Удмурт драматургилэн вуж но выль висёнъёсыз

Удмурт Дунне
By Удмурт Дунне 14 марта, 2012 12:26

Кылем арын Лулчеберетъя, печатья но иворъёсъя министерство но Удмурт театр кичӧлтэмъя радъямын вал выль удмурт драматической произведениослы сӥзем вожвылъяськон. Отчы вань мылкыд карисьёс ас ужъёссэс ыстыны быгатӥзы, валтӥсь куронэз одӥг гинэ вал: гожтос одно ик удмурт кылын луыны кулэ.

Туннэ нуналлы йылпумъянъёс лэсьтэмын ини, вормисьёслэн нимъёссы но тодмо. Нош вормонъёс, меӵак вераса, бездытэсь, соин конкурсэ вуэм ужъёс сярысь малпанъёсме шараяме потӥз. Мон уг гожтӥськы рецензия, соин нимаз-нимаз авторъёслы но соослэн ужъёссылы дунъет уг сётӥськы. Туала удмурт драматургия сярысь мылкыд-малпанъёсме обзор-эссе амалэн радъяй.

Лыдӟи дас кык драматической произведение. Пай-мытӥз соослэн жанр ласянь пӧртэмлыксы: крезьгуро выжыкыл, водевиль, фантастика, драма, пьеса, мюзикл, трагикомедия, притча, удмурт фольксштюк (калык улонэз возьматӥсь серемес яке пыӵкылӥсь пьеса, асэстэмын немец драматургиысь). Озьы нимало ужъёссэс асьсэос драматургъёс, нош тупало-а текстъёссы пуштроссыя та жанръёслы — соиз ини мукет ужпум. Ӵемысь — уг, озьы ке но мон синмаськи гожъясьчиослэн выль жанръёс котыртӥ бергамзылы, выльзэ веръяны дӥсьтэмзылы. Кутсконэз вань бере, оло, куке но кинлэн ке но мар ке но пӧрмоз. Со дыре ик вуж тодмоме сямен возьмай дышем мелодрама жанрен гожтэм произведениез, но сыӵеез ӧй вал. Туж жаль. Соку малпай: вылез сьӧры гинэ нуйтӥськыса, гогымес ум вырӟытэ меда?

Мукетыз паймонэ: ӝы-ныезлэсь ятыр ужъёс гожтэмын пенсионеръёсын, кылемъёсыз пӧлысь самой егитэзлы авторлы ог 40 арес. Та лыдпусъёс, жаляса верано, синучкон пыр кадь возьмато быдэс туала удмурт литературалэсь (культуралэсь) тусбуйзэ. Мон тодӥсько: асьмелэн егит гожъясьчиосмы вань, нош соос малы ке но юромо асьсэды пумит пукто арлыдоослы, азьлозэ курласа-тӥяса, ӧчкарыса кадь массовой культура шуон ӧрез гинэ азинто. Литератураын (драматургиын но) преемственность чылкак вунэмын яке кулэтэм арбери кадь кыдёке сэрпалтэмын. Юоно ошмесамы ум сялаське меда?

Зэмзэ верано ке, удмурт драматургилэн туала висёнъёсыз кемалась тодмоесь. Нырысь ик, авторъёс ӵемысь кужмо драматургической конфликт кылдытыны уг быгато. Зэмос конфликтлэн шорсюлмыз — лэчыт ужпум, кудзэ сэрттон-пертчон бордын «жугисько» характеръёс. «Жугисько» вераськыса, диалог амалэн, сое «кылож» яке «кылшудон» шуыны луэ. Тросаз текстъёсын диалогъёс огшоры вераськон-супыльтонлы кельшо («кыложлэн» шӧмыз но ӧвӧл), озьыен, геройёслэн аспӧртэмлыко характеръёссы син азе уг пуксё, уг висъясько, конфликт, кӧня ке чильпыраны кутскыса, улӟытэк ик куашка. Нош драматургической произведение пӧрме рольёсъя гожтэм нуйтэм верослы.

 

* * *

Кыкетӥез висён: ӝутэм темаос но ужпумъёс вылтӥз-вылтӥз гинэ яке кемалась дышем кабъёсъя суредамын, куддыръя соос осконтэм малпаса (фальшиво) яке ӧсконо кадь гольтрес возьматэмын, соку ини драматургичес-кой текстысь интрига ыше, со лыдӟисез (учкисез) бордаз уг ни кыскы. Лыдӟисьлы мӧзмыт. Куд-огзэ произведениосты лыдӟыкум, мон аслэсьтым юалляй: «Кинъёс понна но малы та гожтэмын?» Текстъёсысь ялан утчай вапумлэсь шокамзэ яке сыӵе удмурт шӧмзэ, кудӥз геройёслэн нимъёсынызы яке удмурт дӥсен гинэ ӧвӧл герӟаськемын, со мургес, со пыӵамын выросъёсы, сямъёсы. Жаляса верано, сыӵе тодметъёс туж шер пумиськылӥзы.

