Константин Орлов: «Возьматоно, кин кузё!»

Удмурт Дунне
By Удмурт Дунне 28 марта, 2012 15:09

Константин Орлов: «Возьматоно, кин кузё!»

Константин Орлов.

Ижкарысь диджей но клуб промоутер Константин Орлов кӧня ке ар талэсь азьло туж тодмо луиз: шоркарысьтымы электрон крезьгур сценаез азинтон но узырмытон понна нюръяськиз. Тросэз егитъёс солы тау шуыны быгатозы, угось со Петров диджейёс, Андрей Буров но мукет «аксакалъёс» выллем туала крезьгуро Ижкарлэсь туссэ лэсьтӥз. Сыӵе дыръя паймоно, адямилэсь удмурт луэмзэ тодыса. Константин анай кылыныз уг вераськы ке но, шӧдскымон тунсыкъяське удмурт дуннеен. Таин сэрен шугъяськытӥсь малпанъёссэ шараяны мылкыдыз бурдъяськиз — пумиським-вераським.

— Вань огъя тодмомы — электрон крезьгурчи Андрей Корепанов, кудӥз ке нимзэ Андрей Рублёвлы воштӥз. Тазьы ӟечгес кылӥське, пе. Тон уд-а возьдаськиськы удмурт луэмедлэсь?

— Уг, берло дыре выжыосы мыным тунсыкогес но тунсыкогес пото. Вордӥськи мон Ижын, атае Дэри ёросысь Люлиысь, анае Мунчогуртысь. Паймымон интыос! Отын котьку но пилемо… Зэмзэ вераса, удмурт дунне бордаз кыскиз берло вакытэ: 2007-тӥ арын Мускоын удмурт диаспораен пумиським — «Made in udm» ужрад вал со. Соку мон шӧдӥ но валай, макем мыным улонам уг тырмы удмуртэз! Потӥз суредаме удмуртъёслэсь чебер ӵуказе нуналзэс. Удмурт культураез но азинтыны мылкыды кылдӥз, аслым ӧтён но малпай: «Татын асьмеос кузёос!» Кин дорамы ожгар тӥрлыкен вуоз — аракы-кумышкалэсь погралоз (серекъя). Корепанов-Рублёв сярысь ке… Со ассэ ӟуч кожа ук: марлы солы, ӟуч адямилы, удмурт фамилия? Луэ куддыр сыӵе ним сураськон. Кылсярысь, анаелэн уж дураз ужаз Бриджит Вахрушева!

— Ачид кытын ужаськод? Диджей — со сюдӥсь профессия ӧвӧл, дыр.

— Мон инженер. Быдэс улонме техникаен, компьютеръёсын вырисько. Вуз карон лавкаосын машинаос тупатӥсько, али тани Ижкарын нырысетӥзэ почта автоматэз пуктӥм — сыӵе робот, кудӥз мукет городысь посылкаен келям саламдэ возёз, туж капчи но оскымон маке. Диджеинг но крезьгур — со хоббие. Тужгес но яратӥсько техно крезьгурез, берло дыре шудӥсько «солянка» — пӧртэм стильёсты огазеясько.

Кутскимы ми кемалась, 1994-тӥ арын Петров вынъёсын ӵош кариським, «Октябрь» культура юртын нырысетӥ дискотекаос ортчытъям. Со мар ке вылез вал — калык уг но тоды вал ай, мар со сыӵе! Андрей Захаровлэн компьютераз (An-2, тодмо продюсер, али улэ Питерын) нырысетӥ бутлегъёс-ремиксъёс лэсь­тылӥм. Техникаез валанэ туж юрттэ улонын но. Одӥг пол Выль аре Глазове ӧтчазы: шулдыръяськон куспазы крезьгурен шуг-секытъёс кылдӥзы, соку мон ачим езъёсты тупатӥ-паятьтӥ — праздникез ути, шуыны луоз. Олокыӵе но учыръёсты тодэ вайыны луоз. Ижкаре пӧртэм «курутой» диджейёсты вайылӥм: огаз ӝытэ Мускоысь 3 кузя вуизы, ваньзы ик винил пластинкаосын шудо. Али таӵезэ шедьты на — вуж школа! Кинэ но ӧм ӧтчалэ: dj Butch, dj Кислоид, dj Kosinus… Берпуметӥез мынэсьтым уно гинэ пластинкаме басьтžз, сьӧраз Муское нуиз.

