Шуръёс усьтӥсько

Удмурт Дунне
By Удмурт Дунне 30 марта, 2012 09:42

Шуръёс усьтӥсько

Инкуазь узырлыкъёсъя но инкуазез утёнъя министр Михаил Кургузкин журналистъёсты тодматӥз туэлы чаклам ужпумъёсын.

— 2011-тӥ арын ми быгатӥм Правительствоен чаклам ужрадъёсты быдэстыны, — пусйиз Михаил Георгиевич. — Быдэсак ортчытэмын ву кыскон интыосъя инвентаризация. 217 интыысь ву кысконэз дугдытыны косэмын. Азьло аръёсы сямен ик, министерство азьланьтоз музъем узырлыкъёсты (эгыр, гыбед, луо, кӧльыен луо, сылало вуос но мукет) утчанзэ, шараялоз сиён-юонлы мынӥсь но хозяйствоын кутӥськись вуосты.

Удмуртиын 2012-тӥ арлы инкуазез утёнлы висъяны чакламын 118 миллион манет (2011-тӥ арын 63 миллион вал). Та коньдон мыноз вуэз шыръяса уже кутонлы но утёнлы, гидросооружениосты тупатонлы, инкуазез утёнъя дышетонъёслы, Дэри ёросысь Чуньыгурт дорысь муосты умоятонлы. Отысь поттэмын но палэнэ келямын луоз 300 тонна дуст. Солы висъяськоз 34,5 миллион манет. Озьы ик ужалоз 2011-тӥ-2015-тӥ аръёслы чаклам «Чылкыт ву» но жуг-жагез утялтонъя программаос. Жагез интыянъя ужъёс республикаын та дырлы Вотка но Глаз городъёсын гинэ рос-прос радъямын. Туэ со уж борды мукет интыосын но басьтӥськозы.

2012-тӥ арын министерство чакла Ува ёросысь Ирейка, Пичи Пурга ёросысь Постолка шуръёслэсь пыдэсъёссэс чылкытатыны. Озьы ик сузяно Вотка городысь Вотка тыметлэсь Берёзовка ву люкаськон интызэ. Тупатоно на Алнаш ёросысь Варӟи тыметэз но Камбарка тыметлэсь ву лэзьянзэ.

Иж тыметлэсь ярдуръёссэ тупатъяно но шулдыртоно. Юнматэмын ни 1,6 километр ярдур. Ужъёс нуиськозы на Киров нимо парк дорын — 1 километр 152 метр ярдурез тупатонлы федерал бюджетысь висъяськоз 377 миллион манет, республикалэн кисыысьтыз — 152 миллион манет.

Тудвуэз лэзёнлы дасяськыса, эскеремын 33 инты, ӧръяськем вуэз пумитанлы дась ӧвӧл 11 объект. Ёросъёсысь эскеремын 104 гидроузел, кышкыт учыръёслэсь утиськонъя бригадаос кылдытэмын 50-аз. Шуръёс усьтӥськыны кулэ 15-тӥ апрельысен 24-тӥ апрелёзь. Али сылӥсь куазь тудву ласянь бадӟым сюлмаськонъёс уг кылдыты. Уйин кезьыт, нуназе шуныт улэмен, лымы каллен шуна.

Но медаз луы вылэм 1979-тӥ арын кадь. Соку Позимь но Иж шуръёс ӧрысьтызы потыса, Ижысь Первомай ёросысь уно урамъёс вуэн шобырскизы. Куд-ог интыосын ву 2 метрозь но ӝутскылӥз.

Туэ поттыны дась ини Удмуртилэн Горд книгаез. Нырысетӥез таӵе книга адямиос кие вуиз вал 2001-тӥ арын.

Иван Аркашев.

Удмурт Дунне
By Удмурт Дунне 30 марта, 2012 09:42