12 кылбур, осьминог но куасьтэм губи

Удмурт Дунне
By Удмурт Дунне 11 марта, 2012 15:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Виктор Шибанов.

Виктор Шибанов — туж паймымон адями. Кӧня сое тодӥсько ни, котькуд адӟемам выль сямен ассэ возьматэ. Куддыр со мыным потэ туж возьдаськись, вераськисьтэм, мукет дыръя со — гор-гор серекъяса, ассэ ачиз пӧртмаса сцена вылын эктӥсь, куиньметӥ учыре — студентъёсын гань-гань вераськись дышетӥсь.

В. Шибанов шуэ: «Мынам дышетӥсе Вла­димир Ро­манов вал. Школае ветлыкум ай, со монэ гожтэтъёс пыр дышетэ вал, кызьы улыны, астэ возьыны. Туж бадӟым юрттэт сётӥз гожъяськон удысын но. Огпол дорамы куное вуылӥз, юри губилы шуыса. Сӥзьыл кӧс вал бере, мон нокыӵе ӧй кариськы, кыӵе губи луоз та вакытэ? Анае пыжиськон вискын нюлэс омырен шоканы потӥм. Мон сыӵе адями: нюлэскы губилы потӥсько ке, губи гинэ бичасько, эмезьлы ке, эмезез гинэ адӟисько. Таӵе учыре агаелы туж синмаськисько вал. Со нюлэскы поталля ке, одно ик узызэ но, борызэ но бичаны шедьтэ, со вискын ик губизэ адӟе, ӵужон-лопаткалы тупась ныдъёс учкылэ, кытысь пулы писпу погыръяны луоно, сое но эскере. Нош мон коньыгубилы мынӥсько ке, сое гинэ бичасько, мукетсэ уг адӟиськы ни. Анае юа ке, вань-а отын намер яке палэзь, мар вазьыны ик уг валаськы. В. Романовен нюлэскы потыкум, асме губи ӧвӧл шуыса оскытӥ вал бере, мон одӥгзэ но ӧй шедьты, нош В. Романов быдэс куды бичаз.

Ужан удысъёсы туж трос. Мон тыршисько «осьминоглэн теориезъя», — веранзэ азьланьтэ филология наукаосъя кан­дидат. — Ленинградын дышетскыкум ай, одӥгез дышетӥсьмы милемлы вераз: «Дунне вылын адямилы туж секыт. Соин ик улон шоры капчиенгес учкыны кулэ, ваньзэ сюлэм пыр поттоно ӧвӧл, «осьминог» амалъя улоно». Солэн верамезъя, осьминог сямен, пе, адямилы одӥг ужен гинэ тунсыкъяськоно ӧвӧл, шедьтоно пӧртэм удысъёс. Одӥгаз ӧз пӧрмы ке, выжоно мукетыз борды, таиз но ӧз удалты ке, куинетӥез борды кутсконо. Ӵапак та амалъя улыны тыршисько. Адямиен оломар но луыны быгатэ, но мон солэсь уг кышкаськы, вань шуг-секытъёслы ас­ме ачим азьло ик дасяй ни. Маке пӧрмымтэ дыръя йыркуръясь­кытэк каньылак мукетыз борды кутскисько. Нош ужан удысъёсы мынам — наука, литература, студентъёсты дышетон, этнофутуризм, учебникъёс бордын ужан, Удмуртиысь Писательёслэн союзазы кунгожсьӧр го­жъяськисьёсын кусып возён, уг вунэтӥськы шахматме но. Шуом, ли­те­ратураын уже уг ке пӧрмы, выжисько журналистика ӧре. Татын но ӧз пӧрмы ке — шахматэн шудонъёсын азинсконъёсы луозы, мон спортъя мастере кандидат ук.

* * *

Виктор Леонидович Ши­­­­банов вордскемын Глаз ёросысь Котгуртын (Котнырево). Анаез но атаез колхозникъёс вылӥллям. Атаез Леонид Павлович коммунистъёсты яратымтэ. Та учконъёсыз аслыз номыр уродзэ ӧз вае кадь, но Виктор Лео­нидо­вич вылтӥ со погыльскем, шӧдске. Пияш Глаз ёросысь Коӵыш школаын «витьёслы» ги­нэ дышетскиз ке но, сое йылпумъяса, нокыӵе ме­даль ӧз сётэ. Собере Шибанов университетлэн удмурт факультетаз пыре. Соослэн группаязы али туж тодмоесь адямиос дышетскиллям: Вячеслав Ар-Серги, Светлана Аре­кеева, Татьяна Мин­ниахметова. Школаын дышетскыкуз ик гожъяське ни вал бере, татын со эшшо золгес кылбураны кутскиз. 4-тӥ курсысен «Выль ужъёсы ќтё» кылбуръёсын сборникез потӥз. Та бичет пумысен бадӟым споръяськон но вал. Куд-огъёсыз, вазь на ай шуыса, соглаш ӧз луэ сборниксэ поттыны. Виктор Леонидовичлы Даниил Яшинэн Василий Ванюшев дурбась­тӥ­зы. Озьы солэн кылбуръёсыз лыдӟисьёс кие вуизы. Ачиз Шибанов та пумысен «Толэзьлы гинэ вазьгес сяськаяськизы» кыл­бурзэ гожтэ. Пичиысен ик кылбураны кутскемзэ Виктор Леонидович тазьы валэктэ:

— 12-13 аресын гожъ­яськыны кутски. 13 арес — паймымон вакыт, соку тросэз тодмо кылбурчиос гожъяськыны кутскизы — Александр Пушкин, Борис Пастернак. Мон малпамъя, ачиз инкуазь озьы кылдытэм. Угось та вакытысен пинал шӧдыны-валаны кутске улонэз, зэмос яратон мылкыд вордске. 13 арескын ваньмыз улӟе.