Веранме одно ик примеръёсын юнматэме потэ. Кык-куинь произведениын ӝутэмын удмурт литература понна кемалась тодмо ужпум: гуртэз но карез ваче пумит пуктон. Та тема кемалась шараямын ини кылбуретын но (Ф. Васильев, А. Белоногов, М. Федотов, Р. Миннекузин), прозаын но (В. Ар-Серги, О. Четкарёв, Г. Перевощиков). Гурт (удмурт гурт) яке инкуазь одно ик «плюс» (умой, шекъёстэм) пусэн возьматэмын луэ, нош кар (ӟуч кар), цивилизация — «минус» (урод, адямилыкез, удмуртлыкез быдтӥсь) пусэн. Конкурсэ ыстэм ужъёслэн авторъёссы но та лёгем сюрестӥ ик вамышто: гуртысь каре лыктэм геройёссы я проституткалы, я лушкаськисьлы, я лулзэ но вузаны дась луись вузчилы, барыш поттӥсьлы пӧрмо. Нош произведениос йылпумъясько «хеппи энд» амалъя: геройёс выльысь берытско вордскем гуртазы, озьыен, отын соос чылкытатскозы. «Примитивно» — нырысетӥез кыл, мар лыктэ йырам. Валасько: «гурт — кар» пушкын удмуртъёс понна зэмзэ но туж бадӟым конфликтэз вань, но со конфликтэз проституциен яке вузаськонэн гинэ герӟан — туж сюбег но вылтӥз-вылтӥз гинэ учкон. Собере туала гуртэ бертон но — со конфликтэз сэрттон-пертчон луэ-а меда? Угось туала гурт — со ачиз огыр-бугыр инты. Малпай: мон луысал ке драматург, гожтысал, дыр, кызьы пичи гуртысь потэм пияш (нылаш) тодосъя доктор (профессор) яке, шуом, президент, дуннелы тодмо суредась луэ. Пушласянь возьматысал, кы-ӵе «университетъёсты» солы ортчоно луиз карын улонын ас интызэ шедьтон но адямилыксэ (удмуртлыксэ) ыштонтэм понна. Оло, куке но гожто ай. Оло, мукетъёсыз та сюжетэз улонэ пыӵатозы?

 

* * *

Тросэз произведениос сӥ-земын гурт улонлы, шонерзэ вераса — гуртъёслэн бырон калэ вуэмзылы. Лэчыт ужпум? Шонер. Нош суредамын со ужпум вуж сямен, вылтӥз: я гурт интые водохранилище лэсьтыны туртто (туала гуртъёс водохранилищетэк но быро, собере, водохранилищеен герӟаськем сюжет 1970-тӥ аръёсы Е. Загребинлэн «Асьмелэн со одӥг» пьесаяз пыртэмын ини), я гуртын Кавказысь адямиос кузёясько (тани одӥг гожтосысь герой юа: «Малы ӟуч воргорон «сьӧдлэсь» берпалзэ нюлэ?») Асьме адямиосты но «сьӧдъёсты» ваче пумит пуктон — со лэчыт ужпумлэн инъетэз яке шукыез (причина или следствие) меда? Кавказысь потэм геройёсты суредан туала удмурт драматургиын модалы пӧрме ни кадь (куиняз ужын соос возьматэмын).

Совето вакытысь колхоз ужен герӟаськем произведениос но вал. Соосты лыдӟыса, тодэ лыкто Вольтер философлэн кылъёсыз: «Все жанры хороши, кроме скучного». Туж мӧзмыт но осконтэм соос гожтэмын. Тани одӥгаз пьесаын возьматэмын, дыр, 1980-тӥ аръёс (гуртын газ пыртэмын ини), нош одӥгез герой, тракторист, бусыын «пельпум ваменаз чемпион луэмзэ возьматӥсь лентаен» ужа. Мон таӵелы уг оскиськы, нош тӥ? Со герой ик бусыын ужан висказ сюлэм гажанэзлы яратонэз сярысь тазьы вера: «Кыӵе мон мусоясько вал тынэсьтыд лёгыса кельтэм пытьыостэ…» Таӵе вераськон манер тодэ вайытэ войналэсь азьвыл кылдытэм фильмъёсты («Волга, Волга», «Кубанские казаки») яке 1930-тӥ аръёсысь удмурт драматургиез но прозаез.

Кыл ласянь эшшо мае пусъеме потэ: куддыръя авторъёс уг быгато герӟаны геройёссылэсь арлыдзэс но вераськон-малпаськон сямзэс. Возьмато сое таӵе пример вылын.

Одоть: Ноутбук шуонзэс я адӟылӥ ни ай, тӥни Кузьмичлэн но контораяз сылэ, машинаослэсь кытчы мынэмзэс чакла. Нош Интернет — со мар сыӵе?

Маша: Ӧйтӧд, кызьы меда валэктод. Огкылын, ивор куды. Зӥбиськод но, компьютерын книга усьтӥське. Коть лыдӟы, коть гожъя. Кылсярысь, печатласькод: кытчы ышизы латинъёс? Минут улыса, тыныд валэктон вуэ. Мар утчад, ваньмыз шедёз.

Одоть: Пунымы но сюроз-а?

Маша: Кыӵе пуны?

Одоть: Ма, кучапимы пегӟиз вал, Дуська.

Маша: Уз, мама, Дуська уз сюры. Всё, кошки мон чемодан бичаны.

Одоть: Валантэм маке со Интернетсы, олоку бырем латинъёсты шедьтэ, а кучапимес — уг.

Кызьы малпаськоды, кӧня арес Одотьлы? Автор ачиз ӧй пусйысал ке, мон малпасал: 70 яке солэсь ятыр аресъем 3-4 класс дышетскем песянай. Нош произведениын шуэмын: Одоть — ог 50 аресъем кышномурт. Туала ог 50 аресъем нылкышноос, гуртын улӥсьёсыз но — дышетскем, визьмо адямиос. Малы соосты, юромо пересьмытыса, серем карыса возьматоно — уг валаськы.

Тани таӵе пӧрмиз обзор-эссе шуонэ. Оло, со кинлы ке висёнъёсызлэсь эмъяськыны юрттоз?

Вера Пантелеева, кылосбур тодосъя кандидат.

Удмурт Дунне
By Удмурт Дунне 14 марта, 2012 12:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<