Депутатъёс вазисько депутатъёслы

Удмурт Дунне
By Удмурт Дунне 30 марта, 2012 09:59

Депутатъёс вазисько депутатъёслы

Правительстволэн ужамезлы йылпумъян лэсьтэ А. Волков.

Таяз арня вискын радъяськиз Кун Кенешлэн 32-тӥ сессиез. Солэн ужаз пыриськизы Президент Александр Волков, Правительстволэн Тӧроез Юрий Питкевич, Удмурт Республикая валтӥсь федерал инспектор Дмитрий Мусин, Кун Думае Удмуртилэсь быръем депутатъёс Бекхан Агаев, Андрей Маркин, Виктор Шудегов, Федерация Кенешлэн муртэз Александр Чекалин, депутатъёс, ёрос йыръёс.

Повесткаын ялэм валтӥсь ужпум — Удмурт Правительстволэн кылем арын ужамезлы йылпумъян лэсьтон. Соя депутатъёс азьын вераськиз Президент Александр Волков. Озьы чакламын республикалэн Конституциезлэн 36-тӥ статьяяз.

— Правительстволэн ужамезлы валтӥсь дунъет луэ азинскон, — вераз Александр Волков. — Экономикаысь тросаз удысъёсын сутӥмы кризислэсь азьвыл басьтэм вормонъёсты. Озьы шаерамы поттэм продуктлэн быдӟалаез 14,5 процентлы йылӥз но 300 миллиард манет луиз.

Калыклэн улонэз но тупатске. Республикаын шоро-куспо уждун 15 сюрс 836 манет луиз. Пусйыны кулэ: социальной удыс котьку но син азьын. Кылем арын калыкез улон-вылонын утёнэ 400 миллион манетлы тросгес уксё быдтэмын. Оглом социальной удысэ висъямын вал 4 миллиард манет.

Удмуртилэн огъя шумпотонэз — демография югдурлэн тупатскемез. Шаерамы вордскиз 21 сюрс 906 пинал. Таӵе лыдпусэн асьмеос Приволжск округын нырысетӥ интыын мынӥськом, Россиын 15-тӥ луиськом. Туэ куинь толэзь ӵоже но лыдпусъёс шумпотто — кылем арен ӵошатыса, нуныос 316-лы тросгес вордскизы. Улонысь кошкон учыръёс али 600-лы ичигес пусъемын.

* * *

«Полиция сярысь» федерал законэз быдэсъяса, Кун Кенешысь депутатъёс азьын нырысьсэ вераськиз Удмуртиысь югдурез утёнъя министр Александр Первухин. Кивалтӥсь пусйиз: кылем ар полиция понна капчиен ӧз ортчы. Нырысь ик, воштӥськон зол шӧдӥськиз МВД-ысь кивалтӥсьёс вылын. Удмуртиын гинэ соос 500 муртлы кулэсмизы. Оглом югдурез утён удысысь 2 сюрс мурт мозмытэмын вал — выльдӥськон йӧттӥз котькуд 4-тӥ полицейскоез.

Арысь аре ичигес луо законэз тӥян учыръёс. Тани миым соос 27 сюрслэсь трос пусъемын. Та лыдпус 14,5 процентлы ӧжытгес, 2010-тӥ арен ӵошатыса. Но буйганы вазь на. МВД-ын ужасьёс чаклало 1991-тӥ арез — соку законэз тӥян учыръёс 18 сюрс вал.

Зэм, лушкаськон, квартираосы пыран, мурт ваньбурез талан учыръёс трослы синӥзы. Со вакытэ ик пушъе наркотикъёсын кушласькон. Шаерысьтымы наркологъёслэн лыдпусъёссыя, усыкмонэ выемъёс — 3 сюрс мурт. МВД-лэн чакламезъя, наркотикъёсын шузимемын 11 сюрс адями. Нош 20 ар талэсь азьло усыкмемъёс сярысь тодӥсь-верасьёс ик ӧй вал. Соин та удысын визьман-валэктон ужрадъёсты уката шаплы радъяно.

