Модной луэмед потэ?

Удмурт Дунне
By Удмурт Дунне 29 февраля, 2012 09:35

Модной луэмед потэ?

Анна Шарыпова.

Модае пырыны быгато пӧртэм дӥсь, крезьгур, буёлъёс… Мон сямен, удмурт егитъёс пӧлын туннэ модаын пӧртэм кунсьӧр кылъёс но: англи, немец, фин-угор. Туала егитъёслэн бадӟым луонлыкъёссы кунгож сьӧрын дышетскыны, ужаны, Интернетын бугыръяськыны.

Удмурт калык пӧлын туж уно дано адямиос — тодосчиос, писательёс, артистъёс, крезьгурчиос, спортсменъёс, дышетӥсьёс, врачъёс. Нимтулъёссэс вераса но уд быдты. Берло дыре егит азьмынӥсьёс-кичӧлтӥсьёс сярысь но данъяськыса вераны быгатӥськом, соослэсь адӟем карыны тыршиськом. Кылсярысь, эктоникаез нуись журналистъёс Вероника Самсонова, Владимир Вахрушев но Пётр Пушкин, удмурт ужбергатӥсь Семён Семёнов, пќртэм проектъёсын вырись Алексей Шкляев, программист Роман Казаков, «Шунды» дэменлыклэн тӧроез Ольга Тронина, чеберай Ксения Воронцова…

Мон туж синмаськыса учкисько пинал Павел Вахрушев шоры но. Мынэсьтым ог ареслы гинэ бадӟым, нош кытчы гинэ уг вуы со, кӧня пайдаё, ӟеч ужъёс лэсьтэ, сьӧраз мукет егитъёсты валтэ. Таӵе быгатӥсь, котьмаин тунсыкъяськись удмурт егитъёс шоры учкыса, кызьы уд шуы, удмурт луон модной?

Ваньмон дыръя, тросэз егитъёс сямен ик, мон ӵемысь пукисько Интернетын. Тунсыкъяськисько, кытын, ку, мар ортче. Шумпотӥсько, удмурт кылмы но вань Интернетын, кылдытэмын пӧртэм сайтъёс, блогъёс. Кемалась ик ӧвӧл, удмурт литературая урокын Владимир Романовлы сӥзем виртуальной музее пырамы. Табере отчы, солэн пӧртэм залъёсаз, шедьыны быгатэ дуннеысь котькуд адями уйин но, нуназе но. Дышетӥсьмы валэктӥз, сое кылдытэм Алнаш ёросысь Шудья гуртысь егит дышетӥсь Ирина Евдокимова. Тодосчиос но вылӥ дунъет сётӥзы солэн ужезлы. Удмурт литература понна, пе, та революция. Таӵе ужен тодматскыса, милям асьмелэн но кужыммес эскереммы потӥз.

Удмурт кылэз тодӥсь, дышетӥсь адямилэн улон шоры учконэз паськытгес, мургес, пуш дуннеез но узыргес. Со угось, ас калыкезлэсь культуразэ, пӧртэм сям-йылолъёссэ тодыса, будэ. Сыӵе адямиосты котькытын гажало.

Тодам лыктэ Ижкарысь одӥгаз лагере вуылэме. Ӟучъёс пӧлын ми дас кузя удмуртъёс вал. Но ми ӧм возьдаське кылмылэсь, куспамы удмурт сямен бӧтьыртӥм. Эшъёсмылы нырысь ӧз кельшы тазьы вераськеммы, нош бератаз ваньзы сямен ик ёртыны кутскизы: милемыз но, пе, дышетэ удмурт кыллы. Смена йылпумъяськыку, ог кызё удмурт кылъёсты но «Лымы тӧдьы» кырӟанэз туж умой тодо ни вал.

Школаямы алигес ортчиз выпускникъёслы сӥзем ӝыт. Туж тунсыко радъямын вал со. «Меӵак эфир» люкетаз вал таӵе юан: туннэ нуналэ кылӥське-а городын, дышетскон заведенияды, огъяулонниын удмурт кыл? Таӵе валэктонъёс сётӥзы:

— Удмуртэз но, ӟучез но, бигерез но — ваньмыз огкадь кылӥсько. Общагаямы удмуртэз, оло, тросгес но. Малы ке шуоно ми Алнаш палась ик ог куамын кузя дышетскиськом. Ваньмы удмуртъёс. (Настя Алашеева, 1-тӥ курс, ЕГПУ, технологической факультет).

— Одно ик! Мон удмурт факультетын дышетскисько ук! Котьку, котькытын удмурт кылын вераськиськом (куд-ог предметъёсты вератэк). Туннэ удмурт кылэз дышетыны асьме доры лыкто пӧртэм фин-угор калыкъёс но. Соос но шалтыр гинэ верасько ни удмурт кылын. (Марина Шарыпова, УдГУ, 4-тӥ курс).

Та валэктонъёс но верало: туала егитъёс, городэ кошкыса, уг возьдасько удмурт кылзылэсь. Нош мар малпало меда та пумысен школаысьтымы бадӟым классъёсын дышетскисьёс? Вазиськи 15 нылашлы но 17 пияшлы. Паймымон вал соиз: нылъёс пӧлын ваньмыз монэн соглаш луизы, нош пиос пӧлысь — кыкез гинэ. Но соос ӧчкарыса кадь озьы шуизы потэ. Туж шумпотӥ, мон сямен малпасьёс уно.

Азьланяз, малпасько, в­а­­­­нь­­­мыз ик рос-просгес басьтӥськозы вордскем кылзы борды. Оскем потэ, мукет калыкъёс но мылысь-кыдысь дышетозы удмурт кылэз, малы ке шуоно со модаын гинэ ӧвӧл, со — кун кыл.

Анна Шарыпова.

Удмурт Дунне
By Удмурт Дунне 29 февраля, 2012 09:35