Ас шаерад Инмар уд луы

Удмурт Дунне
By Удмурт Дунне 3 апреля, 2012 13:59

Ас шаерад Инмар уд луы

Вячеслав Ар-Серги.

Удмуртиысь калык писательлы Вячеслав Сергеевлы (Ар-Сергилы) 50 арес тырмонзэ тодыса, мон ӧжытак паймигес: али гинэ 50 арес тырме ай? Пумиським, шораз учки: егит, чылкыт, задор — талы 50 ни?!

— Сыӵе паймонъёс луыло, о-о. Огпол Эгра ёросэ нылпиосын пумиськонэ ӧтизы. Урок азьын дышетӥсь коридоретӥ бызьылӥсь пияшлы шуэ: Васи, ойдо ни, Ар-Серги вуиз. Соиз туж паймыса юа: со улэп на-а, мар-а? Туала пиналъёс кожало: писатель ке — со одно вашкала.

— Со понна пиналъёс гинэ янгыш ӧвӧл ук, тани арлыдоослэсь но юалэ ай, тодо-а, кин со Ар-Серги? Тодо кадь. Нош солэсь произведениоссэ? Кӧнязэ ке сяна уз вералэ: «Лыдъя, лыдъя, кикые», «Тулкымъёс вылын пыжед». Пьесаостыя спектакльёс театрын кемалась уг мыно, кино вожъяськисьёсын курласа быдтэмын, тямыстонэтӥ аръёсы потэм веросъёс библиотекаосын сузмылэмын, нош выльёсыз вуылэмын но ӧвӧл. Нялтас вераса, кӧня тӥляд книгады?

— 40 пала. Со пӧлысь ӝыныез потэмын Удмуртиын. Отӥосыз — Москваын, Венгриын, Эстониын, Польшаын, Черногориын, Кавказын…

— Малы? Татын кулэ ӧвӧл ас писательёс? Оло, Тӥ укыр бадӟым куронъёс пуктӥськоды? Кыӵе мылкыдын пумитаськоды зарни арлыддэс, кыӵе кузьым возьмаськоды?

— Татчыозь улыса, мон валай ни, улонлэн тужгес бадӟым малпанэз (целез) — ачиз улон, улыны быгатон, озьы, кызьы пӧрме: сюлэмлэсь кылзыса, астэ ыштытэк, мукетъёссэ вузатэк. Нош кузьым мон кемалась нокинлэсь уг возьмаськы ни, луонлык кылдэ ке, ачим сое йӧндырыны вырисько. Тани та нуналъёсы типографиын пыже выль книгае: «Вслушаться в себя» нимаське. Отчы пыремын проза но, кылбуръёс но, монэн кенешонъёс но — зӧк, кие кутымон. Конечно, малпан вал сое кӧня ке томен поттыны, но оген йырын со туала вакытэ вормонтэм уж.

— Ма, Тӥ калык писатель ук, юбилеен валче сӥ-дан уг каро шат?

— Кин? Шуо, литература — со быръем адямиос понна. Со зэм — сое гожъям гинэ ӧвӧл, лыдӟыны-валаны но ваньмызлы инкуазен сётымтэ. Но вань на литература шӧлкын, со котырын бергасьёс, асьсэлэн тунсыкъёссы понна висисьёс. Огласянь, али сыӵеослэн улон-вылонзы куатьтонэтӥ-сизьымдонэтӥ аръёсы кадь ӟеч уд шуы, но туала вакытэ но быгато пырскытэк (но пыриськыса, вылды) дан дурыны. Сыӵеос мыным тунсыко ӧвӧл, соин ик валаса палэнскисько. Всё равно уртче ӝукмы уз пӧзьы, мар йыбыртъянэз, асьмелэн «быръем адямиосмы» вань ни, малы кулэ люкетӥсьёс?

— Кызьы лыдъяськоды, улэп-а туала удмурт литература?

