Алдаськон — сьӧлык ӧвӧл

Удмурт Дунне
By Удмурт Дунне 30 марта, 2012 10:31

Алдаськон — сьӧлык ӧвӧл

Александр Петров.

Медицина наукаосъя кандидат Александр Петров 34 аресказ Удмуртиын нырысьсэ кылдытӥз сюлэм висёнъёсты эскеронъя аспӧртэм амал — стресс-эхокардиография.

Ма, Александр Петровлэн синъёсыз но, аспӧртэм аппарат кадь, лэчытэсь. Шорад учкыса, вералоз, кытӥыд висе. Сюлэм висёнэз вазь ик шараяны быгатэменыз, сое ӵемысь ӧтчало Ямал пала, Башкирие, Перме, Кирове. Америкае но вуылӥз ни. Кивалтэ со республикаысьтымы ёросъёсы тазалыкез эскеронъёсын потась центрен.

 

— Александр Генрихович, тӥ кема дыр ӵоже ужады республикаысьтымы кардиоцентрын, валтӥсь врачлэн воштӥсез но луиды ни вал. Наукаосъя доктор луон вылысь кошкиды шат?

— Доктор ужме мон кемалась гожтӥ ни. Но сое калыклы возьматыны, комиссия пыр потыны кулэен уг лыдъяськы. Малы ке шуоно наукаосъя докторъёс та улонын туж секытэн йӧнала интыясько. Аслам Вадим агае ик, химия наукаосъя доктор, вылӥегес ӝутскыны уг быгаты — дышетэ Россиысь Наукаосъя академилэн Урал ёзэтэзлэн прикладной механикая институтаз, отысь лабораториен кивалтэ. Талэсь но бадӟым ужез нуыны визьмыз но кужымез тырме ке но. Асьтэос, кивалтӥсьлэн синмыныз учкыса, малпаське ай: малы докторез уже кутод, аслад степенед ӧвӧл я пичигес ке? Кема ик дыр уз ортчы, со доктордэ тынад интыяд пуктозы ук.

Талэсь ик курдаса, докторъёсты ӵемысь уже уг куто яке, кыӵе ке муг шедьтыса, улляло. Радысьтызы эшшо одӥг визь люкез ыштэмлы кивалтӥсьёс шум гинэ пото. Нодтэм адямиосын, ыжъёс сямен, ым шоры гинэ учкисьёсын, малпанзэс но тодэмзэс шара возьматыны кышкасьёсын кивалтыны капчигес уго.

Алжирын атаеныз но агаеныз.

Нош мар карыны кыле на докторлы? Кисыяд тӧл шула, семьядэ сюдоно, кабинетысь кабинетэ йыгаськыса ветлӥськод, астэ озьы но, тазьы но ушъяны выриськод. Шорад мыняса учко, соглаш кариськыса, йырзэс мыкыръяло, нош асьсэлэн одӥг малпан: ӝоггес мед ворсасал ни ӧсэз мукет палтӥз. Таӵе учырын му пыр виялод ук! Астэ дунъямысь но дугдод! Кыӵе синмын семьяяд берытскыны кулэ? Амалтэк юон бекчее зымод, кайгуэныд нюръяськыны ӟигар шедьтытэк. Тон азьын одӥг гинэ сюрес усьтӥське на: студентъёсты дышетон. Сотэк-а уноез докторъёс дырзэс но кужымзэс быдто вузъёсын но академиосын? Нош макем трос соос улонын лэсьтыны быгатысалзы!

Ваньзэ тае малпаса ик, аслым шуи: кивалтӥсь луэме яке пересьмеме бере гинэ доктор ужме калык азе потто. Студентъёсты дышетыса гинэ, даурме вакчиятыны уго мон воксё но дась ӧвӧл на. Визьнодан сюлэмылы матын воксё ӧвӧл. Мынам туж бадӟым ӟигары на висись калыклы юрттыны.

