«Зарни перепеч» ческыт кошкиз!

Удмурт Дунне
By Удмурт Дунне 3 апреля, 2012 13:13

«Зарни перепеч» ческыт кошкиз!

Н. Анисимов - вормись.

Удмурт эстрадаын нырысьсэ ортчиз «Зарни перепеч» вожвылъяськон. Валтӥсь премия понна нюръяськиз 13 артист. Концертэ билетъёсты калык октӥз пӧсь перепечез сямен — залын ӧз кыльы одӥг буш пукон но.

Ужрад паймытӥз выль шӧмыныз. Нимо-дано артистъёс — Геннадий Ганьков, Анна Плотникова, Надежда Уткина, Алексей Ложкин — вӧзын кужымзэс мертазы егитъёс. Удмурт кун филармониысь ик 4 кырӟасьёс вуизы: Марина Галичанина, Наталья Ушакова, Регина Музиянова но «Silent Woo Goore» группалэн солисткаез Светлана Ручкина. Концертэ пыриськизы удмурт учкисьёслы вуныны кутскем Любовь Быкова но Анатолий Эркишев. Со дыре ик вожвылъяськонын кужымзэс мертазы удмурт эстрадаын ӝужам выль кизилиос — Ullapala Boy но Николай Анисимов. Концертэз радъясьёс ужрадэ ӧтьыны быгатӥллям бесерман крезь кырӟасез Мария Корепановаез но.

Концертэз нуисьёс но учкисьёслы вылесь: артистъёсты яло, калыкен огкыл шедьто егит удмурт ужбергатӥсьёс — «Зарни перепечез» радъясьёс — Роман Дементьев но Семён Семёнов. Пиослы юрттӥськизы муспотон нылъёс — 2010-тӥ арын «Чеберай» но 2011-тӥ арын «Уйпал кизили» нимъёсты басьтэм Ксения Воронцова но «Мисс Италмас-2012» луэм Лилия Кондратьева.

Вожвылъяськонлэн ны­рысетӥ люкетаз артистъёс быдэстӥзы быдэн одӥг кырӟан. Шӧдӥськиз: тросэз кырӟанъёс ичизэ ог 10 ар чузъясько. Мукет ласянь, артистъёслэн одӥг номер гинэ быдэстыны луонлыксы вань — выль кырӟанэз учкисьёс шӧдыса-дунъяса уз вуэ. Уката ик «Зарни перепеч» — удмурт «Оскар» шуыса малпамын, озьыен, уката ӟечсэ кырӟано.

Котькудзэ кырӟасез калык пумитаз пӧсь кичабонъёсын. Соин кин понна куаразэ сётоз — валаны туж шуг луиз. Уго устозэ артистэз бырйизы учкисьёс ик. Вис дыръя соос билетсэс сётӥзы кельшем кырӟась понна.

Концертлэн кыкетӥ люкетэз но йӧн-йӧн радъямын вал. Кырœанъёс вискын Дарали Лелилэсь но Дина Дэремлэсь коллекциоссэс возьматӥзы веськрес удмурт нылъёс. Дарали но Дина нимаз кузьымъёсын пусйизы эстрадаысь тужгес тузӥ кырӟасьёсты — Света Ручкинаез но Маша Корепановаез. «Мынам Удмуртие» ТРК висъяз Алексей Ложкинэз.

Учкисьёслы мукетыз бадӟым кузьым — «Айкай» театрлэн кырӟам-эктэмез. Концертэз радъясьёс быгатӥллям шӧдыны егит но, арлыдо но учкисьёслэсь мылкыдъёссэс. Туж усто!

Кин вормиз? 29 куара люкаса, 3-тӥ инты но 5 сюрс манет премия утӥз Геннадий Ганьков. 2-тӥ интые потӥз Анна Плотникова — солы 35 мурт куаразэ сётэм. Аннаез шумпоттӥзы 10 сюрс манет кузьымен. Нош вань кырӟасьёсты азьпалтӥз кияса пи — Николай Анисимов. «Ӟеч луэ, тӧдьы кызьпуос» кырӟанлы 258 учкись куаразэ жалямтэ. Зол ке зол ини!

— Кырӟа эшшо! — куре калык.

Коля нош ик сцена вылэ потӥз — тодмо луэм «Эн люкиське» кырӟанзэ быдэстӥз.

Николай Удмурт кун университетын 5-тӥ курсын дышетске. Концертын вожвылъяськонзэ тодыса, пияшлы дурбасьтыны дасяськизы киясаос. Но сюрес вылын автобуссы тӥяськиз. Озьы калык концертэ ӧз шедьы. Удмурт театре вуиз Колялэн анаез Галина Анатольевна гинэ.

— Пыр куалекъяса пуки, концертэз но рос-прос учкеме ӧз луы, — тулкымъяськись мылкыдзэ усьтэ нылкышно. — Сцена вылэ потоз шуыса, Коля азьло ик телефон пыр ивортӥз вал. Со пичи дырысен ик весь кырӟаса ветлэ. Милям песянайёсмы но ваньмыз кырӟало. Туж данъяськисько пиеным!

— Мон та концерт сярысь кылӥ, но таӵе вожвылъяськон луоз шуыса, ӧй малпа, — вера Коля. — Марина Галичанина ӵектэмъя пыриськоно кариськи. Кышкыт вал ӵошатскыны Геннадий Ганьков но Анна Плотникова кадь кужмо артистъёсын.

— Сцена вылын быдэстэм кыкез но кырӟанэд бигер кылысь берыктэмын. Репертуарад эшшо гуръёс вань на-а?

— «Чипчирган» ансамбльын калык кырӟанъёсты быдэсъясько. Нэнэелэсь «Огпол ке но» кырӟанзэ огаз конкурсын калыке поттӥ вал.

— Утэм премидэ кытчы быдтод?

— Выль кырӟанъёслы аранжировка но фонограмма дасянлы.

* * *

«Зарни перепеч» туж ческыт кошкиз. Сӥзьыл удмурт кырӟанъёслы сӥзем «Элькунвидение» радъяськоз на. Нош матысез ӵошатскон луоз 27-тӥ апреле. Соку быръемын луоз удмурт кылын устоез телепередача.

Алёна Ионина.

Удмурт Дунне
By Удмурт Дунне 3 апреля, 2012 13:13