«Реммаш» — эштосъёслэн матысь эшсы

Удмурт Дунне
By Удмурт Дунне 30 марта, 2012 10:16

«Реммаш» — эштосъёслэн матысь эшсы

Н. Веретенников.

Шаерамы ӟеч ужась предприятиос пӧлы пыре Глазовысь «Реммаш» завод. Миым выль вормонъёсын 80 ар тырмон юбилейзэ пусйиз. Со Россиысь 30 процентсэ кыед утялтон транспортёръёсты поттэ. Соосты 40 улосъёс басьто. Соин ӵош ик ялан умоятэ-выльдэ сеялкаоссэ. Тазэ но гурт хозяйствоос шумпотыса басьто.

Заводэн кивалтэ визьмо удмурт воргорон Николай Веретенников.

— Николай Данилович, выльдӥськон кутскыса, тросэз предприятиос куашказы. Нош тӥляд заводды кызьы йыг-йыг пыд йылаз возиське?

— Зэмен но, тямыстон ар ӵоже, солань-талань шонаськытэк, огсыр ужась­комы, быдэс Россиын тодмо луимы ни. Ужъёсмы урод уг мыно, угось коллективмы туж ӟеч, оскымон, производстволы кулэ ке, пал кыл вератэк, шутэтскон нуналэ но ужаны пото. Озьы миым планмес 103 процентлы быдэстӥм, нош 2010-тӥ арен ӵошатыса, 22 процентлы уногес ваньбур поттӥм. Сыӵе азинсконъёс ас кожазы уг лыкто. Соос пото вань ужасьёслэн, инженеръёслэн сюлмаськемзы бордысь. Производствоез валаса нуэ воштӥсе Алексей Домрачёв. Оскем ужзэ, шор ёзо кивалтӥсьёсты ӟеч тодэ.

— Гурт хозяйствоослы кыӵе техника лэсь­тӥськоды?

— Предприятие кылдэмез дырысен люконтэм гер­ӟаськемын гурт удысэн. Берло дас ар ӵоже гурт удыслы поттӥськом уно пумо техника. Соос пӧлын АКП-1 кормодробилка; СК-3,6, СК-3,0 сеялкаос-культиваторъёс; пудо вор­дон фермаослы но птицефабрикаослы пӧртэм пумо транспортёръёс; кыед поттыны УНС-1, УНС-2­ скрепер установкаос; парсь­ фермаослы ТС-1 транспортёр но мукет. Берло дыре поттыны ӧдъямы паськытэсь кизён комплексъёслы СП-2 но­ СП-3 сцепкаос. Нош 2007-тӥ арын автосервис радъямы, грузовой но легковой автомашинаосты выльдӥськомы, техобслу­живание лэсьтӥськомы. 2009-тӥ арын поттыны кутскимы «Глазовчанка» кизён комплекс, пасьталаез 6 метрысен 10,8 метрозь луэ. Со арын ик «Гомсельмаш» огазеяськонэн ӵош радъям пудо сиён дасянъя К-Г-6­ комбайн поттонэз. Кылем арын кутскимы поттыны ПТС-01 подвесной транспортной система но ТНТ-150 приводной станция. Берлоез скрепер установкаосты ез кузя нуллэ.

Выль продукцимы пӧ­лысь пусйыны кулэ СК-3,0 Б сеялка-культиватормес. Со­ ужа электромагнит дозаторъёсын. Пасьталаез 3 метр, музъемез 10 сантиметре бугыртэ, со мурдалае ик минерал сылалъёсты соге, нош ю кидысэз — 2-3 сантиметре. Озьы будосъёс асьсэлы ӟеч сиён шедьто но чебер пушъё.

Озьы ик вераме потэ «Глазовчанка» кизён ком­плексмы сярысь. Со кизе 2 но 3 сеялкаен, одӥг часкын 6 но 10,8 гектар лэсьтэ. Комплексэз нуллыны бы­гато МТЗ-1523, Т-150, К-701 но музон тракторъёс. Комплекс, музъемез бе­рыкъятэк, куро ӝыжы вылтӥ минерал сылалъёс пазя, кидыс соге но огдыре музъемез ӵошкатыса кель­тэ.

Уно пумо транс­пор­тёръёсмы сярысь веранэз ик ӧвӧл. Та вузмес ӝыны Россия басьтэ.

Азьмынӥсь штамповщикъёслэн бригадазы, мастерзы М. Касаткин (паллянысез).

— Николай Данилович, Россиын ортчылӥсь ад­ӟытонъёсы пырись­кы­лӥськоды-а? Отын про­дукцидэс учкись но дунъясь вань-а?

— Быгатэммыя одӥг ужрадэ но ветлытэк ум кылиське, котьку медальёсын но дип­ломъёсын бертӥськом. Озьы «Реммашез» пӧр­тэм интыосын пумен тросгес тодыны кутско но техникамес басьто. Тани «Россиысь бусылэн нуналыз» адӟытонъёс ортчизы 2006-тӥ арын Саранскын но 2007-тӥ арын Ростовын. Кыказ ик машинаосмес вылӥ дунъязы: зарни медаль но диплом басьтӥм. Озьы быдэс коллективлэн ты­р­шемез, быгатэмез ӟеч дунъямын. Сыӵе ик адӟытон 2008-тӥ арын вал Белгородын. Отын СК-3,0 сеялка-культиватормы пу­съ­емын дипломен но зарни медален. Со арын ик Ростовын «Интерагромаш» адӟы­тонын зарни медаль но диплом басьтӥм электрокужымез шыръясь техника поттэммы понна.

Туэ сӥзьыл Москваын ортчоз «Агросалон» адӟытон. Отын возьматом СК-3,0 Б сеялка-культиватормес. Таиз быдэсак асьме дорын лэсьтэм-вуттэм техника.

— Котькуд удысын кибашлыосты но усто мастеръёсты трос. Кӧня­зэ ке вералэ вал.

— Ӟеч ужасьёсмылэсь нимъёссэс вераса уд быдты. Дорамы семьяосын тыршисьёслэн лыдзы пу­мен йылэ. Умой ужасьёс заводлэн Данъян пул вылаз пыртылэмын, данъян гра­мотаосын пусъемын. Соос пӧлын — токарь Дмитрий Гостев, электросварщик Александр Лебедев, элек­трогазосварщик Ми­ха­­­­­ил Щепин, мастер Михаил Касаткин но трос мукетъёсыз. Нош 80 ар тырмонлы сӥзем конкурсын вормисе потӥз штамповкаос лэсьтӥсь бригада. Оскем ужзэ умой быдэсъя цехлэн кивалтӥсез Пётр Шуклин. Ужасьёсын огкыл ӝог шедь­тэ. Тани валля арын солэн цехаз кунгож сьӧрысь басьтӥм плазмаен корт вандон установка. Соин быгатыса ужа Александр Лебедев.

Миым ортчытэм юби­леймы ваньмылы ватсаса кужым сётӥз азьланьын уката ӟеч, азинлыко ужаны, гурт хозяйствоослы туала усто техника поттыны.

Геннадий Романов.

Удмурт Дунне
By Удмурт Дунне 30 марта, 2012 10:16