Кардиоцентрысь кошкеме сярысь трос вераськеме уг поты вал. Сое малпасько ке, сюлэмы ик вирын пылаське. Бурми ни вал лулыным но, куэным но бордаз. Огез буйгатэ: кылем арын сӥзьыл мон отысь огнам ӧй кошкы — дасо кузя люкаськимы. Ваньмы удысамы усто специалистъёс, кандидатъёс, Кун премилэн лауреатъёсыз. Огмылы но ӧз кельшы отысь зӥбет. Одӥг учырез гинэ верало. Огез кивалтӥсь дораз ӧте но шуэ: тынад уждунэд мынэсьтым бадӟымгес, шори люк — ӝынызэ аслыд, ӝынызэ мыным. Мыным та воксё ӧз кельшы.

Яратоно кузпалэныз.

Собере бускель республикаос берло дыре юн сюлмаськыны кутскизы центръёссэс выль технологиосын узырмытон пумысен. Асьмелэн кардиоцентрмы ӧз ик вырӟылы. Соин ик Удмуртия выль технологиостэк кылиз. Но пусъё созэ но: кивалтӥсьёс воштӥськизы ке, кардиоцентре берытско.

Туннэ мыным туж кельше Ижысь чугун сюрес вылын ужасьёслэн больницаязы. Татчы мон азьло но куддыр юрттӥськыны вуылӥсько вал. Адямиосты операцилы дасялляй.

— Шуо, тӥ чугун сюрес вылын ужасьёслэн больницаязы лыктэмен, али отчы туж трос вазиськыны кутскизы гуртъёсысь висисьёс.

— Татчы выжеме сярысь кылытэк ӧз кыле уго. Ымысь ыме, пельысь пеле шуэм сямен. Монэ урамын но адямиос дугдытъяло ни тодмаса: ӟечбур, доктор Петров. Огпол город кузя машинаен мынӥськом. Руль сьӧрын кышное пуке. Правилоосты тӥяз. Полициысь лейтенант дугдытӥз. Монэ адӟиз но мыняны кутскиз. Мон солэн кузпалызлы дас вить ар талэсь азьло нылпизэ вайыны юрттӥ вал. Тусме вунэтымтэ.

Соиз но вань. Кардиоцентре врач доры сюрон понна квота, нимысьтыз направление кулэ, регистратурае жингыртыса, гожтӥськоно. Ужан нуналэ сяна, отчы уд но шедьы ай. Нош таяз больницаын, выходнойёсты адӟытэк, тыршисько. Соин но, лэся, гуртоос дырто дорам.

Мон ачим но уг быгатӥськы ни соостэк улыны. Куддыръя асме кутӥсько таӵе малпан вылын: муртъёсты чакласа ветлӥсько, кытӥзы таослэн висе меда шуыса.

Лобаны дышетске.

— Шоре учкыса гинэ, диагноз пуктыны луэ шат?

— Котькуд висён гожтэмын ымнырын. Пичиослэн ымдур но ныр котырысьтызы кузы лызалэс ке, тод ни: сюлэмзы ӟеч уг ужа. Та сярысь ик тодод, адямилэн чыртыысьтыз вирсэръёсыз адскымон тэтчало ке, секытгес ужаса, шоканзэ уг шедьты ке. Куд-огез куинетӥ-ньылетӥ этажозь но тубыны шугъяське, нош аслыз кызь арес но ӧвӧл ай. Туж-туж кисыриё ымныръёс но вань, нош кузёзы ньыльдон арессэ но тырмытымтэ на. Таос шоры учкыса, соку ик малпаськод: атеросклероз.

Огпол син шорам йӧтӥз полициын ужась кышномурт. Вазьытэк ӧй чида солы: паллян пекляды улӥе лэзиськемын, вирзӥбетты улӥ. Сюлэмдэс но одно чаклалэ, шуи. Нылкышно шорам долкаса учкиз. Бӧрысьгес пумиськеммы бере вераз, вань адӟеме зэмаз шуыса.

Кабинетэ ӝожтӥськонэн пыро ке, соку ик тодӥськод ни: тадэ али ик койкае выдтоно яке буйгатоно гинэ-а. Кытӥыд висе шуыса юанлы, адями чиньыеныз сюлэмыз шоры возьматэ ке, татын куалекъянэз ӧвӧл. Мукетыз быдэс кизэ гадь вылаз понэ но шуэ: сутэ, шоканэ ик пытсаське. Тазэ коть соку ик эмъяны кутскы. Сюлэм висьыку, адями уг но тоды, кытын солэн сюлэмыз. Я ӝушсы, я кизы, я пыдзы вылэ ӝожтӥсько. Сюлэм аслэсьтыз вӧсьсэ уго отчы но, татчы но мугор кузя ыстыны быгатэ.