Полицилэн мукет йырвисёнэз — кудӟем йырын законэз тӥясьёс. Миым шаерамы тупаз адями виён 148 учыр. Пӧлысьтыз 86 йыружез быдэстӥзы кудӟемъёс. Юэмъёс руль сьӧры пуксё ке, таиз но ӟече уг вутты. Таин сэрен 5 сюрс 926 муртлэн машина нуллон правоез таламын, пӧлысьтызы 3 сюрс 600 водитель 15 сутка визьмаськиз пытсэт сьӧрын.

Удмуртиысь югдурез утёнъя министрлэн тужгес бадӟым сюлмаськонэз — сюрес вылын шудтэм учыръёсын бырисьёс. 294 адямилэн улонэз чигиськиз — та лыдпус 16 процентлы тросгес, 2010-тӥ арен ӵошатыса. Уката йырез пежыртэ машина шуккиськон учыръёсын бырем нылпиослэн лыдзы. Быдэс класс мында нылпиез — 21 муртэ — ыштӥмы. ДТП-ослэн йылэмзы тросаз учыръёсын герӟаськемын сюресъёс куашкамен.

* * *

Ӵапак та ужпумез тупатыны чакламын «Удмурт Республикаысь Сюрес фонд сярысь» законын. Со кылем арын кутэмын ни, нош уж — вераськон вылын гинэ. Федерал юрттэтэз чотаса, Сюрес фондлэн быдӟалаез 4 миллиард манетэз ортчоз. Но ортчем сессиын та фондэ эшшо воштон пыртэмын. Соин валче огъя коньдонэз кутыны луоз трос квартираем юртъёслэсь азбаръёссэс выльдыны, татчы пырон сюресъёсты тупатъяны.

* * *

Удмуртиысь парламентэ пырисьёслэн куинь ӵектонзы кылдӥз Кун Думаысь депутатъёслы. Кылсярысь, Вытъя кодексысь 217-тӥ статьялэсь мозмытыны уг луы коньдонэн юрттэт (материальной помощь) басьтӥсь студентъёсты. Таӵе юрттэтлы вазиськыны быгато вань дышетскон заведениосысь студентъёс, аспирантъёс но докторантъёс. Нош законын верамын — юрттэтлэсь 13 процентсэ выт чотын кельтоно. Соин валантэм, малы адямилы юрттыны чаклам пособилэсь оглюкетсэ выльысь кун кисые сётоно? Таӵе ӵектонэз дасяны куронэн депутатъёслы вазиськиз Егитъёслэн парламентсы.

Кун Думаысь депутатъёслы кыкетӥез вазиськон герӟаськемын Улон интыя кодексэн. Кӧня пол ини ЖКХ удысын йыр висён кылдылӥз управляющей компаниослы луыса. Соос улӥсьёслэсь тыл, ву, шуныт понна коньдон люкало, нош бӧрысь та уксёез асьсэ кисыязы вато — коммунальщикъёслы сётэмзы уг ни поты. Выльдэм законын коньдон тырон пыр-почгес пусъемын мед луысал.

Депутатъёслэн куинетӥ ӵектонзы герӟаськемын 2 квартираем юртъёсты тупатъянэн. Таӵе коркаос — соос республикаын 700-лэсь ятыр — али уг шедё ЖКХ-ез реформа пыр ортчытон программае. Ваньмыз сямен юртъёс интыяськемын районъёсын. 1950-тӥ-1960-тӥ аръёсы ӝутэм коркаосты улыны ярантэмен лыдъяны кулэ. Соосты огъя программае пыртыса, улӥсьёсты выль патере поттыны луысал. Соин республикаысь парламентарийёслэн куронзы одӥг — соослэсь ӵектонъёссэс мед кылысалзы Кун Думаысь депутатъёс.

Елена Скворцова.

Удмурт Дунне
By Удмурт Дунне 30 марта, 2012 09:59