Пыд выламы йыг-йыг султом

Удмурт Дунне
By Удмурт Дунне 10 февраля, 2012 10:26

Пыд выламы  йыг-йыг султом

Кылем арняе Россилэн премьерез Владимир Путин тодматӥз экономикаез азинтонлы сӥзем статьяеныз. Зэм но, вуиз ни рос-прос сэзъялскон вакыт. Тырмоз ӵошатыны толло нуналэн — Совето Союзысь вакытэн. Асьмеос выжимы выль дауре. Котькудмылэн ӟечгес улэммы потэ, нош вормонъёс ас кожазы гинэ уз лыктэ. Выльдӥськоно наукалы, промышленностьлы, калыклы. Кыӵе амалъёс вань асьме шаерамы? Со пумысен кенешиськом Удмуртиысь экономикая министрен Михаил Зайцевен.

— Михаил Петрович, Удмуртиез азинтонлы сӥзем стратегиын валтӥсь ужпум пуктэмын, 2025-тӥ арозь шаермы промышленность удысын зол но кужмо луыны кулэ шуыса. Кыӵе производствоосты республикаын азинтыны быгатом?

— Экономикаысь валтӥсь удысъёс пӧлы пыртыны луоз электрооборудование поттонэз, му вӧй но газ кысконъя машиностроениез, автомобиль но солы кулэ луись ёзъёс дасянэз. Та удысъёс берло аръёсы шӧдскымон кужмоязы, азьланяз но соос пумен азинскозы. Тани автомобиль поттон сектор 2009-тӥ-2010-тӥ аръёсы кысылӥз, нош али та удыс шаплы выльдӥське — азьло лыдпусъёсын ӵошатыса, со 2-2,5 поллы золгес радъяськоз.

Малпасько, уката бадӟым кулэяськон (спрос) тупалоз радиоэлектронной вузъёслы, пӧртэм пумо приборъёслы. Экспертъёс пусъё: азинскыны быгатоз связь удыслы чаклам вуз поттон. Тазьы ик кулэ луоз му вӧй но газ кысконлы тупась оборудование. Удмуртилэн та бадӟым рынокын ас сэрегез кылдыны быгатоз — «куасьмись» (малодебитной) скважинаослы чаклам ужан тӥрлык дасян. Автомобиль промышленностез ватсано ке, та удыслы нимысьтыз корт, машина ёзъёс дасяно луоз. Связь, электро, эмъян удыслы тӥрлык — тазэ но син шорын возёно.

Со вакытэ ик огсыр ужась удысъёс, продукцизэс ӵектыса, выль сюрес утчалозы. Но Удмуртия азьланяз но утёз аслэсьтыз ож тӥрлык поттонъя интызэ — дасяломы пыӵал-автоматъёс, ракетаос, атом промышленностьлы ёзъёс. Тае быдэстон понна предприятиослы ужан тӥрлык ласянь выльдӥськон амалъёс утчано. Модернизация понна кыӵе ке учыръёсын быгатоно вузлэсь дунзэ кулэстыны, ужасьёслэсь азинлыксэс ӝутыны, кытын ке маркетингъя туала стратегиез пыӵатыны.

— Кызьы чакласькоды, быгатоз-а обороная комплекс экономикалэсь бадӟым люкетсэ басьтыны?

— Кылем арын Удмуртиысь предприятиос 289,3 миллиард манет тыр вуз дасязы. Бордаз будэтоно на обрабатывающей производствоын поттэм вузъёсты — таосыз 150,5 миллиард манет тыр дасямын.

Обороная комплексэз верано ке, та предприятиос чотын возиськиз, али но возиське республикалэн промышленностья инъетэз. Туннэ нуналлы Удмуртиын 9 завод. Ватсано на: промышленностьын ужасьёс пӧлысь 30 процентэз калык татчы интыяськемын. ОПК предприятиосты республика ласянь чакласьком, пыд йылазы йыг-йыг возиськыны, тыронъёссэс дыраз ворсаны мед быгатозы шуыса. «Сарапульский радиозавод» огазеяськон гинэ туннэ сюлмаськытэ.

Удмуртиын машиностроениез но корт поттонэз 2010-тӥ-2013-тӥ аръёсы азинтонлы сӥзем нимысьтыз программая ОПК-лы субсидиос висъясько. Кылсярысь, инвестицияя проектъёсты быдэсъяны коньдон сётэмын Сарапулысь электрогенераторной заводлы, «Элекондлы». Ваньбурлы выт тыронъя капчиятон басьтӥзы Ижысь механикая завод, «НИТИ «Прогресс», Сарапулысь электрогенераторной завод, «Элеконд».

— Кылем арын толэзьысь толэзе возьмамы но адӟимы, кызьы улӟыны ӧдъяз Ижысь автозавод. Ку таиз предприятие экономикамылэн шорсюлмыз луоз?

— Миым Ижысь автозавод ужасьёсты кутыны ӧдъяз, со дыре ик производствозэ йылэтӥз, выль модельёс дасян борды басьтӥськиз. Августэ 10 сюрслэсь трос машина поттэмын. Таӵе зол ужаны берлозэ пӧрмытӥм вал 1992-тӥ арын гинэ. Оглом январьысен декабрёзь 70 сюрс 176 машина лэсьтэмын, пӧлысьтыз 64 сюрс 936-ез — легковой авто.

Заводэ 3 сюрс ужасез кутӥзы. Быгатӥзы ВАЗ-лэсь «классиказэ» бичаны. Та модельёсты туэ но лэсьтозы, озьы ик поттозы «Иж-27175». Нош кыкетӥ паларе басьтӥськозы Lada Granta борды. Бӧрысь вуозы Renault-Nissan альянслэн модельёсыз.