— Сопал дуннее кошкись адямиосты ӵемысь улонэ берыктӥськоды, шуо.

— Приём нуыкуд, адями кулыса усе ке, кызьы пукон вылад гань-гань пукод на? Автобусын, урамын пограсьёс но вань. Нуназе-а, уйин-а — медакадемиез йылпумъям адями котькыӵе вакытэ юрттыны дась луыны кулэ. Висись шоры кизэ шонтӥз ке, со мынам ӧвӧл шуыса, сое врач ниманы луоз шат? Сыӵе муртлы улондэ но оскыны кышкалод — котькуд секундэ азьтэмъяськыны быгатоз со.

Огпол матысь ӵыжы-выжыме Москвае келясько. Пельпум вылам секытэсь сумкаосыз. Поезд тани-тани вырӟоз ни. Пельме вандӥз гып! куара. Кин ке усиз шуыса, малпаса но ӧй вутты — артэ кесясько ни: кулӥз, кулӥз! Сумкаосме музэ куяй но пограм кышномурт доры дыртӥ. Уг шока. Эшезлы вази: тӥ ымаз шокалоды, мон сюлэмаз массаж лэсьто. 4 минут ортчыса, тӧдьыалэс-лызпыръем ымныр улӟыны кутскиз. Ымныраз лемлет пырыос пыӵаны ӧдъязы. Шокчиз. Синъёссэ усьтӥз. Тае адӟем адямиос мыным чабыны кутскемзэс ик ӧз валалэ ни. Со чабемзы гинэ тодам уськытӥз: ӵыжы-выжыме поездэ пуктоно.

Вуоно врач.

— Таӵе учыръёс бере асьтэдыз Инмарен шӧдӥськоды, дыр?

— Воксё но уг. Эмъясьлэн ужез сыӵе — адямиез улӟытон. Мон 20 арескам нырысьсэ валай: юнме уг улӥськы. Дэри ёрос больницаын практика ортчисько вал. Егит акушеркаен ӵош кышномуртлы нунызэ вордыны юрттӥсько вал. Нокызьы но пиямез уг луы. Ачиз но, нылпиез но кулыны быгатозы. Ӟигарыз ик ӧвӧл ни. Мар кароно?

Киям простынез кутӥ, золтӥ сое. Та амалэз медицинаын шонерен уг лыдъяло ке но, мон нуныез со простынен пачкатыса кыскыны кутски. Озьы со улэп, таза вордӥськиз. Анайлы но изъян ӧз луы.

Та учыр бере монэ куинь нуналлы шутэтскыны лэзизы. Нылпилэн атаез, тау карыны турттыса, больницае огпол гинэ, монэ утчаса, вуылымтэ. Бӧрысь тодӥ: пизылы мынэсьтым нимме сётӥллям.

— Асьтэлэн «шайвылды» но вань, дыр.

— Кабинетын гинэ уд пукиськы ке, со котькуд врачлэн вань. Ас киыным ӧй виы ке но одӥг пиосмуртэз, йырысьтым уг поты со. Тазьы луиз со учыр.

Висиселы операция лэсьтэмын ни. Султылыны уг яра на шуыса, вераськи соин, кыӵе эмъюмъёс юоно, валэктӥ. 50 аресъем воргорон татчыозь ноку, огшоры выдыса, кылльылымтэ. Ялан ужамын-бызьылэмын. Ӝоканы кутскем но ачиз янак вылэ тубем, укно доры сузьтӥськыны кутскем. Озьы дауртонъяз сюлэмысьтыз вурысэз пилиськем. Тыбыр вылаз кулыса усем. Тае ваньзэ мыным веразы ни палатаын ӵош кыллись эшъёсыз. Ачим сое янак вылысь ӧй кушты ке но, лыдъясько: мон но татын янгыш. Сое койка бордаз думылысал ке, али ке но улэп луысалыз на.

— Кема асьтэдыз сизь­дӥды-а?

