Солдатлэн туганэз

Удмурт Дунне
By Удмурт Дунне 13 марта, 2012 10:40

Солдатлэн туганэз

Михаил Драгунов.

Быдэс дуннелы тодмо оружейникъёсмы асьмелэн трос. Одӥгез соос пӧлысь — Евгений Фёдорович Драгуновлэн пиез — Михаил Драгунов. Та нуналъёсы Ижысь механикая заводысь валтӥсь инженер-конструктор, наука удысысь дано ужась, Ижысь техникая кун университетысь доцент Михаил Евгеньевич 65 арессэ пусъе.

— Тӥ атайдылэсь, песятайдылэсь мытэм ужзэс азинтон вылысь конструктор луиды-а яке пыӵал тӥрлык зэмзэ но сыӵе тунсыко потӥз-а?

— Котькуд пияшлэн, шудон пистолетэз адӟыса ик, синъёсыз ӝуаны кутско, дыр. Ми но 50-тӥ аръёслэн шоразы кыӵе ке открыткаысь автоматэн солдатэз синйылтӥм. Лушкем ог-огмылы вераллям: тодӥськод-а, вань, пе, АК автомат. Дас аресам мон тодӥ, атае ож тӥрлык кылдытон бордын ужа шуыса, паймонэ быронтэм вал. Малы ке шуоно дорын уж сярысь со ӧз вераськылы. Атае, усто пӧйшурась сяна, зол спортсмен вал. Удмуртилэн сборнояз но кутэмын. Со ик милемыз, монэ но Алексей вынме, черлатӥз спортэн но ыбылӥськонэн. Валамон ини, атайлэсь адӟем каронмы вал, но та удыс зэмзэ ик тунсыко ӧй потысал ке, кыкмы ик конструктор ӧм луысалмы, дыр.

— Маиныз-о пыӵал тунсыко луыны быгатэ?

— Кышномуртъёслы, оло, со валантэм, но ож тӥрлык котыр ласянь тунсыко. Нырысь ик, пыӵал — туж усто физика. Ыбонлэн ӝоглыкез ик паймытэ ини. Татын ваньзэ пыр-поч чаклано, чотано. Котьма мед шуозы, пыӵал со — искусство но, утиськон но, пӧйшуран но, спорт но.

— Кин ке киын кышкыт кивалтос но.

— Пыӵал — ожгар ужпумез быдэстон тӥрлык. Цивилизацилэн огез люконтэм ёзэз. Вашкала адями пӧйшуръёсты вормиз кивалтослы луыса. Кужыммыя асьмеос ӧжыт гинэ золэсьгес лудкечлэсь я ӟичылэсь. Кионэз, гондырез гольык киын вормыны ум быгатэ ни. Нош улонын пӧртэм кышкытлык кылдыны быгатэ. Соин ик кунлы, котькыӵе власть мед кивалтоз, одно ик кулэ луоз ож тӥрлык. Озьыен, конструктор-оружейниклэн профессиез — даурлы.

— Атайдылэсь нимтулзэ верало ке, нырысь ик син азе пуксе СВД винтовка.

— Бен, со 30 пала ож тӥрлык малпаз ке но, быдэс дуннелы тодмо луиз снайпер винтовкаез. Та вормонэз мыным али ке но паймымон потэ. Со туж вакчи дыр куспын лэсьтэмын но армие пыŸатэмын вал. Атай та борды кутскыку, вал ини мукет тодмо конструкторъёс — Ковровысь Александр Константинов, Сталин премилэн кык полэс лауреатэз Сергей Симонов. Но удалтӥз Евгений Драгуновлы. Малпасько, солы юрттӥз ыбылӥськон спортэн эшъяськемез, философиез, уй но нунал тыршемез.

— Нош Михаил Драгуновлэн нимтулыз кыӵе пыӵал тӥрлыкен «чузъяське»?

— Вормонъёсы сокем трос ӧвӧл. Аслым дуно потэ пистолет-пулемёт «Кедр» (нимаське — Евгений Драгуновлэн конструкциез). Та уж борды басьтӥськиз вал атае, но 1991-тӥ арын улонысь кошкиз. Пистолетэз йылаз-пумаз вуттӥ мон. Озьы ик кылдытӥ «Клин» пистолет-пулемётэз. Вань тунсыко проектэ — пӧйшуран карабин. Ӵапак солы синмаськиз Казахстанысь кивалтӥсь, заводамы вуылыкуз. Табере мынам карабинэ Нурсултан Назарбаев Президент киын но вань ини. Механикая заводын ужам сяна, тыршисько ИжГТУ-ысь ыбылӥськон ож тӥрлыкъя кафедраын. Соин, лэся, ӵош ужась эшъёсы монэ дышетӥсез сяменгес адӟо.

— Асьтэос кызьы шӧдӥськоды: тӥ тросгес конструктор, дышетӥсь, журналист?

— Пичиен-пичиен ваньмыз. Мон Т-34 танк выллем. Война дыръя со туж юрттӥз, броняез сокем зӧк ӧй вал, двигателез но лябгес вал ке но. Мон но озьы ик. Студентъёсты визьмаса, аслэсьтым тодон-валанме будэтӥсько, уго трос лыдӟиськоно луэ. Лекциос юртто конструктор удысме но муромытыны. Кунгож сьӧрын потӥсь журналъёсысь ож тӥрлык но оборона сярысь статьяосты немец но англи кылысь берыктӥсько ӟуч изданиослы. Уждун вӧзы ватсэт, кылме волятэм сяна, туж трос выльзэ тодӥсько.

