Матысь эше

Удмурт Дунне
By Удмурт Дунне 29 февраля, 2012 09:37

Мон туж паймыса лыдӟи «Удмурт дунне» газетысь 16-тӥ толсуре потэм «Воронцова воректӥз!» статьяез. Ксения Воронцова «Уйпал кизили-2011» ӵошатсконын вормем. Шумпотоно, Ксениялэн вормонэзлы луыса вуоноез ӵошатскон нырысьсэ радъяськоз Удмурт шаерын.

Ки улам шедиз вуж «Удмурт дунне» газет. Отысь Татьяна Ишматова сярысь гожтэмез лыдӟи. Татьяна вормисе потэм Сыктывкарын кырӟасьёслэн ӵошатсконазы. Со вера: «Мыным, али кырӟаны кутскись муртлы, сяська кузьмало! Валаськоды-а? Адямиос, катанчи сьӧры лыктыса, чупало, ушъяло, фонограммаме куро. Воркутаос, архангельскъёс кырӟан куро, валаськоды-а? Нош мон сылӥсько, бам кузям синкылиос васько». Жюриен кивалтӥсь но, пе, шуэ: «Тӥни кызьы яратоно аслэсьтыд калыктэ! Соку солэн кылыз ваньмызлы валамон луэ».

Татьяна Ишматова табере тодмо, дано адями. Нош ваньмыз кутскиз анай кылысеныз. Удмурт кылыз сое нырысь вуттӥз «Шунды» огазеяськонэ, «Шундыкаре».

Нош Алёна Родионоваез, егит тодосчиез но милесьтым аспалмес, удмурт кылыз Америкаозь вуттӥз. Со шуэ: «Куинь кылын вераськеме (удмурт, ӟуч, венгер) мыным туж юрттӥз выль кылэз дышетыны. Кӧня кылэз тодӥд, сокем капчигес луоз выльзэ «киултыны».

Алигес тодмо луиз Вадим Давыдовлэн нимыз. Со удмурт кылъя но литературая олимпиадаын 1-тӥ инты басьтэмез понна сӥлы каремын Удмуртилэн Президентэзлэн грантэныз — 30 сюрс манетэн! Солы но вормон вайиз анай кылыз!

Кемалась ӧвӧл Ижысь Шор площадьын ӝутскиз зэмос гур. Паймымон учыр. Вӧзтӥз ортчисьёс но чылкак абдразы талы: отын, пе, зэмос перепеч но табань пыжо! Эсьмаса, ваньзэ дасяло син азяд. Нимыз но та интылэн бордаз кыскись — «Перепеч.кин». Проектэз кылдытон бордын тыршизы егитъёс — удмурт ужбергатӥсьёс Семён Семёнов, Алексей Вотинцев но Роман Дементьев. Тросгес мед луысалзы вылэм номырлэсь кы­ш­касьтэм, удмуртлыкез, анай кы­лэз гажась таӵе егит азьветлӥсьёс, ужбергатӥсьёс.

Удмурт кылэз тодон зэмзэ но туж кильтро вылэм! «Шундыкар», «Шудо семья», «Вамыш» но «Усточикар» проектъёс, «Эру» праздник, «Ӝужась кизилиос» ӵошатскон, «Шунды-салянка» шулдыръяськон ӝыт, «Гожты астэ удмурт!» акция но уно мукетъёсыз пыр удмурт кылэз тодӥсь но гажась егитъёс огазе кариськыны быгато, удмурт культурамес дунъяны дышетско, тодон-валанзэс волято. Нош малы куд-огез, школамес ик басьтоно ке, шуэ: «Удмурт кыл, гурт пуме мынытозь гинэ, кулэ». Мон сямен, озьы малпало, кин гуртсэ но, вордскем шаерзэ но уг яраты. Оло, анай-атайзэ но?

Одӥг пияш сочиненияз гожтэм: «Удмурт кылэз дышетэме уг поты. Азьланьын со мыным кулэ уз луы. Удмурт сямен вераськеме луэ бере, малы со кулэ на?» Кыӵе сюбегесь та пияшлэн малпанъёсыз! Малпа, лэся, ӟуч кыл вылын гинэ улыны. Но «умой ӧд ке вала анай кылэз, мукет кылэз но ӟеч уд тод, уд гажа».

Нош удмурт кылмы туж узыр. Поэтъёс, писательёс юнме уг кылдытъяло чебересь кырӟанъёс но произведениос. Мукет странаысь калыкъёс но синмасько асьме кыллы. Дышето сое, чеберезлы синмаськыса. Туж вӧл-вӧл, небыт, пе, со кылӥське. Ма, со понна гинэ-а яратоно удмурт кылдэ? Ас кылыныд тон шумпотэмдэ но, кайгыремдэ но ӟечгес, сюлмысь вералод. Собере, трос кылэз тодӥд ке, соосты ӵошатыны но быгатод ук. Озьы калыкъёслэн улон-вылонзы, сямзы сярысь тодод, дышод мукет кылэз но гажаны. Писатель Пётр Захаров но гожтэ: «Котькудӥз шаер шулдыр ас сяменыз. Мон оскисько, удмурт шаер но Валоеныз но Кам шуръёсыныз, небыт удмурт кылын, сюлмо ужась калыкеныз эшъяськытоз дуннеысь калыкъёсты».

Удмурт кыл — самой матысь эше. Оскисько: со юрттоз мыным но улон шоры паськытгес но мургес учкыны, калыкелэн культураеныз, литератураеныз, искусствоеныз тодматскыны. Малпасько, Удмуртилэн кунпусысьтыз но куншетысьтыз тямыс йыло кизили мукетъёсызлэн но сюлмазы улоз, кенжоз но уз кысы ни. Мед огазеялоз со удмурт калыкез но мед кизёз ваньзылы кылмес яратон мылкыд.

Елизавета Шихова.

Удмурт Дунне
By Удмурт Дунне 29 февраля, 2012 09:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<