— Реанимациын ужаку, кулонъёсты трос адӟоно. Но ваньмыз понна бӧрдыны уг яра, дыр. Сюе ватэм висисьёсыд сярысь ялан малпаськид ке, ужысь кошкон сярысь сюлмаськоно луод. Соос тыныд маза уз сётэ ни. Ортчемез вылын куректыса, улэп адямилы шонер диагноз пуктонын янгышаны, маке мыдлань лэсьтыны быгатод. Соин ик куддыръя чурыт но кариськоно луэ. Сопал дуннее кошкись адямиосты тон доры вутто, тон соосты выльысь улонэ берыктӥськод. Та туж бадӟым кужым сётэ азьлань вамыштыны.

— Кызьы учкиськоды компьютерлэн диагноз пуктыны быгатэмез шоры?

— Соин али туж зол ушъясько. Нош солы оскыны луэ меда? Анализъёс со уг лэсьты. Лыктӥськод нимысьтыз медцентре, пуксиськод компьютер азе, бордад кыӵе ке проводъёс дэмӟытъяло. Юало: кытӥыд висе? Сюлэмы, шуод. Кӧня ке улыса, принтер пыр туж чебер суред поттозы. Сюлэмыд сьӧд-сьӧд точкаосын возьматэмын. Вазёзы на: кардиолог доры мын. Мукет висёндэ но озьы ик суредалозы на, нош эмъюм чот гожтозы биологической добавкаосты. Таослэн зэмос эмъяны кужымзы чик но ӧвӧл ке но. Но соос вылын уксё потто.

Соин ик компьютерен диагноз пуктон шоры туж кырыж учкисько. Озьы ик уг оскиськы туно-пелёлы. Кин тодэ, со, оло, мае ке тодэ ик. Кылсярысь, кыӵе турын-куар марлэсь юрттэ. Но солэн ӵектэмезъя гинэ эмъяськыны яра меда? Адямиос турын-куар куасьто-паро, йӧнаськом кожало, нош черзы мургес но мургес каръяське. Отӥяз воксё кекатыны-куасьтыны ӧдъя.

Куддыр кабинетэ шок-пуль пыро. Уг ни чидало — сокем висё кадь. Врачъёс дортӥ ветлӥм, сюлэм висёнъёсты бурмытӥсь вань эмъюмъёсты юим ни — номыр уг юртты, шуо. Учкиськод но, воксё сюлэмзы уг висьы — урдлыоссы вискы пачкам лулсэрзы позыръяське.

Йырберын вань аспӧртэм пуйы кадь интыез — венозноый коллектор нимаське. Вирсэръёсысь вир отчы люкаське. Остеохондрозэн висись муртлэн со коллекторез будыны кутске. Куд-огез кышкатске: рак. Дэмласько соослы: массаж лэсьтэ. Эшшо но куалекто: кызьы пыктосэз массаж лэсьтод? Сюрлыдэс массаж лэсьтэ, тысэраос (пиявка) пуктылэ — черды ортчоз. Куддыръя ачид но психотерапевт луиськод.

— Висисьёстэс алдамды вань-а?

— Адямилы операция лэсьтэмын, пыдъёсыз уг шуналляло, нош со алэм вылысь но ялан кыске ке, пӧяса курдатӥсько: пыдъёстэс вандылозы. Тамак кыскись адямиез эмъянлэн пайдаез ӧвӧл уго. Кыскеменыз со люкетэ эмъясьлы. Вирсэръёссэ паськытатон вылысь солы капельница пукто, нош со султэ но тамака. Тодаз но ӧвӧл, тамак вирсэръёсты ӵакмытэ, сюбегатэ шуыса. Сюлэмзэ вандылэмлэн но толыкез быре. Сыӵе дыръя амалтэк алдаськоно луэ.

— Асьтэдыз но пӧясь­коды-а?

— Вань сыӵе веран: врачъёс асьсэды уг йӧнато, асьсэ шоры киынызы шонто но буйгало. Мон тодӥсько вал: сюлэмы ляб. Быдэс улонме эмъюмъёс вылын ортчытӥ ке, уг кулы. Но атаеным луэм учыр висёнэ шоры учконме воксё берыктӥз. 4 часын ӵукна сюлэмыз дугдыны кутскиз солэн. «Скороез» ӝегатскытэк ӧти, операция лэсьтон ӝӧк дуре поттӥ республикаысьтымы тужгес усто специалистъёсты. Атае туннэ ке но улэп. Со вакытэ мон вӧзаз ӧй тупасал ке, сое сюе ватоно луысал ни. Та малпан ик вырӟытӥз монэ — уксё бичай но операцие шонтӥ.

