шуд усе Ижын но Воткаын улӥсьёслы гинэ. Огшоры калык валалляса но уг вутты, мар со сыӵе. Уд малпаське-а сое паськытатыны — оло араз одӥг пол ке но луэ Ижысь Шор площадьын куаш-куаш концерт сётыны? Учке ай, кӧня калык кыстӥське площадьысь крезьгуро фонтанъёс доры, нош татын чузъяськоз зэмос, улэп крезьгур!

— Мынэсьтым кемалась малпанме усьтӥды. Конечно, туж потэ. Сыӵе ик адӟисько, кызьы бадӟым площадьын бадӟым оркестр шудэ П. Чайковскийлэсь «1812-тӥ ар» увертюразэ… Мон оскисько, классикаез дунъясьёс шаерамы тырмыт, ма собере, ӧз ке но валалэ, со юрттоз чеберез усьтыны. Но ваньмыз пыкъяське коньдон вылэ. Кылсярысь, Зальцбургын (Австрия) Моцартлы сӥзем фестивальёс зэмзэ но ураме поттэмын ни — аспал муртсылэсь произведениоссэ отын тодӥсьтэмез ӧвӧл, дыр. Но верамзыя со сылэ 100 миллион евро. Нош милям фестивальмылэн бюджетэз 5 миллион манет котыр. Ярам ай тамында, огвакытэ миллион но ӝыны сяна ӧй вал. Но мон осконме уг ыштӥськы. Лыдъясько, калык одно берытскоз классика пала, угось со вуёмытэмын ни куальтыръяськонъёсын. Со понна милемлы, артистъёслы, музыкантъёслы но культура удысэн кивалтӥсьёслы, тыршоно сое вӧлмытыны, синмаськытыны. Со понна али бордамы кыскиськом волонтёръёсты. Егитъёс, пенсионеръёс понна со туж ӟеч амал: калыклы билет вӧлмытэмзы понна асьсэос концертъёсамы дунтэк пырыны быгато. Соос ужаны кутскем бере учкисьёсмы тросгес луизы. Куд-огезлэн арлыдо адямиослэн филармоние одӥг пол но пырамзы но вылымтэ, быдэс улонзы «дор-завод» выллем ортчемын, нош билет ӵектӥсь сюрыса, вуо но паймо, синмасько, выльысь но выльысь ветлыны кутско. Эшшо малпаськом на котырамы люканы филармонилэн эшъёсызлэсь клубзэ. Соос экспертъёс чотын но луыны быгатозы.

— Тӥ кивалтӥсь бере, амалтэк ӵошатӥськоды, дыр, ас уждэс мукет филармониосын.

— Одно ик. Валамон, нокызьы уйиськыны ум быгатэ Москва но Санкт-Петербург сьӧры, но синмаськыса учкы-лӥсько Екатеринбург шоры. Вот кызьы ке быгатысалмы ке сыӵе тубатозь ӝутскыны.

Выль семья - выль родня. Фоминъёс но Березинъёс.

— Со понна нырысь-валысь ӟеч зал ке но кулэ ук…

— Шонер. Туж потэ нимысьтыз куронъёсъя лэсьтэм залын ужаммы. Берло дыре сыӵе оскон ӝужаны кутске — 2014-тӥ ар Россиын ялэмын луоз П. Чайковскийлэн ареныз. Малпасько, Удмуртия понна со тужгес яркыт ортчыны кулэ. Али вераськонъёс мыно Ижын нимысьтыз концерт зал ӝутон сярысь.

— Удмуртъёс филармоние ӵемгес ветло асьсэлэн артистъёссы шо-ры учкыны: «Шулдыр ӝытэз», «Малпанэз». Кызьы дунъяськоды соослэсь ужамзэс?

— Вӧсь каронтэм вылысь тазьы верало: мон филармониысь удмурт люкетлэсь ужзэ мукет сяменгес адӟисько. Артистъёс тодо асьсэлэсь ужзэс, калык яратыса ветлэ А. Плотниковалэн, Г. Ганьковлэн концертъёсазы, нош кыӵе ке рос-прос концепция ӧвӧл. Берло дыре удмурт группаос учкисьсэс ыштыны кутскизы, соин ик выль сезонын воштӥськонъёс луозы.

— Вань одӥг пыкылон, Алексей Юрьевич: Тӥ, удмурт адями, филармониен кивалтыны кутскем бере «Зарни крезь» оркестр «ӟучомиз» — «Золотая мелодия» луиз. Соин валче шаплы удмурт егитъёс Тӥледлы антипремия но сётыны медо вал кадь…

— Зэм, со шаплы удмуртъёс асьсэос концертъёсамы ке вуылысалзы… Оркестрлэсь нимзэ валаса воштӥм, малы ке шуоно мукет калыкъёс шугомылӥзы нимзэ вераны, «зарни крест» но шуыны ӧдъязы. Но ним воштӥськемлэсь пуштросэз ӧз уродмы — оркестр туннэ туж мыло-кыдо ужа, залмы котьку тырме кылзӥсьёсын.