— Шуэме потэ — улэп, ымы уг пыры улэптэм шуыны. Ачим но со ӧръёстӥ уясько ук. Яке — артэ-а. Мон туж валасько аслэсьтым огъёзо бускельме, со — удмурт адями, йылпумъямын МГУ-эз, туж яратэ крезьгурез но литератураез. Али банкын ужа. Куанер ӧвӧл. Машинаез но, бакчаез но учкымонэсь. Туж, пе, лыдӟеме потэ удмурт книгаез, артэ пуксьыса, та ортчись улон-вылонмы сярысь малпаськеме. Слава, вай вал мыным, шуэ, ӟеч туала удмурт книга, зуч-зуч лыдӟем потэ. Жаляса верано луисько, сыӵе чеберлыко туала книгаосмы асьмелэн ӧвӧл. Уката ик историмы сярысь. Син азе йӧтӥсь нимаз авторъёсмы уг адско, ваньзы вамышъяло буёлтэм оградын.

Сыӵе учырын мон воксё абдрасько: арлы быдэ кӧня ке муртэ писательёслэн радъёсазы куто. Озьыен, соос профессионалъёс? Но гожъямъёссыя сыӵе дунъетлы тупасез 5 процентэз вань меда? Выль нимъёс, оло, вордскозы, кылдозы, но ӝож соиз: асьмелэн юртто ӧйтӧд кинлы… Соин выль талантъёс кылдо ке но, вань та югдурлы ӧч карыса выллем.

— Ку нош Тӥ асьтэды зэмос писателен шӧдӥды?

— Куддыр али но уг шӧдылӥськы на.

— Шуд — со куке тонэ валало, шуиз классик. Писательлы сыӵе валан уката кулэ, дыр. Но вераськемъя, творчестводэс чакламъя, книгаостылэсь кытын вордскемзэс тодыса, адӟиське: ас шаерад Инмар уд луы (нет пророка в своем Отечестве). Ӟуч сямен гожъяськыны кутскемды соин-а герӟаськемын?

— Соиз но вань. Но мон тӥ вылэ куатаськи, соин ӟуч кылэ выжо ай шуыса вырон ӧй вал со. Кызьы ке ас кожаз пӧрмиз. Огласянь, мон ньылетӥ классозь ӟуч кылын ӧй но вераськылы, со вакыт начальной школаын математикаез но анай кылын валэкто вал. Нош будыса, трос аръёс городын улыса, бадӟым литератураен тодматскыса, сьӧрлось писательёсын эшлыко кусыпъёс тупатыса, амалтэк ӵемгес выжылоно луэ ӟуч кылэ. 1990-тӥ аръёсы татын книга лыдӟон, книга поттон сярысь валанъёс кыӵак ышыны ӧдъязы, нош шоркарын, Москваын, коть кыӵе ке процесс мынӥз. Нош кызьы отын тонэ валалозы? Берыктэмъёс пыр? Бен, со вакытлы мынам но берыктэмъёсы вал ни, но мон лыдъясько, тынэсьтыд малпандэ, верам потондэ ачид кадь ӟеч переводчик ноку уз вала, соин ик мон ачим ӟуче выжи. Зэм, ӟуч кылын гожъямъёсы, оло, сокем вольытэсь ӧвӧл, но со пумысен уг кайгыриськы, со понна со — мынам! Монэ уз тӥялэ, лыдӟисез уз пӧялэ. Нош мынам удмурт сямен малпаськыса гожъямъёсы Россиысь туала литературае одӥг пызьнэт ке но мукет шӧм пыртозы. Али уго пичи калыкъёслэн литератураоссы нокинлы кулэ ӧвӧл ни, асьсэлы писательёслы ке шат.

— Но таӵе югдурын Тӥляд кыл кутонды уката йылэ ук?

— Одно ик. Малы ке шуоно мон — удмурт ымныр. Соин вань гожъямъёсам тыршисько асьме адямиосты суреданы, соослэсь улон шоры учконзэс усьтыны, сямъёссэс возьматыны-валэктыны. Произведениосам юромо пыртӥсько вераськон манерзэс — озьы, кызьы вань. Тӥни ваньзэ сое лыдэ басьтыса, мон котьку кылисько национальной писателен. Мукетъёслэсь (ӟучъёслэсь) мукет, но соосын артэ, оградын. Но пичи ке но шӧдӥ ке монэ «экзотичной» луэмысьтым жаляса оградазы воземзэс, печатламзэс, соку ик палэнско, жалян кулэ визьтэмъёслы но лябъёслы, литератураын кӧй утчасьёслы.

