Шудон вайиз йыр висён

Удмурт Дунне
By Удмурт Дунне 14 февраля, 2012 07:38

Берло толэзьёсы Ижысь полициын ужасьёслэсь йырзэс висьыто пӧяськыса йыртэмасьёс. Кылем арын декабре но туэ январе оглом 127 алдаськон учыр пусъемын.

Йыртэмасьёс «ужало» 11 пӧртэм амалэн. Пӧяськисьёслэн ки улазы ӵемысь шедё вуз карисьёс. Йыртэмасьёс пичи магазинын ужасьёсты гинэ уг эрекчало — уката йӧтӥз бадӟым центръёсысь вуз карисьёслы. Алдаськисьёс пӧлын тужгес но вӧлмем амал — уксё воштон.

Шуом, кассирлы вазиське воргорон, 10, 50, 100-лыкъем манетъёссэ бадӟым купюралы воштыны курыса. Пиосмуртлэн «векчи» уксёез — 20 сюрс манет. Магазинъёсын ӵемысь ёрмо таӵе коньдонлы, соин соглаш карисько. Нош векчи уксё интые 1 яке 5 сюрслыкъёс сёто. Нош коньдон воштэм бере вуз карисьёс уксёзэс чотаны кутско но — таиз уг поты.

Пӧяськисьёс вань басьяськисьёс пӧлын но. Огез воргорон кӧня ке пол алдаз шудонъёсын вуз карисьёсты. 750 манетэн шудон бырйыса, пиосмурт 5 сюрс манет сётӥз. Вуз карись сдача лыдъяз — 4 сюрс 250 манет но сое басьяськисьлы берыктӥз. Со куспын воргорон эшшо кык таӵе шудон куриз на — нош магазинын вуззы одӥг гинэ. Басьяськисьлы та ӧз кельшы, со шудонзэ но берыктӥз, уксёзэ курыны кутскиз. Вуз карись ӧз ӵыжаськы: воргоронлы сдача чотын сётэм уксёзэ лыдъятэк но басьтӥз, нош кассаысь 5 сюрслыкез кузёезлы берыктӥз. Нылкышно бӧрысь гинэ чотаз но йыр бордаз кырмиськиз: басьяськись солы 1 сюрс 250 манет гинэ берыктэм, нош 3 сюрссэ кисыяз кельтэм.

Полициын ужасьёс пусъё: таӵе йыртэманъёс быдэсмо, вуз карисьёс укыр оскись луэмен. Бен, али бадӟым центръёсын пуктылэмын видеокамераос, иське, алдаськисьёсты соос гожтыса кельто. Озьы ке но ӵем дыръя та камераос уг ужало. Ижысь УВД-ын тыршисьёс вуз карон центръёслэн кивалтӥсьёссылы ӵекто та ужпумез син азязы возьыны, соку йыртэманъёсты шараяны но трослы капчигес луысал.

Елена Скворцова.

Удмурт Дунне
By Удмурт Дунне 14 февраля, 2012 07:38