— Дуннеысь вуз каронъя огазеяськонэ (ВТО-е) Россия 18 ар ӵоже пырыны выриз. Кылем арын декабре та малпан быдэстэмын. Удмуртиын таин валче кыӵе удысъёсын ӟеч яке урод пала воштӥськонъёсты шӧдомы?

— Экономикалэн одӥг сектораз но бадӟым шугъяськонъёс уз кылдэ. Кӧня ке азьпала учкыса верано ке, вожвылъяськонэз уз ворме куд-ог предприятиос — но соос али ик нюръяськыны уг ни пишмыто.

Асьме военной техникаез кунгож сьӧры поттыны быгатом азьло кадь ик пошлинаен. Но со дыре ик ватсано: ВТО-е пыронэн валче кутэм огкылъя пыӵал тӥрлыкез, боеприпасъёсты вузан кулэсмыны но быгатоз. Россилэн, со та огазеяськонлэн ёзчиез луиз бере, правоез вань куронъёс пуктыны — шуом, кыӵе ке вуз адямилэн тазалыкезлы яке улонэзлы кышкытлык вайись ке.

— Президентэ мынӥсь кандидат Владимир Путин аслаз программаяз нимысьтыз гожтэ Россие инвестициос кыскон сярысь. Асьме шаерамы кыӵе удысын бадӟым выльдӥськонъёс ортчытыны кулэ?

— «Республикаысь промышленностез азинтонъя валтӥсь вамыш луэ инвестициос, инновациос, кунлэн но нимаз ваньбур кузёослэн валче ужамзы», аслаз докладаз пусйиз Удмуртилэн Президентэз Александр Волков.

Экономикаысь вань удысъёсы вуэ азинскыны чаклам коньдон. Кема дыр ӵоже йӧнала уксё ӧз вуы гурт удысэз вырӟытыны. Со понна берло аръёсы татын кӧня ке бадӟым проектъёс быдэсмо. Кылсярысь, гурт удысын сӥль поттонэз но переработкаез азинтонлы оглом 10 миллиард манет висъяське. Та чотын производство но выльдӥськоз, выль объектъёс но ӝутӥськозы.

Берло дыре кун юрттэ нанотехнологиосты азинтӥсьёслы. Асьме дорын «РОСНАНО» юрттэмъя «НПЦ «Пружина» огазеяськон юн пружина лэсьтонъя проектсэ улонэ пыӵатэ. Та удысын мытэм ужъёс али ичи бере, предприятиослы «РОСНАНО»-ен уката матысь ужано — соослэн инвестициослы чаклам коньдонзы вань.

Удмуртилы азинскон понна вань удысъёслы саклык но ӟеч уксё кулэ. Экономикая министерство котькудӥз понна тупась сюресъёс чакла. Азинскон удысъёс пӧлы пыртэмын нано- но биотехнологиос, тылэз но мукет ресурсъёсты утись технологиос, космослы техника поттӥсь технологиос но мукетъёсыз. Ӵапак таосты одно ик чаклаломы, республикаез азинтонъя программаос дасяку. Оскем потэ, кун ласянь висъяськись инвестициосын ӵош ик нимаз ужбергатӥсьёс но азинсконлы уксёзэс уз жалялэ.

— Россиысь Статистикая комитетлэн ивортэмезъя, странаысьтымы 14 процентэз улӥсьёс — куанеръёс. Кыӵе шоро-куспо доходъёс та дыре республикаямы? Ӟечгес улыны кутскомы-а?

— Ёрмон калэ вуэм сярысь вераку, статистикаын лыдэ басьто улыны чаклам минимумлэсь ичи коньдонэн векасьёсты. Та минимумлэн быдӟалаез потэ потребительской «куды» бордысь — татчы пыро сиён-юон, дӥськут, улон инты но тыл понна услугаос, мукет дунъёс. Со вакытэ ик минимум мукет луэ, улӥсьёслэн лыдзы, уждунзы воштӥське ке, инфляция шудэ ке.

Кылем арын Удмуртиын шоро-куспо доход 13 сюрс 888 манет луиз — со 12,7 процентлы йылӥз. Но татысь инфляциез куштоно ке, дунъёслэсь тэтчемзэс чаклано ке, калыклэн шоро-куспо табышез 2,6 процентлы гинэ будӥз. Нош 2000-тӥ арез тодамы ваёно ке, коньдон 9 поллы йылӥз.

Нимысьтыз висъясал тазэ. Шоро-куспо доходэ пыро уждун но, социальной пособиос но, банке тырем коньдонлы лыктӥсь процент но, дивидендъёс но мукетъёсыз.

Ортчем аре январь-ноябрь толэзьёсты чотано ке, Удмуртиын шоро-куспо уждун вуиз 15 сюрс 365 манетэ. Валля арен ӵошатыса, 11,8 процентлы уногес. Нош зэмос уждун будӥз 1,7 процентлы гинэ.

Берытсконо ке улыны чаклам минимум вылэ, таизлэн быдӟалаез 5 сюрс 475 манет котырын. 2010-тӥ арен ӵошатыса, со йылэм 12,8 процентлы. Шоро-куспо уждунэн ӵошатоно ке, улыны чаклам минимум шаплыгес будэ. Малы тазьы луиз? Уго шаерысьтымы калык палэнэ кошке. Миграциен валче ёрмыса улӥсьёслэн лыдзы йылэ. Гурезьёс сӥзем уг поты. Но азинскон луоз. Тани 2025-тӥ арозь шоро-куспо уждунмы 4 поллы йылоз.

Елена Скворцова.

Удмурт Дунне
By Удмурт Дунне 10 февраля, 2012 10:26
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<