Быръён матысь дыре уз чалмы

Удмурт Дунне
By Удмурт Дунне Апрель 10, 2012 10:06

Быръён матысь дыре уз чалмы

Сӥзьыл нош ик куара сётомы.

«Огъя Россия» партилэн Удмурт ёзэзлэн политсоветэз ортчиз. Татын йылпумъянъёс лэсьтӥзы ортчем быръён кампаниослы но партилэн кылем арын ужамезлы.

 

Яръёс сукъяськыса уг уло

Ужрадэ пыриськизы партилэн Политсоветэзлэн секретарез, Кун Кенешлэн Тӧроез Александр Соловьёв, секретарьлэн воштӥсьёсыз Александр Ушаков но Андрей Гальцин, Валтӥсь федерал инспектор Дмитрий Мусин, районъёсысь партилэн исполкомъёсызлэн кивалтӥсьёссы.

Нялтас вераса, «Огъя Россилэн» Удмурт ёзэзлы мартэ тырмиз 10 ар. Туннэ партие пыремын шаерысьтымы 26 сюрс мурт. Пӧлысьтызы ог 60 процентэз — нылкышноос. Партилэн муртъёсыз ваньмыз сямен — служащийёс. Озьы ке но кылем арын «Огъя Россие» пырисьёс трос ӧй вал — ёзчи луыны куриськиз 920 адями. Нош со дыре ик 370-лэсь трос мурт партиысь потӥз.

Таӵе югдур, нырысь ик, кылдэ интыысь кивалтӥсьёслэн ужамзы бордысь. Тани Алнаш но Каракулино ёросъёсын партилэн радъёсыз одӥг муртлы но ӧз йылэ. Та районъёсын ик уг сюлмасько ёзчиослэсь взносъёссэс бичан пумысен но. Ар ӵоже 14 сюрс манет вуиз партилэн Алнашысь ёзаз. Та уксёез вань ёзчиослы люконо ке, быдэн 18 манет сяна уг усьы. Со вакытэ ик Ярысь «Огъя Россилэсь» кисызэ учконо ке, татын быдэн 60 манет люканы быгатӥллям. Уката ик та коньдон палэнэ уг кошкы, интыысь ужрадъёсты радъянэ мынэ. Озьы ке но партие пыремъёс уксёзэс сётыны уг дырто. Тани вылӥ кивалтӥсьёсты ик басьтоно ке: Кун Кенешын 22 мурт взносъёссэ тырымтэ, нош Правительствоын эшшо трос — 64 адями коньдонзэ уг сёты.

 

Кужымзэс мерталозы сӥзьыл

Кун Думае быръёнъёс партилэн Удмурт ёзэзлы бадӟым шумпотон ӧз вае. Шаерамы «Огъя Россия» 45 процент куара люказ. 4 ар талэсь азьло лыдпус шӧдскымон мукет вал — 70 процентэз улӥсьёс партилы синмаськемзэс веразы. Соин Россилы Президент бырйыку, сюлмаськон ичигес ӧй вал. Но таяз радэ районъёсын ӧз оске ни Москваысь ыстэм политтехнологъёслы. Тани Вавож ёрослэн йырыз Татьяна Иноземцева ачиз биньгозыез кырмиз. Мукет районъёсын но палэнысь юрттэтэз возьмаса ӧз улэ. Озьы 4-тӥ мартэ быръёнъёсын Удмуртиысь 65 процентэз улӥсьёс куаразэс сётӥзы «Огъя Россилэн» кандидатэз Владимир Путин понна. Шаермы 5-тӥ луиз ПФО-ын но 24-тӥ интые потӥз Россиын.

Озьы ке но быръён кампания матысь дыре уз чалмы. Октябре ик кандидатъёс нюръяськозы Кун Кенеше депутат луон понна. «Огъя Россия» татчы пыриськонлы матысь дыре ик дасяськоз. 20-тӥ маёзь партиысь ёзчиос быръёнъёсы мынон мылкыдзэс вераны быгатозы. Огъя список кылдытэмын луоз 1-тӥ июлёзь.

— Кун Кенешлэн вуоно ӧтчамаз 90 депутат луоз бере, нюръяськон уката зол пуромоз, — вера Политсоветлэн секретарез Александр Соловьёв. — «Огъя Россилэн» Удмурт ёзэз ласянь ог 300 мурт пыриськоз кужымзэ мертаны. Умой луысал, пӧлысьтызы ог 65 мурт Кун Кенеше шедьысал ке.

Елена Скворцова.

Удмурт Дунне
By Удмурт Дунне Апрель 10, 2012 10:06
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<