— Вячеслав Витальевич, туннэ нуналлы элькунамы Тӥ сяна ӧвӧл кадь эрико писательёс. Таӵе суро-пожо вакытэ асьтэды быдэсак творчестволы сӥзьыны быгатӥськоды, лыдӟисьёслэсь кулэсмемзэс санэ басьтытэк, гожъяськиськоды, книга поттӥськоды…

— А малы мон малпаськыны кулэ, вань-а лыдӟисьёс, ӧвӧл-а? Мед малпаськозы соос, кин кун чотын книгаоссэ потта, мон казналы изъян уг лэсьтӥськы, кызьы быгатӥсько, озьы улӥсько. Соин ик мыным со тунсыко ӧвӧл, мон кылзӥсько асме, сюлэмме, йырме. Гожъясько, мар веранэ вань, мар ишан сямен доре лыктэ, лул вадьсам сылэ. Куддыр сомында малпанъёс одолё, чуръёсы курисько, визь бергаса уг вутты — сӥятон понна ураме потыса, йырме кезьыт лымые месылӥсько. Вот луысал ке азьвыл вакытъёсы сямен писатель ужен гинэ вырыны… А али висказ нянь утчатэк ӧвӧл ук, пазяськоно луэ. Тросэз малпало, конечно, ужамез уг поты — кызё ар дорад ӝӧк сьӧрын пук ай. Но оскелэ, эрико адями луыны туж секыт. Эрикоослэсь куалекто: кызьы-озьы? Маке но умойтэм… А ляльчи луыны капчи ук: султӥд, уже мынӥд, мар косӥзы — лэсьтӥд, толэзь пумын уксё басьтӥд… Мар секытэз?

— Мар Тӥледыз ӝӧк сьӧрысь, кутскем уждэс йылпумъятэк, султытыны быгатоз?

— Кышнолэн гожъяськон висъетам пыремез. Со номыр но уз вера, уз пыкылы, но шорам сыӵе учкоз, мон соку ик валасько — запас быре… Султоно, «пӧйшураны» мыноно. А так-то удалтэм мыным улонын: Галина Александровна — валась кузпал. Огазеяським студент дыръя. Университет бере монэ армие басьтӥзы, Галя кӧтын кылиз — бадӟымзэ нылме нырысьсэ адӟыкум, тэтэ каре ни вал. Армиысь бертӥ но, улыны нокытын. Одӥг пол паркысь ӟус вылын но кӧлэммы вань. Собере кыӵе ке корка нерге шедьтӥм, отчы патере пырим. Номырмы ӧвӧл. Кышно выж вылэ шинельме куштӥз, вылаз аслэсьтыз простыньзэ вализ, озьы ик кӧлӥм. Но сыӵе шулдыр улӥськом вал. Дорамы куное кылбурчи Миша Федотов вуылӥз, со но отӥ патерын улэ вал, ӵошен мунчое ветлылӥм. Корка пушкы кыӵе ке арбери басьтӥськод ке, со сыӵе бадӟым событие луэ вал. Собере куамын арес ёросам, кышноез кык пичи нылъёсынымы кельтыса, Москваысь Литинститутэ дышетскыны кошки. Соку но ӧз пыкылы. Малпай вал, «Алангасарлэн вужерез» кино понна басьтэм гонораре тырмоз. Какой отын. Уксё быре, сием потэ. Огпол серекъяса гинэ кадь шуисько: Галя, тон коть огпол Москвае лыкты вал, шыд пӧзьты. Кутскиз но лыктӥз. Гажаз, озьыен. Али нылъёсмы быдэ вуэмын ни, одӥгез ужа ни, мукетыз университетэз йылпумъя. Пыкылэмзы, мукет семьяосын ӵошатэмзы озьы ик ӧвӧл, кызьы ке но огсыр, эшлыко радъяськизы кусыпъёсмы.

— Кыӵе эмеспилы сётысалды нылъёстэс?

— А соос уз юалэ ук табере. Но потэ вылэм, малпаськыны быгатӥсь адямиос мед луозы шуыса. Гань-гань пуксьыса, вылтӥяськытэк улон-вылон сярысь лабыртыны, ог-огмес валаны мед кылдоз.

— Мар Тӥледлы уг тырмы та вие?

— Дунне.

Зинаида Рябинина.

Удмурт Дунне
By Удмурт Дунне 3 апреля, 2012 13:59