«Крокодил» вуиз Иже

Удмурт Дунне
By Удмурт Дунне 3 апреля, 2012 13:53

ООН-лэн лыдпусъёсызъя, дуннеын ог 100 миллион адями шузимытӥсь суретъёслэн кыӵесазы шедемын. Россиын — ог 2 но ӝыны миллионэз. Та пӧлысь ог 70 процентэз — 30 аресозь егитъёс. Пӧлазы ӧжыт ӧвӧл 11-12 аресъемъёс.

Шаерамы кылдытэмын наркотикъёсын нюръяськонъя нимысьтыз комиссия, кивалтэ соин Президент Александр Волков. Та комиссилэн берлояз кенешоназ кылем арлы йылпумъянъёс лэсьтӥз Россиысь Наркотикъёсын но шузимытӥсь суретъёсын нюръяськонъя кун службалэн Удмурт ёзэныз кивалтӥсь Сергей Зуев:

— 2011-тӥ арын Удмуртиын наркотикъёсын герӟаськем 2 сюрс 272 йыруж шараямын, валля арынлэсь со 2,7 процентлы тросгес. Кыл кутон улэ кыскемын 1 сюрс 19 мурт. Йыртэмасьёс киысь 271,8 килограмм шузимытӥсь суретъёс таламын…

Вань лыдпусъёсыз тазалыкез утёнъя министрлэн Владимир Музловлэн:

— Наркологияя диспансерын али 2 сюрс 621 мурт учётын. Дыраз юрттэт сётыса, кулэстыны быгатӥм наркотикъёсын сэрен кулэмъёслэсь лыдзэс: кылем арын таӵеос 20 вал, валля арын — 56.

Люкаськылӥз МВД-лэн общественной кенешез. Татын но валтӥсь ужпум — наркотикъёсын нюръяськон. Котырес ӝӧк сьӧрын вераськонэ пыриськизы югдурез утёнъя министр Александр Первухин, полицейскойёс, наркополицейскойёс, Егитъёсын ужан политикая, Дышетонъя но наукая, Тазалыкез утёнъя министерствоосысь специалистъёс.

Александр Первухин мылкыдзэ вераз:

— Республикаысьтымы ог 11 сюрс мурт шедемын наркотикъёслэн вотэсазы — со шузимытӥсь суретъёсты вӧлмытӥсьёс но, соосын кушласькисьёс но. Бен, берло дыре кунмы гижысь-пиньысь басьтӥськиз наркотикъёсын нюръяськон борды. Югдурез утёнъя ёзъёс, пӧртэм министерствоос одӥг кыткетын ужало. Шумпоттэ: огшоры адямиос но вазиськисесьгес луизы. Шузимытӥсь суретъёсын вуз карон интыосты тодыкузы, соку ик иворто наркополицейскойёслы…

Зэм, наркобаронъёс мурт синкылиос вылын узырмонлэсь уг кепырало.

— Республикаямы али героин ӧжытгес, — азьланьтӥз веранзэ Александр Первухин. — Сое басьтыны наркоманъёс шугъясько. Таин валлин та суретлэн дуныз но кык поллы йылэмын ни. Нош наркоманъёс меӵак верало: толэзь ӵоже вень вылын пукон понна, одӥг квартирае лушкаськыны пыраса, коньдон тырме вал, табере кыксэ-куиньзэ но сузяно луэ. Озьы йыртэман учыръёс тросгес луо.

Но наркополицейскойёсты, югдурез утисьёсты уката шугъяськытэ мукетыз. Луэ озьы: одӥгъёссэ суретъёсты наркотикъёс пӧлы пыртон сярысь закон кутӥське, та вискын кылдо ни мукетъёсыз. Соин ик шузимытӥсь суретъёсты вӧлмытӥсьёслэсь кылзэс но куддыр юаны уг луы.

***

Валля арын республикаямы вуиз «крокодил». Озьы нимало наркоманъёс дезоморфинэз. Кылем арын та сурет уката паськыт вӧлмиз Сарапул, Камбарка палъёсын — отын со героинэз воксё воштӥз, шуыны луоз. Туннэ нуналлы 6 мурт кулӥз ни, 127-ез басьтэмын республикаысьтымы наркологияя диспансере.

Специалистъёс шуо: героинэн кушласькись мурт 7 ар улыны чида ик ке, дезоморфин адямиез ар куспын быдтэ. Суретысь секыт металлъёс нырысь вирсэръёсты, собере сӥльбыгытъёсты, пуш ёзвиосты сисьто. Соосты нырысетӥ кык-куинь толэзьёсаз гинэ йӧнатыны луэ на, отӥяз мугорлэн висёнъёсын нюръяськон кужымез уг тырмы ни.