«Ю-dance» клуб усь­тӥ­ськем бере отын но ужаса вуттӥ. Резидентъёс луыса шудылӥм. Арт-директормы курылӥз зэмос шоу лэсьтыны: соку мон уй клубе Дэриысь арганчиосты вайи. Син азяды пуктэ: дискотека, шудэ эктон крезьгур, шуак тыл кысэ, шыпыт луэ но — пото куаш-куаш удмурт арганчиос! Зол вал. Калык лӧптӥз.

— Удмурт луэмед шуак потылэ, иське?

— Удмурт луэмлэсь уд пегӟы. Эшъёсы но монэ куддыр мусояса нималлязы «вотяка». Мон ноку вожме ӧй поттылы. Тодӥсько, революцилэсь азьло сыӵе нимын крейсер но вал — «Вотяк». Революция бере нимзэ воштӥзы ни.

— Удмурт «революция» понна мар уг тырмы? Палэнысь синмын мар дэмласалыд?

— Урам нимъёсты вошъяно. Калык валаны кулэ, кытын со улэ, кинъёс пӧлын. Удмурт кыл мед адӟиськоз ульчаын, гожтэмъёсын. Мон вордӥськи совето вакытэ, соку удмурт луыны модно ӧй вал. Удмуртъёс анай кылынызы ас понназы гинэ верасько, озьы ик семьяям но кылиз.

Калык валаны кулэ, кытын со улэ, кинъёс пӧлын. Удмурт кыл мед адӟиськоз урамын, гожтэмъёсын.

Диджей сямен дэмласал удмурт трекъёс кылдытъяны: куара сэмплъёс удмурт сямен мед чузъяськозы, кырӟанын удмурт кыл мед улоз. Кӧня ке эскеронъёсы вань ини, утчало на улэп удмурт куара, туртто мар ке концептуальнойзэ-малпаськытӥсьсэ лэсьтыны.

Кӧня ке пол ветлӥ Ижысь удмурт дискотекаосы, «Пепелац» клубын шулдыръяськонэз учки. Номыр но вылез но тунсыкоез ӧвӧл кадь: калык юэ но шулдыръяське-эктэ. Мынам вань мылкыды лэсьтыны зэмос тунсыко сурет: мед пумиськозы улэп крезьгур но электрон экспериментъёс, удмуртэз но ӟучез, шудӥсез но кырӟасез, кылзоноез но учконоез. Утчасько монэн огкадь малпаськисьёсты. Соку мае ке кужмозэ, яркытсэ лэсьтыны пӧрмытысалмы. Али мон ас ымнырме удмурт дуннеын утчасько. Пумиталоз-а со монэ, уз мурта-а? Оскисько ӟечезлы.

* * *

Костя — тунсыко лулчеберет дуннеын улӥсь адями. Вераськон куспамы малпаськи, макем со матын удмурт «шулдыръяськон традицилы»? Уг-а сура удмурт дискотекаез ӟучъёсты удмуртэныз тодматžсь ужрадъёсын? Мукет ласянь, кин шуиз, удмуртъёслы удмуртэз гинэ кулэ шуыса? Мед кыкез ик дунне ог-огезлы усьтэмын луоз: оло, ӵапак солэн экспериментъёсыз юрттозы «кузё но куно» калыкъёслы матынгес луыны. Ӵыдытэк витисько Костялэсь радъям ужрадъёссэ: мед отын арганчиос но роботъёс ӵош бергалозы, нош пульт сьӧрын шудӥсь техно-диджей винилэз вошъян куспаз табанен куноятоз…

Дарали Лели.

Удмурт Дунне
By Удмурт Дунне 28 марта, 2012 15:09