Суредъёсын кылсузьет

Удмурт Дунне
By Удмурт Дунне 15 февраля, 2012 11:14

Суредъёсын кылсузьет

Луэ-а суредъёс пыр гинэ мукет кылэз дышетыны? Луэ, верало тодосчиос.

Таӵе ужпум борды бась­тӥськиз А. Журавлёва. Анай, мама, mother — тазьы вераськыны туннэ луонлыксы вань нылпи садэ ветлӥсьёслэн но, школаын дышетскисьёслэн но. Соос кие вуиз «Суредъёсын кылсузьет. Удмурт, ӟуч, англи кылъёсын» пособие. Та бордын ужаз на «Удмуртия» книгапоттонниысь редактор Т. Пояркова.

Кылсузьетэ пыртэмын 34 темая ог 600 предмет нимъёс. Соослэсь пуштроссэс валаны юрттозы Удмуртиысь калык кылбурчилэн А. Леонтьевлэн буёло пичиесь суредъёсыз. Кылсярысь, сётэмын семьяен, гуртэн, пӧйшуръёсын, арлэн вакытъёсыныз, лыдъяськон пусъёсын герӟаськем кылъёс. Нош сюжето суредъёсъя пиналъёс пӧртэм веросъёс малпаны быгатозы, мадиськонъёс, кылбуръёс но кырӟанъёс дышетозы.

* * *

Паймымон выжыкыл дуннее вуиськод, «Лӧпшо Педунь серекъя» книгаез лыдӟыса. Со нырысьсэ люкамын но поттэмын вал тодмо тодосчиен Д. Яшинэн 1968-тӥ арын. Мукет геройёс сямен ик, Лӧпшо Педунь но котькыӵе шуг-секытъёсты ворме, урод сямо муртъёсты бышке. Вераны кулэ: та выжыкыл огдыре ӟуч кылын но потӥз. Лӧпшо Педунез суредаз М. Вахрин.

* * *

Инкуазен, улонэн тунсыкъяськисьёс понна нимысьтыз 7 пичи книгаос дасямын: «Птицы. Тылобурдоос», «Насекомые. Нымы-кибыос», «Рыбы. Чорыгъёс», «Животные. Пӧйшуръёс», «Грибы. Губиос», «Лекарственные растения. Эмъюм будосъёс» но «Удмуртские народные узоры. Удмурт калык пужыос». Таос бордын ужаз редактор Т. Воронова. Котькуд сузьетын валэктонъёс сётэмын, чебересь суредъёс лэсьтэмын.

* * *

С. Лебедевалэн «Удмурт калык пужыятон» ужез наука ласянь ӝот-ӝот эскеронъёсыныз висъяське. Со куинь кылын поттэмын — удмурт, ӟуч но англи. К. Герд нимо Национальной музейысь узыр люкамъёс пӧлысь татчы пыртэмын уката яркытъёсыз — калык сямез но дунне шоры учконэз возьматӥсь пужыос. Пӧртэм интыосын улӥсь удмуртъёслэн пужыятсконзылэсь аспӧртэмлыксэс усьтэмын, пужыятскон амалъёс суредаса сётэмын.

Вань та книгаосты басьтыны быгатӥськоды «Удмуртия» издательствоысь.

Георгий Туйматов

Удмурт Дунне
By Удмурт Дунне 15 февраля, 2012 11:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<