Мултэс пудо сиён — йыр висён?

Удмурт Дунне
By Удмурт Дунне 28 февраля, 2012 07:42

Мултэс пудо сиён — йыр висён?

Куд-ог хозяйствоос пудо сиён 2-3 арлы тырмымон дасязы.

Правительстволэн Тӧроезлэн воштӥсез Александр Коробейников журналистъёсты тодматӥз гурт удыслэн кылем арын азинскеменыз.

— 2011-тӥ ар гуртын тыршисьёс понна капчиен ќз сётӥськы. Со, оло, азьло арлэсь но секытгес ортчиз. Малы? 2010-тӥ арын, пудо сиён тырмымтэен, кулэсмиз пудо йыр, синӥз йӧл поттон, секытэн мынӥз тулыс бусы ужъёслы дасяськон. Озьы ке но кун ласянь юрттэт дыраз сётэмен, куд-ог шуг-секытъёс палэнтэмын вал. Гурт удыслы висъяськиз 1,5 миллиард коньдон. Выль кӧс арлэсь кышкаса, хозяйствоос мултэсэн пудо сиён дасязы, куд-огез 2-3 арлы тырмымон. Фуражез лыдъятэк, республикая котькуд пудо йырлы шорлыдын люкамын вал 25 кормовой единица сиён. Но сое дасян понна трос кужым но коньдон быдтэмын. Вылаз ик, кылем гужем шорын трослы будӥзы кизер эстӥськонлы дунъёс. Со ваньмыз шӧдӥськиз гурт удыслэн огъя экономикаез вылын.

Кылем арын секытгес луиз кредит тыронэз берыктонэн. Уждун каллен будэ. 2011-тӥ арын гурт удыс 46,4 миллиард манет тыр сиён-юонъёс будэтӥз. 2010-тӥ арен ӵошатыса, 20 процентлы ятыргес — соку 39 миллиард вал. Вань хозяйствоосты лыдэ басьтыса, йӧл поттэмын 682 сюрс тонна, азьло арлэсь 11 сюрс тонналы тросгес. Нырысьсэ республикая котькуд скаллэсь кыскемын шорлыдын 4 сюрс 664 килограмм йӧл. Сӥль 166,3 сюрс тонна поттэмын, азьло арлэсь 2 процентлы тросгес. Йылэмын тылобурдо, парсь но скал сӥль поттон.

Кылем арын удалтӥзы ю культураос но. Шертэм, куасьтэм ю тысь люкаськиз 641 сюрс тонна, 2010-тӥ арынлэсь кык поллы тросгес. Котькуд гектарысь кутсамын шорлыдын 17,2 центнер. Та лыдпусозь республика берлозэ вуылӥз 1986-тӥ арын.

Кивалтӥсь пусъе: таӵе азинсконъёс басьтэмын гуртоослэн умой ужаменызы, кун ласянь бадӟым юрттэт сётэмен. Удмуртия сяна, федерал бюджет гуртлы 946 миллион манет висъяз. Озьы сиён-юон поттӥсьёс одӥг арскын 2,5 миллиард манет тыр юрттэт басьтӥзы. Та коньдонэн ик гуртысь улон-вылонэз умоятӥзы: 2011-тӥ арын пуктэмын 742 дышетскон интылы 6 школа, Ува каргуртын усьтэмын нылпи сад, спортъя бадӟым комплекс лэсьтэмын Пичи Пурга черкогуртын, куас база усьтэмын Можга городын.

2010-тӥ — 2015-тӥ аръёсы сюресъёсты выльдон программая шаерамы тупатэмын 62 иськем гурт сюрес. Та уж азьланьтэмын луоз. Угось асьмелэн 1,5 сюрс иськем сюй сюресъёсмы вань на. Туэ республикаямы сюрес лэсьтонлы федерал бюджетысь 609 миллион манет висъямын луоз.

Шаерысьтымы гуртъёсы газ кыскон программая 2010-тӥ — 2011-тӥ аръёсы кутэмын 268 миллион манет. Со коньдонэн 270 иськем чагыр эстӥськонэн гумыос кыскемын. Та дырлы Удмуртиысь 40 процентэз гуртын улӥсьёс чагыр эстӥськонэн шунтӥсько ни. Секытгес та ласянь югдур уйпал ёросъёсын.

Республикаын озьы ик азьланьтӥське гуртысь улон коркаосы ву пыртон. Кылем арын талы 34 миллион манет висъямын. 20 иськем ву гумыос кыскемын.

2011-тӥ арын гуртын тыршисьлы улон интыен юрттон вылысь висъямын 316 миллион манет. 26,3 сюрс квадрат метр улон инты пуктэмын, со пӧлысь 7,5 сюрс квадрат метрез — егит семьяослы.

Иван Аркашев.

Удмурт Дунне
By Удмурт Дунне 28 февраля, 2012 07:42