Яд коран

Удмурт Дунне
By Удмурт Дунне 30 марта, 2012 09:56

Яд коран

Кышкыт суретэн йӧэз корало ломен.

Балезино посёлоке кисьтэм кышкыт сурет сярысь ивор вӧлмиз быдэс Россие. Куинь толэзь ӵоже яд кылле куштӥськем асфальтобетон заводлэн битумохранилищеяз. Четырёххлористой углерод (тетрахлорметан), вуэн сураськыса, 160 тонналэсь ятыр луиз. Балезиноын улӥсьёс та кышкыт иворез тодӥзы 14-тӥ мартэ гинэ.

Кылдэм югдурез тупатон вылысь али, шутэтсконэз тодытэк, ужало МЧС-ысь специалистъёс. Югдурез ялан син азяз возе Удмуртилэн Президентэз.

 

Выль ар кузьым

23-тӥ декабре Балезино станцие вуиз кышкыт суретэн 3 цистерна. Яд поттӥсь — Чувашиысь Новочебоксарск городысь «Химпром» завод. Балезиноын та кылем-мылем суретъёс сётэмын вал «Ленхиммаш» огазеяськонлы — та предприятилэн «йырыз» интыяськемын Санкт-Петербургын, нош филиалэз вань Ижын.

— «Ленхиммашлэн» ядэз утялтон понна нокыӵе лицензиез ӧй вал. «Химпромлы» соос «суредам» документ возьматӥзы, нош Новочебоксарскысь предприятие эскерыса-мар ӧз улы — суретэз сётӥз, — вераз Следствиея управленилэн кивалтӥсез Владимир Никешкин.

Ядэз утялтонъя нимысьтыз полигон вань Ленинград улосын. Но кузь сюрес вылэ цистернаос ӧз потэ. Следовательёс шараязы: 3 вагонысь суретэз нуллӥзы битум возён интые. 12 рейс лэсьтӥзы йыртэмасьёс — кӧшкемыт сурет выжыяськиз Балезино ёросэ. Кытчы киськазы сое — полиция шараяз 2 нунал ортчыса гинэ.

26-тӥ-29-тӥ декабре чугун сюрес станцие эшшо куинь вагон яд вуиз на — но тазэ суретэз шыпытак кисьтыны ӧз луы. Цистернаосты берен келязы Иже. Отысен 2 вагон вуиз Татарстанэ, огез берытскиз «Химпром» заводэ.

Та учыръя Следствиея управление ӝутӥз уголовной уж. Кылзэс юано муртъёс али 6 кузя: кыкез — Татарстанын, ньылез — Удмуртиын улӥсьёс. Янгыше уськытоно адямиос пӧлысь огез — Балезино ёрос администрацилэн йырыз Сергей Наговицын. Кивалтӥсь, ужысь мозмытыны курыса, заявление гожтӥз кылем арняе. Янгыш кароно мукет муртъёслэсь нимтулъёссэс следовательёс уг на шараяло. Пусъё огзэ: та огазеяськыса йыртэмась группа вал. Сотэк кытысь тодысалзы палэнысь вуэм муртъёс куштӥськем завод сярысь.

— Та югдурын тужгес бадӟым янгышез «Химпромлэн». Со поттэ вуз, солэн ик кылдо отходъёсыз. Иське, завод сюлмаськыны кулэ та ядэз тыро-пыдо утялтон пумысен. Уг-а луы «Химпромлы» пумит уголовной уж ӝутыны? — юаз Президент Александр Волков.

— Та пумысен нимысьтыз эскерон ортчытом, — оскытӥз Следствиея управленилэн кивалтӥсез.

 

Тусыз чылкыт, ачиз кышкыт

Малы декабре луэм учырез сэрттыны-пертчыны кутскизы мартэ гинэ? Удмуртиысь прокурор Сергей Панов тазьы малпа:

— Та учырен герӟаськем документъёс 17-тӥ январёзь полициын ӝегазы. Уго Росприроднадзор кематэк экспертиза ортчытыны ӧз быгаты.

Росприроднадзорлэн Удмуртиысь управлениеныз кивалтӥсь Владимир Григорьев вера:

— Эскеронэз ортчытыны туж секыт вал. Специалистъёс рос-прос ужазы. 1-тӥ мартозь ӧм тодэ, мар сурет со. Соин дырызлэсь вазь гырлы жугыны кулэлыкез ӧй вал.

Четырёххлористой углерод вуэн сураськиз, кыӵе ке люкетэз васькиз битумохранилищелэн пыдэсаз. Сурет 5,5 поллы секытгес, омыр сярысь. Кезьыт куазен со кышкыт ӧвӧл — бус уг вӧлскы. Кенешыны ӧтемын вал Камбаркаысь но Кизнерысь кышкыт суретъёсты тодӥсь устоосыз специалистъёс. Соосын валче кутэмын решение: куазь шунытгес луэмъя ядэз утялтоно. Йӧлэн зӧкталаез интыен-интыен пӧртэм: кытын ке 20 сантиметр, мукет азяз — 30 сантиметр.

Четырёххлористой углерод кышкытлыкезъя 2-тӥ классъемъёс пӧлы пыре. Вань ядъёс люкисько 5 класслы. Куд-огез ӝожтӥське тазалыкез вылэ.

