Пӧечи кылъёсын ним уд лэсьты!

Удмурт Дунне
By Удмурт Дунне 10 февраля, 2012 10:32

Пӧечи кылъёсын  ним уд лэсьты!

Котырес ӝӧк сьӧрын кенешон.

Валлян Кун Кенешлэн юртаз котырес ӝӧк сьӧрын эскеризы Владимир Путинлэсь «Демократия но кунлэн ӟечлыкез» статьязэ. Кенешонэ-ченгешонэ пыриськизы политологъёс, тодосчиос, общественной огазеяськонъёслэн кивалтӥсьёссы, ужбергатӥсьёс, журналистъёс.

Оглом статьяез ваньзы сямен ик ӟечен пусйизы. Нош мар пумысен мылкыдъёс висъяськизы?

 

Кенешонэз усьтыса, Удмурт кун университетлэн проректорез, политолог Михаил Малышев пусйиз: премьерлэн статьяезлэн шорсюлмыз — кун мышление. Таин герӟаськемын вань ӝутэм ужпумъёс: демократиез шонер валан, интыысь аскивалтон, тодон-валанэз будэтон, коррупциен нюръяськон но мукет.

Вераськонэ соку ик итӥськиз «Молодая гвардия» огазеяськонлэн ёзчиез, егит ужбергатӥсь Станислав Осипов. Егитъёслэн нимынызы со ӟечен пусйиз Путинлэн статьяысьтыз куд-ог интыоссэ. Тужгес но, пе, умоен лыдъясько интыосын но улосъёсын Интернетэз валаса кутонэз, сое демократия ӧре пӧлэстон сярысь малпанэз. Сюлмаськоно, пе, вылэм, Интернетын кун политика, пӧртэм программаос сярысь тросгес ӟеч ивор мед луоз шуыса.

Таин соглаш луиз ИжГТУ-лэн проректорез, философия наукаосъя кандидат Александр Балицкий но: тани дано конструкторлэн Михаил Калашниковлэн вордӥськем нуналыз сярысь иворез Интернетын шедьтыны ӧз луы, нош «гламурной» Собчак — нырысетӥ интыын.

Политолог Михаил Малышев малпамъя, ваньмыз герӟаськемын тодон-валан, ӟеч образование сётымтэен. Наукамы но, пе, ас понназ пӧзе. Шуом, Ванкуверын ортчоно бадӟым калыккуспо форумын 3 сюрс 500 пала докладъёс лэсьтэмын луозы. Нош Россиысь отчы асьсэ ужъёсынызы куинь адями гинэ пыриське.

Политолог Геннадий Овчинников ӵоге: нырысь будоно ай, мынон понна гинэ ветлоно ӧвӧл. Но шӧдтэк шорысь тодосчи выже иворъёсты вӧлмытон ёзъёсты пыкылон вылэ. Соос, пе, калыклы ӟеч ивор вуттэм, умой сям-йылолъёсты, учыръёсты возьматэм интые, «жарить каремзэ» гинэ утчало. Озьы ик Интернет но. Нош СМИ-ос бордысь потэ ук калыклэн дунневаланэз!

Овчинниковлэн куд-ог веранъёсызлы чутрак пумит луиз «Удмурт дунне» газет. Вань СМИ-осты одӥг колӟое биняны уг яра. Улосъёсын ӟеч мылкыдо, патриотизм шӧмо газетъёс, ужась адямиез возьматӥсьёс ӧжыт ӧвӧл. Но трос-а соосты лыдӟисьёс? Уноез дышемын ӧвӧл ни газет-журнал басьяны. Сыӵе калэ вуонлэн бадӟым мугез — секыт выльдӥськон вакытъёс, куашкам дунлыкъёс.

Лэчыт вераськон ӝутӥськиз интыысь аскивалтон котырын. Владимир Путин аслаз статьяяз шуэ: интыысь аскивалтон — со демократилэн школаез. Премьер тодэ вайытэ А. Солженицынлэсь кылъёссэ: «Интыосын гинэ адямиос янгышатэк быръён лэсьтыны быгатозы. Угось отын ог-огзылэсь ужаны быгатэмзэс, сямъёссэс ӟеч тодо. Интыосын алдаськыса ним уд лэсьты, пӧечи, чебер вераськыса гинэ, калыклэсь йырзэ уд берыкты. Умой-умой радъям аскивалтонтэк ӟеч улонэз уд лэсьты».

Котырес ӝӧк сьӧрын та малпанэн ваньзы ик соглаш луизы. Но куд-огез сюлмаськиз: гурт поселениосын зэмос аскивалтонэз радъяны луэ ке, городъёсын — уг!

Нош вань-а туннэ нуналлы зэмос аскивалтон? Аскивалтон шуэмын ке но, интыосын полномочиосты быдэсъян понна коньдон ӧвӧл. Та пумысен вӧсьсэ кисьтыса, «Огъя Россия» партилэн республикаысьтымы быдэсъясь комитетэзлэн кивалтӥсезлэн воштӥсез Николай Поремов тодаз вайиз «интыослэсь» ӝожтӥськемзэс. Ми, пе, асьме музъеммы вылын мурт музъем вылысь партизанъёс кадь. Малы? Штраф сётъяло тылпу кысӥсьёс но, Прокуратура но, мукет огазеяськонъёс но, нош ужъёсты быдэстон понна коньдон ӧвӧл. Уксё луысал ке, трос ужпумъёсты интыосын ик сэрттыны луысал ни. Со понна адямиос вазиськоно ӧй луысалзы депутатъёслы, республикаысь кивалтӥсьёслы, Президентлы.

Котырес ӝӧк сьӧрын пукисьёс ӟырдыт вераськизы Россилэн мукет кунъёсын вожвылъяськыны быгатэмез пумысен но. Пусъемын вал: туала вакытэ дуннеын тужгес бадӟым узырлык — адямиос. Соин ик ӝож, асьме визь люкъёс палэнэ кошко ке. Озьыен, кунамы кылдытоно творчестволы но ужбергатонлы азинскыны луонлыкъёс.

Статьяяз Путин ӝутӥз коррупциен нюръяськон ужпумез. Со пумысен котырес ӝӧк сьӧрын кенешисьёслэн малпанъёссы висъяськизы. Огъёсыз меӵак шуизы: коррупциез вормон понна кулэ репрессиос. Мукетъёсыз ӧпкелизы: коррупция котьку вал, сое выжытӥз ноку уд поры. Куинетӥосыз, Путинэн соглаш луыса, пусйизы: чиновникъёсты шарагес кароно, золгес чакласа возёно, «электрон правительство» выллем амалъёсты паськытгес кутоно…

Котырес ӝӧк сьӧрын оглом пусйизы: статья секытгес кылын гожтэмын. Сое калык доры вуттон понна, отысь тужгес кулэ интыоссэ валэктыса, газетъёсы поттыны умой луысал.

Елена Панфилова.

Туспуктӥз Олег Ларин.

Удмурт Дунне
By Удмурт Дунне 10 февраля, 2012 10:32
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<