Зэм, волейболэз вунэтоно луиз. 40 аресозь туплэсь ӧй ӵыдылы. Удмуртилэн чемпионэз но вал.

— Тӥляд быдэс семьяды дано — ваньды наукае выемын. Агайды — химик, атайды — доцент, биология наукаосъя доктор, анайды ас вакытаз кивалтӥз Ижысь гурт удысъя академиысь подготовительной отделениен. Ӟеч тодо француз кылэз. Мумы-бубыдэс, быгатонлыксэс синйылтыса, Алжире но студентъёсты дышетыны ӧтчаллям…

— Анай-атайме 1967-тӥ арын Алжире келязы. Соос нырысь-валысь быдэс арзэ отын ужазы — студентъёсты дышетӥзы, нылпиоссэс Удмуртие кельтыса, бќрысь пиналъёссэс но сьќразы нуизы.

Агаеным вуимы Алжирысь Аннаба городысь куинь комнатаем паськыт квартирае. Сое ас вакытаз французъёс асьсэлы шутэтскон понна лэсьтӥллям вылэм. 1962-тӥ арозь Алжир Францилэн колониез вал уго. Эрик басьтыса, арабъёс асьсэ доры пӧртэм кунъёсысь ӧтиллям усто специалистъёсты. Зэм, араб нылпиос ӟучъёс шоры кырыжгес учкылӥзы. Ми шоры кылем-мылем сиёнъёссэс но лэзьязы. Но ми ӧжыт кузя ӧй вал, пунэмзэ берыкъямы ик. Отын ньылё ар ӵоже улытозямы, эшъяськимы но, араб кылын тышкаськыны но дышимы. Ӝӧк вылысьтымы ноку уг бырыло вал емышъёс. Укно улын будӥзы финикъёс.

— Сыӵе азьысь кошкемед но уз ни поты кадь…

— Пичи дыръя котькытын умой ук. Соин ик анай-атай Иже бертэмысь, куректыны ик ӧй вала. Али тани шумпотӥсько, Удмуртие берытскиллям шуыса. Собере мон трос кунъёсы вуылӥ ни. Но асьме дорын кадь удмурт адямилы нокытыны но умой ӧвӧл. Удмурт шаер гинэ тонэ валалоз.

— Пичи дырысьтыды льӧль малпанды быдэсмиз-а?

— Москваысь кун университетысь физикая факультетэ пыро шуыса, малпасько вал. Анай-атае чигиськыны кутскизы: агаед сокемын дышетске ни, тон ке но Иже кыль. Милемыз чаклась кулэ. Жаляй соосты. Биология предмет но кӧтвеськантэм йӧтэ вал: муми-буби биологъёс. Бӧрысь кин ке ӵектӥз: сямыд туж лякыт, тынэсьтыд ӟеч врач пӧрмысалыз. Соку мон Ижысь 30 номеро школаез йылпумъясько ни вал. Аслым но тунсыко йӧтӥз: вань эшъёсы Москваысь вузъёсты «кыткыны» кошкозы, нош мон асьме мединститутэ йыгасько. Адӟонтэм биология предмет но кельшыны кутскиз. «Ленинлэсь стипендизэ» басьтыса, дышетски мединститутын, горд дипломен йылпумъяй. Отын визь люкакум ик, Ижысь кардиоцентре уже интыяськи реанимацие медбрат луыса. Бӧрысь но отысь ӧй ӵыды. Огпол но ӧй жаля.

Али льӧль малпанэ герӟаськемын ни нылпиосыным. Пие Ижысь техникая кун университетысь магистратураын визь люка, программист луоз. Нылы Чехиысь Прагаын пинь эмъясе дышетске. Таослэсь улонзэс ӟеч радъян понна сюлмаськоно. Асламез радъяськиз ни.

Елена Сараматова.

Удмурт Дунне
By Удмурт Дунне 30 марта, 2012 10:31