Ӟырт кезьытысь — сяськаясь тулысэ!

Удмурт Дунне
By Удмурт Дунне 14 февраля, 2012 07:15

Ӟырт кезьытысь — сяськаясь тулысэ!

Яратӥсьёслэн нуналзы азьын Ижын усьтӥськизы уно сюрс розаос, тюльпанъёс, гербераос, гиацинтъёс но мукет турлы сяськаос. Туэ 14-тӥ ползэ шоркарын радъяське «Удмуртиысь сяськаос» адӟытон.

Таӵе паймымон кузьым дасязы городын улӥсьёслы но куноослы шаерысьтымы сяська будэтӥсь огазеяськонъёс. Ӟырт кезьытысь небыт тулысэ вуиськод кадь! Сяська зынъёс йырез поромыто, соослэн горд, ӵуж, лыз, вож кисьтаськись буёлъёссы синъёсты палёмыто.

Мар но малпаллямтэ дизайнеръёс! Сад-бакчаоссэс шулдыртон амалъёс шедьтозы татысь мӧйыос, нылпиосты паймытозы пӧртэм мунёос, шулдыр паровоз, ангелъёслэн корказы но трос мукетыз.

Адӟытонэз усьтыса, «Удмуртиысь сяськаос» огазеяськонлэн кивалтӥсез Марат Аухадеев вераз:

— Шаерысьтымы предприятиос ог дасо ар талэсь азьло 1 но ӝыны миллион пала сяська уд будэто вал. Туэ та лыдпусэз 15 миллионозь вуттӥм ни. Арлы быдэ будэтӥськом сяськаосмылэсь ӟечлыксэс. Туннэ соос чик но уродэсь ӧвӧл Голландиысь но мукет азьысь ваем будосъёслэсь.

Марат Габдулхаевичен соглаш кариськиз Кун Кенешлэн Тӧроез Юрий Питкевич. Шуиз, со котьку но басьтэ Удмуртиын будэтэм сяська тугокоосты гинэ. Асьмелэнъёсыз ческыт зыноесьгес, мусоесьгес, сюлэмез шумпоттӥсесьгес.

Ижлэн йырыз Александр Ушаков тау кариз сяська будэтӥсьёслы тулысысен бер сӥзьылозь городысь урамъёсты шулдыртэмзы понна.

— Тӥледлы луыса шоркарамы улӥсьёс дышизы ни чеберлы, — пусйиз со. — Асьсэос но тыршо городмес шулдыртон понна, мыло-кыдо пырисько «Ижевск — сяськаясь город» конкурсэ.

Арлы быдэ таӵе адӟытонэ ог 40 сюрс адями вуылэ.

Элина Кумачёва.

Удмурт Дунне
By Удмурт Дунне 14 февраля, 2012 07:15