Нылкышнолэн нуналыз: ньӧмыз понна гинэ?

Удмурт Дунне
By Удмурт Дунне 29 февраля, 2012 09:45

Нылкышнолэн нуналыз: ньӧмыз понна гинэ?

Нылкышно улонэ шунытсэ но чылкытсэ вае.

8-тӥ южтолэзез кышномуртъёслэн нуналэнызы огшоры гинэ уг нимало.

 

1857-тӥ арын Нью-Йоркын вуриськон но пыдкутчан лэсьтон фабрикаосысь кышномуртъёс асьсэлэсь правооссэс утён манифестацие люкаськиллям. Соос 10 часъем ужан дыр, югыт но кӧс ужан инты, пиосмуртъёсын огкадь уждун понна нюръяськиллям. Со вакытэ кышномуртъёс нуналаз 16 час ужаллям ке но, уксё туж ӧжыт басьтылӥллям. Та дырысен кутскем эмансипация. 1910-тӥ арын Копенгагенын социалисткаослэн калыккуспо конференциязы Клара Цеткин 8-тӥ южтолэзез кышномурт нуналэн ниманы ӵектэм. Азьвыл та нунал кышномуртъёслэн улоназы туж бадӟым инты басьтӥз, со правооссэс утемзылэн вормон пусэз луиз. Туала вакытэ, мон малпамъя, со ыштӥз та функцизэ. Тани мар малпало та праздник пумысен егитъёс.

 

Аноним, 26 арес

— Пичи дыръям мон понна вал 3 праздник: Выль ар, Великтэм но вордскем нунал. Та праздникъёсты яратылӥ, котьку шумпотыса вити. 8-тӥ Март сярысь тодӥ школаысен гинэ, со мон понна сыӵе формальной праздник вал (23-тӥ февраль кадь ик). Дышетӥсьёс милемды мамаосмылы, бабушъёсмылы кузьым лэсьтылыны косылӥзы. Одно пыкылžзы: мамадэ-бабадэ уд яратӥськы-а, мар-а? Бӧрысь валай, мар понна ваньмыз та: ачим но ӟечкыланъёсты витьыны кутски. Но праздник сюлэмме уг шунты.

 

Василий, 20 арес

— 8-тӥ Март — со одно ик кышномуртъёслэн нуналзы. Со шунытэн, вуись тулысэн герӟаськемын. Эшшо та нунал тодэ лыктэ 8 лыдпус тусо открыткаен, тюльпан но сирень сяськаен. Нылпи садын но начальной школаын ваньмы ӵош хорын кырӟан дышетӥськом вал. Тӥни озьы, та праздникен герӟаськемын тодэ ваёнъёсы, кыдёкысь, пинал дырысь йыре малпанъёс лыкто… Нылаше луиз ке, та праздник тросгес герӟаськемын луоз, дыр, соин.

 

Семён, 25 арес

— Праздникъёс улонам бад-ӟым инты уг басьто. Азьло мон та нуналэз яратӥсько вал, нош ужбергатӥсь луи но мыным вань праздникъёс уг ярало ни. Анае но туганэ понна гинэ мон соглаш луо соосын 8 Мартэз пусйыны.

 

Артур, 19 арес

— 8-тӥ Мартэ нылашъёслы духи но пӧртэм чеберъяськонъёс кузьмаськод, нош 23-тӥ феврале витиськод носки но майтал.

 

Алина, 18 арес

— Та нылкышноосты данъян, соослэсь бурдъёссэс ӝутон нунал — озьы ик, кызьы сайка инкуазь!

***

8-тӥ южтолэзе гинэ ӧвӧл, котькуд нунал нылкышноослэн но нылмуртъёслэн киосазы сяськаос мед луысалзы, нош ымныразы пальпотон мед пиштысал. Малы ке шуоно нылкышно улонэ шунытсэ, чылкытсэ но умойзэ вае.

Ксения Ворончихина.

Удмурт Дунне
By Удмурт Дунне 29 февраля, 2012 09:45