Удмурт факультетэз быдтыса, Виктор Лео­нидович Ленинградын ас­пирантураын дышетске. Бӧрысь одӥг но ӝыны арлы армие кошке. Солэсь азьвылгес армиысь бер­тэм тодмо пияш сое буйгатыны вырем: эн сюлмаськы, тонэ ракетной войскоосы басьтӥськом шуозы, но стройбатэ сю­род. Озьы ик луиз. Удмурт дышетӥсез Уфае стройбатэ вуттӥзы. Собере Екатеринбургын кандидат диссертацизэ уте но аслаз университетаз ик берытске. Ужаны кутскыкуз ик, ӟуч литературая но фольклоръя курсъёсты сёто. Виктор Леонидовичлэсь улон но литературалэн азинскон сюресэз шоры учконзэ соос копак воштӥзы. Табере ваньмыз шоры, калык фольклор вылэ пыкиськыса, учкыны кутскиз. Со­ин но та дышетӥсь удмурт литератураын этно­фу­туризмъя одӥгез кужмоез кичӧлтӥсь луиз.

— Аспирантураын дис­сертациме гожтыны мал­пасько вал Флор Васильев сярысь. Кивалтӥсе шуиз: удмурт кылэз ми ум тодӥське, нош поэзиез берыктыку, со мукет луэ, озьыен, тодмо ӟуч поэтъёс бордын ужано луод. Мон Владимир Соколовез быр­йи. Со аръёсы та одӥгез валтӥсь кылбурчи вал. Нош университетын ужаны кутскыса, мукет ужъёсы трос луизы, соин ик Ф. Васильев борды кутскыны ӧй быгаты ни. Бӧрысь ини «Ӧс» кылбур бичетам гинэ Ф. Васильев сярысь ужме пыртӥ.

Мон малпамъя, котькуд кылбурчи 12 уженыз тодмо луэ. Котькӧня кылбур со мед гожтоз, нош калыке вӧлме 12-ез, арлэн 12 толэзез сямен. Туннэ нуналлы мынам 4 кылбур бичетэ. Шумпотӥсько, Парижысь «Финно-угорские этюды» журналэ этнофутуризм шӧмо чуръёсыным сюри шуыса. Отчы мон сярысь филология наукаосъя доктор Ева Тулуз гожъяз. Та журналэ сюрыны туж секыт. Отын мынам ӵапак 12 кылбуре печатласькиз.

Улонын озьы но луэ: одӥг авторез ваньзы лыдӟо, сое туж ярато. Ма кароно сыӵе учыре вожъяськисьёслы? Со писательлэсь, кыл­бурчилэсь ужъёссэ пи­налъёслэн ды­шетскон программаязы, учеб­никъё­сы пыртоно, вот соку со ужъёсыз нокинлы но уг кельшо ни, акылесэсь пото. Кужмысь лыдӟоно луэ ке, произведение нокинлы кулэ ӧвӧл ни угось. Шумпотӥсько, мынам ужъёсы дышетскон программае ӧз пыре на шуыса. Озьыен, монэ лыдӟо на, — шуэ В. Шибанов.

* * *

Виктор Леонидович ля­­кыт сямо, гань-гань, дыртӥсьтэм, адямиез га­жась. Пӧртэм юмокъёсы сюрылэмзэ серекъяса тодаз вае.

— Сокугес гинэ мобильной телефонъёс кылдӥзы, мон но басьтӥ. Телефонэз рос-прос уг тодӥськы на. Гудок интые маскара крезьгур яке кышкыт веран пуктыны луэ шуыса, кылэме ӧй вал. Огполаз жингыртӥ диплом гожъясь студенткалы, нош пумитам туж-туж кышкыт куараен вазизы: «Трубкадэс эн куштэ, тӥ доры опергруппа потӥз, одӥг минут ортчыса, вуозы!» Кышкаменым те­лефонме куш­тӥ но пукисько, ма карыны уг валаськы. Векчи трикоен гинэ вал бере, малпай: ӝоггес дӥсяськоно. Табере, штаньме дӥсяса, возьмасько ни югдурез утисьёсты. Чус, нокин но ӧвӧл. Ог дасо минут ортчыса, ӧй чида ни, эшелы жингыртӥ. Соиз кутскиз ук горыны…

Виктор Леонидович туж ческыт пӧраське. Солэн вань аслаз рецептъёсыз но. Венгер профессор Петер Домокош малпамъя, Удмуртиын гинэ зэмос губи будэ, мукет интыосын со сыӵе ческыт ӧвӧл, пе. Со дырысен Шибанов но губиез гажаны кутскиз. Куасьтэм губиез кораса, кеньырен, вӧйын пӧзьтэ. Туж ческыт луэ, милям сиеммы вань.

Шахматэн шудыны кут­скемзэ но серекъяса валэктэ:

— Нылкышноос пӧлын ужаса, ачид но кышномурт кадь луыны кутскиськод. Соин ик шахматэн шудӥсьёс доры ветлыны кутски. Татын угось воргоронъёс тросгес. Отын мон асме зэмос пиосмуртэн шӧдӥсько.

Зинаида Байбекова.

Удмурт Дунне
By Удмурт Дунне 11 марта, 2012 15:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<