Сюлмылэсь оглюкетсэ ыштӥ

Удмурт Дунне
By Удмурт Дунне 29 февраля, 2012 09:12

Сюлмылэсь оглюкетсэ ыштӥ

Юлия Никитина

«Шундылы» выль тӧро быръемын. Соин валче тросэз паймо: малы

Юлия Никитина кивалтонысь кошкиз? Ас мылкыдызъя таӵе вамыш лэсьтӥз-а? Мар азьланяз луоз «Шундылэн» улоназ?

Со сярысь вераськиськом асэныз Юляен.

 

— Тон али Улосэз азинтонъя институтын ужаськод. Кызьы но ку отчы шедид?

— Кивалтӥсьмы Светлана Смирнова огпол монэ ӧтиз Приволжск улосысь егит азь-ветлӥсьёс понна радъяськись школае. Соглаш кариськи. Азьланяз но вазиськылӥз, мон быгатэмея ужрадъёсазы пыриськылӥ, юрттӥськи. Озьы ӟеч кусыпъёс тупатӥ. 2011-тӥ арын Удмурт кун университетысь историяя факультетэз йылпумъяса, ужан инты сярысь малпаськыны кутски. Соку Светлана Константиновна йыр висёнме буйгатӥз — институтлэн кивалтӥсезлэн воштӥсез луи. Светлана Смирнова быгатэ адямилы оскон пыӵатыны. Та арын ик 30-тӥ декабре институтлэн исполнительной директорез луи.

— Удысэд сярысь мар верасалыд?

— Мон асме координатор шуысал. Ужелы трос дырме но кужымме сётӥсько. «Шундыын» басьтэм тодон-валанъёсы, быгатонлыкъёсы туж юртто. Институтлэн валтӥсь ужпумез — Удмуртиысь калыкъёслэсь малпанъёссэс огазеян. Ми доры вазиськисьёслы луонлык сётӥськом асьсэды шедьтыны, ужбергатонэн, политикаен герӟаськем юанъёссэс сэрттӥськом-пертчиськом. Институтын 7 адями тырше. Проектъёс бордын ужакумы, бордамы итӥсько экспертъёс — шаерысьтымы тодмо адямиос.

— Али тыныд та юанэз ӵем сёто, дыр. Мон но юатэк уг чидаськы. Малы тон, «Шундылэн» тӧроысьтыз гинэ ӧвӧл, правлениысьтыз но кошкид?

— Дыры уг тырмы. Кык удысэз нуыны секыт. Та сяна, дышетскисько аспирантураын, со но трос дырме басьтэ. Мон тӧролэсь школазэ ортчи, ас вылам сое шӧдӥ, трос выльзэ, пайдаёзэ басьтӥ. Табере со пыр мукетыз мед потоз. Секыт ке но кошкыны, куке но та вамышез лэсьтоно луысал. Зэмзэ ке, сюлмылэсь оглюкетсэ ыштӥ кадь. Мон «Шундые» трос кужымме понӥ, семьяе но котьку юрттӥз. Соин огазеяськон милемлы асьмелэн потэ ни, дуно. Конференциысен синкылиосме мырдэм вози.

— Правлениысь но тӧро-ысь кошкид, кенеше кылид. Огазеяськонысь кыӵе ужпумъёс бордын тыршод азьланяз?

— Кенеш — со ёросъёсын ужан. Со «Шундыын» ляб пуктэмын. Кужымме сётысал ёросъёсыз огазеясь программаослы.

— «Шундыын» кык ар талэсь азьло ужаны кутскыкуд, пуктэм ужпумъёсыд пӧлысь мае быдэстэмед ӧз луы?

— Али Интернет амалъёсты тросгес уже пыӵатоно, угось асьмеды со пыр йӧно возьматыны быгатӥськом. Огазеяськонлэсь сайтсэ лэсьтӥмы ке но, со рос-просгес мед ужасал, котькуд нунал мед выльдӥськысал. Эшшо удмурт егитъёс палэнтӥсько ужбергатонлэсь но политикалэсь, ог-огенымы вожвылъяськыны ум быгатӥське. Нош конкуренция — со азинскон. Дышетсконо, кылъёсын, лулчеберетэн, пӧртэм программаосын тунсыкъяськоно, Интернетын тросгес бугыръяськоно. Пӧртэм удысъёсты мед тодомы, малпанмес вераны мед быгатомы.

— Кыӵе луыны кулэ зэмос азьветлӥсь?

— Кыл кутыны быгатӥсь. Кыл кутоно ачид, мукетъёсыз, быдэс калык азьын. Котьку аслыд шуоно: ваньмыз пӧрмоз, ваньзэ быгато! Малпанъёсын генератор луоно, ялан выльзэ, тунсыкозэ утчано. Тани «Шундылэн» выль тӧроез Оля Тронина туж оскымон, визьмо. Со мынам списокам нырысетӥез вал, кин кивалтыны быгатоз. Кык ар ӵоже ик командаям пыриз, кошкылыкум вань ужме со быдэсъялляз. Оля кутскемзэ азьланьтоз, выльзэ одно ик пыртыны тыршоз.

* * *

Нош кин «Шундые» ӧз на пыры, но бадӟым мылкыдыз вань Ижысь удмурт егитъёсын кусып возьыны, тунсыко ужрадъёсы пыриськыны но соосыз радъяны, ми шумпотыса возьмаськомы Эшъяськон юртын. Милям вань на vkontakte-ын группамы http://vk.com/shundy но нимысьтыз сайтмы http://udmshundy.ru

2010-тӥ-2011-тӥ аръёсы огазеяськон быгатӥз азинтыны бадӟым проектъёссэ: «Шундыкар», «Вамыш», «Шудо семья». Со сяна, кылдытэмын вал выль проектъёс:

1. огазеяськонлэн ёросъёсысь ёзъёсыныз кусып возись «Вуюись» программа;

2. «Шунды-сАлянка» — герӟаз городысь но гуртысь удмурт егитъёсты;

3. Россиысь «Егит фин-угор азьветлӥсьёслэн школазы» дышетскон семинар;

4. удмурт быгатӥсь нылпиос понна «ТУННЭ» дышетскон школа.

Но вань на шуг-секытъёс, кудъёссэ матысь аръёсы одно ик сэрттоно-пертчоно:

— удмурт егитъёслэн политика но экономика удысъёсын тунсыкъяськонзы пичи

— нимысьтыз программаослы но проектъёслы коньдон висъян секытэн быдэсме

— общественной уже вань ёросъёс уг пырисько, пӧламы туж ӧжыт ужась егитъёс но егит семьяос

— ёросъёсысь егитъёслэн ог-огенызы герӟетъёссы ӧвӧл

— огазеяськонлэн ужез газет-журналъёсын но Интернетын ляб возьматэмын.

Азьланяз но ми тыршомы анай кылмес, культурамес, сям-йылолъёсмес утьыны но азинтыны. Милям ваньмыз пӧрмоз. Котьку мед пиштоз «Шунды»!

Удмурт Дунне
By Удмурт Дунне 29 февраля, 2012 09:12