Озьы ке но больницае вазиськиз одӥг мурт гинэ. Врач солы «невроз» диагноз пуктӥз. Адямиос асьсэды юнме кышкато, шуэ Следствиея управленилэн кивалтӥсез Владимир Никешкин. Калыкез буйгатэ МЧС-лэн Удмуртиысь управлениеныз кивалтӥсь Пётр Фомин но:

— Балезиноын кышкыт югдур (чрезвычайной ситуация) ялон понна нокыӵе мугъёс ӧвӧл. ЧС ялэмын битумохранилище котырын 20 метрын гинэ. Оглом кышкыт югдур кылдоз, омырын люкаськем сурет 5 поллы йылӥз ке. Норма — кубический метрлы 0,7 миллиграмм. Балезиноысь омырын яд люкаськемын 0,001 миллиграмм. Битумохранилище вӧзын — 0,002 миллиграмм. Со понна омырын шӧдӥське ӵын зын — посёлокысь котельнойёс но мукет гуръёс омырез тросгес кырсёмыто, шӧдске.

«Химпром» завод кылдэм югдурлы тыбырын ӧз кариськы. Предприятие Казаньысь вуттӥз химия суретэз возьыны чаклам бакъёс. Кык кубометръем 52 бекчеос кык нунал куспын тырмизы.

— Уж секыт, — уг танӥськы Пётр Фомин, — сое ӵошатыны луоз ву вылысь мувӧез октонэн гинэ. Йӧэз кораськом, векчи пырыоссэ но бакъёсы тыриськом.

Спасательёс ужало огшоры противогазъёсын но Л-1 (резина) костюмъёсын. Ужъёс чалякгес радъяськысалзы, но уг тырмо йӧ тырон бекчеос. Четверге — 29-тӥ мартэ — эшшо одӥг партия бакъёсты вайизы. Пётр Фоминлэн сюлмаськонэз одӥг — тудву кошкытозь, ужъёсты йылпумъяно.

 

Юалэ — валэктозы

Балезиноын улӥсьёслэн сюлэмъёссы пирсэкъяло. Калыклэн мылкыдыз кык пӧртэм. Огъёсыз чакласько, мукетъёсыз кивалтӥсьёсты тышкасько но митингъёсы пото.

Пусъёно огзэ: ёрос йыр Ришат Мухгалимов юанъёслэсь уг пегӟы. Со калыкен но вераське, ёросысь газет, радио но телевидение пыр лад-лад ивор сётэ. Радъямын «пӧсь» телефон — таиз уй-нунал ужа, специалистъёс юанъёслы валэкто.

— Бен, шумпоттӥсез ӧвӧл. Но калык воксё уг куалекты, — вераз Балезино ёросысь «Вестник» газетлэн корреспондентэз Аэлита Князева. — Посёлокын нокыӵе зын ӧвӧл. Ачим со кисьтэм отходъёс доры куинь пол вуылӥ ни. Номырзэ ӧй шӧды. Спасательёс ужало противогазъёсын — кышкытлыклэсь утиськонъя куронъёс сыӵе. Зэм, огез паймытэ. Малы та дырозь ӧз на вуттэ ӟеч техника? Соин сэрен спасательёс кын йӧэз ломен пильыло — пыр вашкала сямен ужало ук.

Со вакытэ сак кариськыны куремын МВД-ын но МЧС-ын ужасьёсты. Полицейскойёс сыло битумохранилище котырын, ватсамын патрульёс Балезино посёлокын. Зэм, югдурез утисьёс дасясько уродэзлы. Министр Александр Первухин верамъя, Самараысь вуизы ватсам фильтрен противогазъёс. Соос кулэ медаз луэ вал.

 

Бекче келян

Ёрос йырлэн Ришат Мухгалимовлэн вань эшшо одžг сюлмаськонэз. Кышкыт авариез утялтонын ужасьёсты сюдыны кулэ. Кык арнялы кошкоз 760 сюрс манет. Ёрослэн запас коньдонэз ӧвӧл. Таиныз юрттоз республика. Югдурез тупатыны нимысьтыз фондысь 200 сюрс манет висъяз ни МЧС-лэн Удмуртиысь управлениез но.

Средае Балезиное вуылӥз Президент Александр Волков. Со тодматскиз, кызьы мынэ уж. Асфальтобетон завод котырын дасямын нимысьтыз склад — татчы спасательёс люкало йӧ пырыен тырмытэм бакъёсты. Шуныт сётӥсь пушкаосын али со ворсам бекчеосты шунто — уго кышкыт суретъёсты нуыны луоз, куронъёсты рос-прос чакласа гинэ. Бӧрысь та бакъёсты машинаосын ворттозы Ленинград улосысь полигонэ. 5-тӥ апреле нырысетӥ машинаос сюрес вылэ потозы шуыса. Транспортлэсь мынэмзэ чаклалозы МЧС-ын ужасьёс — котькуд улосын та грузэз киысь кие сётъялозы.

Президент пыриськиз ёрос администрациын радъям кенешонэ. Татын вань люкаськемъёслы выль ивор сётӥз МЧС-лэн Удмуртиысь управлениеныз кивалтӥсь Пётр Фомин. Со верамъя, кылем-мылем ядъёсты утялтон но районысь келян йылпумъяськыны кулэ 25-тӥ апрелёзь.

Балезиноос уло осконэн, вань ужъёс дыраз быдэстэмын луозы шуыса.

Алёна Ионина.

Удмурт Дунне
By Удмурт Дунне 30 марта, 2012 09:56