Кырӟазы жон-жон

Удмурт Дунне
By Удмурт Дунне Март 13, 2012 10:21

Кырӟазы жон-жон

Брангуртысь песянайёс «Евровидениысь» ваем дипломен.

Брангуртысь кырӟась песянайёс Москваысь — «Евровидение» ӵошатсконысь — вуизы 10-тӥ мартэ. Агрызын соосты пумитазы нылпиоссы, внукъёссы, журналистъёс. Чебер сяська керттэтэн вуиз Россиысь Президентлэн Удмуртиысь приёмноезлэн аппаратэныз кивалтӥсь Светлана Смирнова. Брангуртын но клуб азе тачак калык люкаськиз.

«Евровиденилэн» кизилиосызлы шутэтскыны кылдӥз одӥг нунал гинэ. Толон — 12-тӥ мартэ — Брангуртэ нош ик вуизы иворчиос. Песянайёс таӵе пумиськонъёслэсь-вераськонъёслэсь жадемын ни ке но, уг возьмато. Котькыӵе куноосты пумитало ӝӧк выл тыр сиёнэн: сылалтэм киярен но кубистаен, пыжем картофкаен, перепечен, пӧсь чаен, емышъёсын.

— Ӵошатсконэ ми 28-тӥ феврале ик кошким, — вера «Брангурт песянайёс» ансамбльлэн чеберлыкъя кивалтӥсез Ольга Туктарева. — Мукет нуналаз полуфиналэ пыриським. 39 мылкыд карисьёс пӧлысь бырйизы 25-сэ.

«Евровидение» мынонзы сярысь песянайёс тодӥзы ни вал кылем арын октябре ик. Но та сярысь шара поттылыны ӧз дыртэ. Зулемлэсь азьло ужано ай, пе. Шонерзэ вераса, пӧсяно ик луиз.

Сцена вылэ потон кырӟанлы гур гожтӥз шуо-бизнесын тодмо композитор Виктор Дробыш. Ольга Туктареваен ӵош крезьгурчи доры мынӥз на песянайёслэн старостазы Галина Николаевна Конева. Крезьгурез кылзыса, Галина Николаевна ӵогиз: «Мон тае уг кырӟа, та мыным уг кельшы».

— Бӧрдыны кутски, мар-о милемыз возьытэ уськытыны малпаськод шат? — вера шаплы Конева.

Дробышлы валэктон вылысь удмурт нылкышноос асьме гуръёсты нёжъязы. Композитор пумен кылзӥз, фортепианолэсь клавишаоссэ зӥбылӥз. Озьы кылдӥз крезьгур. Кырӟанлы кылъёс удмурт кылын гожтӥз Ольга Туктарева. Бӧрысь уката секыт вал. Удмурт кылын кырӟано куплетъёс понна нюръяськоно луиз на. Шоу-бизнесын акула кадь уясь Дробыш кырӟанлэсь кутсконзэ ик англи кылын мытыны куре вал.

— Секыт, дышетыса уз вуттэ, сюлмысь кырӟамзы уз луы, — крезьгурчиен кенешыны быгатӥз Ольга Николаевна.

Озьы бадӟым сцена вылын нош ик чузъяськиз удмурт кылын кырӟан. Куплетъёс вискын — англи кылын «Party for everybody! Dance!» («Юмшан ваньмыз понна! Экты!»).

Мае малпазы — ваньзэ сцена вылын возьматыны ӧз вуттэ. Уго песянайёс чаклало вал на перепечен куноятыны.

Кырӟан быриз гинэ — оператор бадӟым планэн возьматӥз жюриын пукись муртэ. Ым тросаз таиз эшезлы «Это бомба!» шуыса вера. Зал султӥз, учкисьёс чабо, шулало, «Браво!» кесясько.

Ӵошатсконлэн куронъёсызъя Москваысь сцена вылэ ваньмыз ик песянайёс потыны ӧз быгатэ — 6 муртлы гинэ сюрес усьтӥськиз. Доразы кылизы кыкез нылкышноос. Дородова Зояпай шуиз: мон азьлояз ветлӥ, табере мукетъёс мед мынозы. Мукетыз кырӟась — Алевтина Бегишева — больницае шедиз.

Нош Бакуэ «Евровидение» мынозы ваньзы ик — 8 кузя. Зэм, кыкез кылёзы сцена мышкы — но таиз понна кӧтсы ӝож уз луы, уго песянайёс — огъя команда.

Песянайёсты вожвылъяськонлы дасян понна сюлмаськоз «Россия» телеканал. Ӵошатсконэз радъясьёс ӟеч малпанэ вуизы: кырӟасьёсты соос Москвае уз ӧте, юрттыны-визьманы асьсэос Брангуртэ лыктозы.

Алёна Ионина.

Удмурт Дунне
By Удмурт Дунне Март 13, 2012 10:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<