Сазь уйёс

Удмурт Дунне
By Удмурт Дунне 30 марта, 2012 09:48

Кылем арын улонэ пыӵаны кутскиз кудӟытӥсь юонъёсты вузан сярысь закон. Соя вань алкоголь юонъёсты вузаны лэземын ӧвӧл 22 часысен 10 часозь. Вуз карон интыосты чаклало Югдурез утёнъя, Вуз каронъя но калыклы юрттэт сётонъя министерствоос. Шӧдӥське ни-а та законлэн пайдаез?

Республикаысьтымы Вуз каронъя но калыклы юрттэт сётонъя министерство ивортэ: кудӟытӥсь юонъёсъя рынокез радъяны ӟеч амал — лицензия сётон. Сотэк угось курытэныз вуз карыны уг яра. Кылем ар куспын алкоголь юонъёсты вузаны лэзись 712 лицензия сётэмын, эскеремын 1 сюрс 400 пала вуз карон интыос, кафеосты-ресторанъёсты чакланъя 22 ужрад ортчытэмын. Кык лицензия таламын, угось басьяськисьёслы ӵектӥськись юонъёс лушкем поттэмын вылэм.

Нош кыӵе ужрадъёс кутӥсько кудӟытӥсь юонъёсты уйин лушкем вузасьёс пумысен? Вуз каронъя но калыклы юрттэт сётонъя министр Пётр Пономарёв валэктэ:

— Министерствоысь специалистъёс кусып возё ёрос администрациосын — соос но интыосын чаклало алкоголь рынокез. Та дырлы вераны луоз: законлэсь куронъёссэ тӥян пумысен 4 ужбергатӥсь вылэ административной уж ӝутэмын, 14 сюрс манет пала тыриськон лякемын.

Министр ӧз ваты: кудӟытӥсь юонъёсты вузанэз эскерон шаерамы секытэн радъяське. Кылсярысь, Татарстанын та уж борды юнматэмын 115 специалист, нош асьме дорын тырше 20 пала адями. Быдэс шаерысьтымы югдурез чакласа возён понна та лыдпус, валамон, туж ичи. Пётр Пономарёв пусйиз: та пумысен вазиськыны чакласькомы Кун Кенеше — таӵе полномочиосын специалистъёсты дасянэз но ужатонэз радъяны мед быгатомы.

Зэм но, Кун Кенешысь депутатъёс рос-прос басьтӥськизы ни алкоголь рынокез чаклан борды. Матысь дыре соос вазиськыны чаклало Кун Думаысь депутатъёслы. Џектонъёссы дасесь ини. Кылсярысь:

— курыт юонъёсты сямен ик, сурез но вузаны лэзись лицензия юнматоно;

— 100 миллилитр ӟенеликъёсын вузаськись курыт юонъёслы но акциз пуктоно — соя бюджетэ люкаськись коньдон йылоз;

— кудӟытӥсь юонъёсты лушкем яке лицензитэк вузасьёслэсь, озьы ик паркъёсын, шутэтскон интыосын ӟенеликъёсын поръясьёслэсь кылзэс чурытгес юано;

— спирт вылын лэсьтэм суретъёсты аптекаосын вузанэз пытсано;

— тамак вузанэз но, кудӟытӥсь юонъёсты сямен ик, кулэстоно.

Зэмзэ вераса, кудӟытӥсь юонъёсты вузанэз кулэстон сярысь федерал законъя улосъёслы сётэмын куронъёсты ас мылкыдзыя тупатыны луонлык. Кылсярысь, Ульяновск улосысь калык кудӟытӥсь юонъёсты басьтыны уг быгаты ӝыт 8 часысен ӵукна 10 часозь. Улосъёслы эрик сётэмын ке но, асьме депутатъёслэн дасям ӵектонъёссы федерал депутатъёсын юнматэмын луыны кулэ — кыӵе ке нимысьтыз законъёсын яке законъёсы пыртэм воштонъёсын. Оском: Удмуртиысь депутатъёсты Кун Дума матысь дыре кылоз.

Кудӟытӥсь юонъёсты вузан дырез кулэстонъя законлэн бадӟым пайдаез сярысь вераны вазь на. Угось быдэсъяськыны со кутскиз ай кылем ар пумын гинэ. Но лыдпусъёс возьмато ни югдурлэсь ӟеч пала воштӥськемзэ. Кылсярысь, сюрес вылын луэм шудтэм учыръёсъя: валля арын кудӟем водительёсын йырин 155 шудтэм учыр пусъемын, кылем арын — 118. Курытсэ ӟамыртэм пешеходъёс но машина питран улэ ичигес шедьылӥзы: 2009-тӥ арын шудтэм учыре сюриз 52 кудӟем мурт, кылем арын — 33. Закон пыӵаны кутскем бере уйин курытсэ утчаса ветлӥсьёслэн лыдзы ичигес луиз.

Приволжск федерал округысь улосъёс пӧлын Удмурт шаер кылем арын нырысетӥ интыын вал курыт юонъёслэсь шугомон учыръёсъя: 100 сюрс адямилы 183 учыр. Россиын та лыдпус 48 вылын возиське, Нижний Новгород улосын — 100 сюрс муртлы 7 учыр.

Лыдпусъёс возьмато тазэ но: йыружъёслэн лыдзы кулэсмиз. Тужгес но — быдэ вуымтэос пӧлын. Тросэз егитъёс угось юэм йырынызы валатэк ик кылё кырыж сюрес вылэ султэмзэс. Кылсярысь, Кизнер ёросын 2010-тӥ арын административной кыл кутон улэ (лэзьымтэ интыосын курытсэ юэмзы, порядокез тӥямзы понна) кыскемын 6 мурт. Со пӧлысь 4 учыр шараяськиз уйин. Кылем арын та районын ик кылзэ юазы 3 быдэ вуымтэ пиналлэсь. Таӵе учыръёс уйин шараямын ӧвӧл ни. Та выллем ик югдур Вавож, Каракулино, Камбарка, Ува ёросъёсын. Огъя вераса, валля арын быдэ вуымтэосты административной кыл кутонэ кыскон 724 учыр вал ке (со пӧлысь 207-ез — уйин), кылем арын та лыдпус усиз 469-озь (136-ез — уйин). Республикаысьтымы наркологияя диспансерлэн кивалтӥсез, Кун Кенешлэн депутатэз Татьяна Карлова оске: кудӟытӥсь юонъёсты вузанэз кулэстонъя законлэн ӟеч емышъёсыз азьланяз эшшо золгес шӧдӥськозы.

Елена Никитина.

Удмурт Дунне
By Удмурт Дунне 30 марта, 2012 09:48
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<