— Озьыен, вераны быгатӥськоды, кыӵе ож тӥрлык дуннеын луоз, ог 30 ар ортчыса?

— Вакчияк верано ке, эшшо визьмогес — шуом, кыӵе ке пыӵал пичи компьютер выллем. Со ачиз мерталоз, чаклалоз, быръёз, кытчы ыбоно, кыӵе патрон кулэ, кудпала мертаськоно. Умой пыӵал тӥрлык тупаны кулэ солы, кинлы чакламын. Тӥ ведь тустылы, мугордылы но арлыддылы тупасьтэм дэрем уд дӥсялэ, быръёды котыр ласянь кельышлызэ. Татын но озьы ик. Ожгарчилы но автоматэз кельшыны кулэ. Юнме шуиллямтэ, дыр: солдатлэн туганэз — винтовка. Уго котьку вӧзаз, яратоно нылзэ сямен сое гадь бордаз ӝиптэ, оске, чакла.

— Таиз ар шаерамы ялэмын пыӵал тӥрлык поттӥсьлэн ареныз. Конструкторъёс сое кызьы ке шӧдо-а?

— Нокызьы но уг. Но умой луысал, удысмес азинтыны та ар юрттысал ке. Ож тӥрлык лэсьтон производство вить валтӥсь люкетлэсь кылдэ: корт, ужась киос, визь (инженеръёс-конструкторъёс), биньгозы (менеджеръёс) но кивалтӥсьёс. Одӥгез ёз шальтра ке, быдэс удыс курадӟе. Кортмы асьмелэн вуж, ярам, станокъёсты выльдыны-басьтыны луэ. Нош ужась киосын мар? Ёрмиськом соослы. Телевизор пыр азьло андан ӵыжатӥсьёсты, скал кыскисьёсты, крановщикъёсты возьмато вал, табере — шоу-бизнес шуон. Егитъёслэн потэ шуак узырмемзы. Соос заводэ ужаны уг мыно, дышетскыны пыро юристэ. Инженеръёсмы кошко кунгож сьӧры. Кадръёсты ум будэтӥське. Вылаз ик, конструкторъёслэн, озьы ик заводысь мукет ужасьёслэн уждунзы туж пичи. ИжГТУ-ысь ыбылӥськон ож тӥрлыкъя кафедраысь профессоръёслэн шоро-куспо арлыдзы 60 арес. Шуом, ужалозы на соос ог 10 ар, нош собере мар? Соин ик оборона удысэз одно азинтоно, югдурез тупатоно, США туж трос коньдон висъя талы. Асьмелэн мукет сяменгес. Азьло конструкторъёс конкурс, кун заказ чотын тыршизы. Нош табере куд-огезлэн верамзы потэ: тӥ нырысь малпалэ, лэсьтэ, эскере уж вылын. Собере ми чаклалом, умой-а пыӵал тӥрлыкты. Нош сое бичаны коньдон кулэ ук! Соин ик заводэ но пинал специалистъёс уг дырто, егит оружейникъёс но, одӥг-кык ар ужаса, кошко.

— Ваньмыз сокем урод шат?

— Мон огъя югдур сярысь. Но вань визьмо, егит конструкторъёс, кинъёслы та удыс туж тунсыко. Соос трос ӧвӧл, но шоразы учкыса, малпан кылдэ: таослэсь пайда потоз. Мон студентъёслы шуисько: вакыт но политика шоры учкытэк, оружейник-конструктор историе аслэсьтыз нимзэ кельтыны быгатэ.

— 65 арес — бадӟым юбилей-а?

— Мон понна юбилей — 50 яке 75 арес. Арлыд ласянь учконо ке, валамон: 16 арес ӧвӧл ни. Но ӵапак али асме шӧдӥсько: тодон-валанэ, ужаны быгатонэ тырмыт ини. Дыр гинэ ялан уг тырмы. Нош малпанъёс трос. Мон котьку но ас азям бадӟымесь планъёс пуктылӥ. Уго макем бадӟым ужпумез чаклалод, сокем тросгес лэсьтод. Озьы ужаз мынам атае. Со нырысь ик азяз чурыт куронъёс пуктылӥз. Эшъёсыныз но, дорын семьяен но лякыт, ӟеч вал, нош ужын ассэ ӧз жаля. Адямиосты ноку ӧз ултӥя. Мае ке валэктоно, кинэ ке визьмано ке, серем амал, вӧсь карытэк гинэ. Соин ик ӵош тыршись эшъёсыз но атайме туж гажазы.

— Тӥ кыӵе адямиосты гажаськоды но кы-ӵеосыныз кусып уд возиське?

— Нырысь интыын — адямилэн чылкытлыкез — ужын, улонын, малпанъёсаз-мылкыдъёсаз. Кыӵе солэн сюлмыз, одно ик шараяське. Туж уг яратӥськы чеберъяськись, вузаськись муртъёсты. Озьы ик асьсэды визьмо карись донгызъёсты.

Галина Семёнова.

Удмурт Дунне
By Удмурт Дунне 13 марта, 2012 10:40