— Музыкантъёсты зэмзэ но синмаськымон шудо. Но тросгес… кунгожсьӧр крезьгурез: итальян, испан… Со дыре ик асьме удмурт композиторъёс уг чузъясько. Маин со герӟаськемын: кышкаськоды, учкись уз дунъя но концертъёс куашкалозы шуыса яке Композиторъёслэн огазеяськонэнызы огкыл уд шедьтӥське?

— Таизлы но юанлы азьвылэз выллем ик валэктон: мон кылзӥсько котькуд концертэз, адӟисько, кин отчы ветлэ. Композиторъёслэн огазеяськонзы, зэм, филармониез туж мыло-кыдо пыкылэ, но малы ке солэсь ёзчиоссэ мон одӥг концертысь но уг синйылтӥськы. Ми дась валче ужаны, репертуармес асьме крезьгурчиослэн произведениосынызы узырмытыны. Тани дасяськиськом Евгения Копысовалэсь творческой ӝытсэ ортчытыны.

— Удмуртлык котыр эшшо одӥг юан: Тӥ пинал, визьмо, тунсыко. Туала удмурт движение пыриськисьёслэсь «вирзэс выльдоно кадь»…

— Мыным со ӵашетонъёс чик но кулэ ӧвӧл. Бен, семьяын со пумысен вераськытэк ум улӥське — атай ачиз удмурт кылэз дышетон удысын ужаз бере. Вожзэс медаз вае, но куддыръя малпан лыктэ: туала общественникъёс выро асьсэды данъянэнгес, калыклэн тунсыкъёсыз соослы туж ик кулэ но ӧвӧл. Юазы ке, малы анай кылэз уд азинтӥське, соос шуозы: а ми-то мар, ми — общественникъёс! Соку мар куашетонэз? Одӥг пол удмурт культура понна ӟырдыт сюлмаськисьёс монэ асьсэлэн кенешазы ӧтизы. Маке но филармония вылэ вуизы. Огез журналист, мыным дурбасьтыны вырыса, вылды, юа самой зол куашетӥсьлэсь: ку, кыӵе концертэ берлозэ филармоние вуылӥды? Вераз — 35 ар талэсь азьло, пе. Мар татын вералод? Со понна со котькинлэсь ӟеч тодэ, кызьы узырмытоно но азинтоно культураез…

Удмуртлыкмес утён но данъян понна, мон лыдъясько, одно кутсконо ачид бордысен. Нырысь ик астэ гажано: дышетсконо, котыр ласянь тодон-валандэ будэтоно, ас удысад усточи луоно, астэ жалятэк тыршоно. Кутскы но дышеты кылдэ нырысь ачид, собере пиналыд, соку, оло, тон шоры учкыса, бускелед адӟем кароз. Милям семьяын сыӵе юан ноку ӧй вал. Городын будыса, ми семьяын котьку анай кылын вераським, али тани апаелэн пиез но шалтыр поттэ.

— Семьяысьтыды кыӵе йылолъёс тӥледлы тужгес дуно?

— Ӝытъёсы кырӟаса пукылэммы. Ӝытлы быдэ сямен атай милемыз котыраз люкалляз, удмурт кырӟанъёсты дышетылӥз. Соин мон туж ӟеч тодӥсько котькыӵе гуръёсты: сюанзэ но, ватонзэ но.

— Кузпалды — эмчи, удысъёстыя тӥ воксё пӧртэм адямиос. Кызьы шедьтӥды ог-огдэс?

— Азьвыл ачим но малпалляй, мынам ӝыные одно асьме кадьёс пӧлысь луыны кулэ, дыр, шуыса. Мукетъёс музыкантэз нокызьы но уз валалэ, кожалляй… Ачим но валаса ӧй вутты, кызьы сыӵе учконэ сылмиз. Семья улонме радъян сярысь сюлмаськиз кадь апае — Ижысь тодмо невролог Ольга Такаева. Одӥг пол со монэ ӧтиз эшъёсыз пӧлы шутэтскыны. Отын тодматски вавож нылмуртэн. Вераен нырысь огшоры эшъяським, пумен мон сое концертъёсы ӧтчаны кутски. Со нырысь синмаськиз кадь крезьгурлы. Концерт бере чылкак воштӥськылӥз, бурдъяськылӥз. Со дыре ик ӧз ватылы тодымтэзэ но: мон ведь азьло Чайковскиез Шопенлэсь уг висъяськы вал, шуэ. Озьы бере, дышетсконмес азинтоно, шуи (серекъя). Со пумит ӧз кариськы. Куке адями ялан будыны, тодон-валанзэ узырмытыны тырше — туж дуно. Малпасько, милемлы ог-огенымы котьку тунсыко луоз. Нош нылпиосмы ке вордскизы, соос одно будозы чебер крезьгур улсын, вераськозы анай кылын.

Зинаида Рябинина.

Удмурт Дунне
By Удмурт Дунне 27 апреля, 2012 12:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<