Дезоморфинэз пӧзьтонэ ватсало кодеинэн эмъюмъёсты. Таосыз эркын вузасько — соос наркотикъёс пӧлы пыртымтэ. Озьы ке но Президент Александр Волков чурыт вераськемен, Сарапулысь аптекаосын берло дыре та эмъюмъёсты одӥг адямилы кыклэсь ятырен ӧз сётъялэ ни. Югдурез утисьёс шуо: таӵе вамышлэн пайдаез соку ик шӧдӥськиз, Сарапулын дезоморфин пӧзьтӥсьёс ӧжытгес луизы. Но табере соос вань ни мукет ёросъёсын, «крокодил» вуиз Иже но.

МВД-ысь общественной кенеше пыриськемъёс огкылэ вуизы: кодеинэн эмъюмъёсты мукет ёросъёсын но эркын вузамысь дугдоно. Адӟем кароно, пе, Башкортостанлэсь но мукет республикаослэсь. Отын та пумысен нимысьтыз декларациос кутэмын ни. Одӥг кие кык эмъюмез вузаны уг лэзё, аптекаосысь ӝажыос вылэ та подоваосты уг тыро, нылпиослы соосты уг вузало. Со сяна, котькуд аптекалэн кивалтӥсез дырын-дырын ивортылэ наркотикъёсын нюръяськонъя службаосы, кӧня мурт дорысьтызы кодеинэн эмъюм басья. Та кулэ югдурез чакласа возён понна.

***

Югдурез чакласа возён вылысь ик Кун Кенешысь депутатъёс кылем арын юнматӥзы алкоголизмез, наркоманиез, токсикоманиез алонлы сӥзем законэз. Со шӧлкын табере егитъёс пӧлын наркотикъёслы тестирование ортчытыны лэземын.

Вера Наркотикъёсын но шузимытӥсь суретъёсын нюръяськонъя кун службалэн Удмуртиысь ёзысьтыз валтӥсь специалист Татьяна Романова:

— Кылем арын таӵе тестирование ортчытэмын Ижысь одӥгаз училищеын. 143 мурт со пыр потӥз. Витезлэн шараяськиз наркотикъёсты шӧмъямез. Туэ таӵе эскеронъёсты ортчытыны чакламын ни Ижысь, Сарапулысь но Балезиноысь училищеосын. Угось со городъёсын-ёросъёсын тужгес паськыт вӧлмемын шузимытӥсь суретъёс.

Тестирование азьланяз ортчытозы, вылды, школаын дышетскись пиналъёс пӧлын. Угось наркотикъёсты шӧмъяны кутскемъёс вань таос пӧлын но. Соин ик югдурез утисьёс сак кариськыны куро анай-атайёсты. Тае лыдэ басьтыны кулэ Дышетонъя но наукая министерство но.

— Ӧжытак буйгатэ соиз, — азьланьтӥз веранзэ Татьяна Романова. — Кылем арын республикаысьтымы наркологияя диспансер бордын усьтӥськиз быдэ вуымтэослы реабилитацияя центр. Шуге-леке вуэм пиналъёс отын уй но, нунал но уло, тазалыксэс юнмато. Центр узырмытэмын туала куронъёслы тупась эмъян но диагностикая тӥрлыкен. Нылпиосын ужало наркологъёс, педиатръёс, психологъёс но мукет специалистъёс.

Но реабилитацияя таӵе центръёс туж кулэ на мӧйыослы но. Республикаямы туннэ кӧня ке гинэ огазеяськонъёс выро азьвыл наркоманъёсты шонер сюрес вылэ султонэн. Но соослы кун ласянь юрттэт уг вуы бере, асьсэды возён вылысь ужано луо коньдонэн. Соин ик отчы сюрыны котькуд мылкыд карисьлэн луонлыкез ӧвӧл.

Тросэз специалистъёс верало: азьвыл наркоманъёс уг луо. Соин ик пӧлысьтымы котькудмы сак луыны кулэ: ӧвӧл-а вӧзамы шузимытӥсь суретъёслэн кыӵесазы пырыны дасяськемъёс. Соослы шуныт кимес дыраз мычыса, мед вуттом вылэм.

Элина Кумачёва.

Удмурт Дунне
By Удмурт Дунне 3 апреля, 2012 13:53