Корка пыриз 5 сюрс егит семья

Удмурт Дунне
By Удмурт Дунне Февраль 10, 2012 10:10

Удмурт Республикалэн Президентэз Александр Волков кичӧлтэмъя 2009-тӥ арын улонэ пыӵаны кутскиз егит семьяослы улон интыен юрттонъя программа. 15 процентъем ипотекалэсь 10 процентсэ ас вылаз басьтӥз республикамылэн бюджетэз. Озьы егитъёслы висъяськыны кутскиз капчиятэм кредит. Соя улон югдурзэс умоятыны быгатӥзы ни шаерысьтымы уно сюрс егит семьяос.

«Улон инты — егитъёслы» программа быдэсъяськыны кутскем бере чакламын вал куинь сюрс семьяослы улон инты пуктыны. Нырысь-валысь капчиятэм кредит висъяськиз бюджет чотын тыршись 35 аресозь семьяослы гинэ. Кема ик дыр ӧз ортчы, валамон луиз: программае пыриськыны мылкыд карисьёслэн лыдзы син куспын йылэ. Озьы кылем арын январе Александр Волков решение кутӥз: программаез азинтоно, соя улон инты висъяно ваньзэ-ӧвӧлзэ 5 сюрс 200 пала семьялы.

Пӧям дольщикъёсын кадь югдур медаз кылды шуыса, республикаысьтымы Лэсьтӥськонъя, архитектурая но улон инты политикая министерство арлы быдэ огкыл юнматылӥз лэсьтӥськонъя огазеяськонъёсын. Пӧлазы «АСПЭК», «Титан», лэсьтӥськонъя 8 номеро управление но мукетъёсыз. Ӵапак таос ик басьтӥськизы егит семьяослы улон юртъёс ӝутон борды. Пуктэм квартираоссы рынокъя дунъёслэсь 15 процентлы кулэсгес луизы.

Лэсьтӥськонъя, архитектурая но улон инты политикая министерство ивортэмъя, «Улон инты — егитъёслы» программаез висъяны луоз ни таӵе люкетъёслы: 2009-тӥ ар — егит семьяослы ӵектӥськиз 1 сюрс 500 квартира, 2010-тӥ ар — висъяськиз 1 сюрс 100 улон инты, кылем арын лэсьтӥськонъя огазеяськонъёсын огкыл кутэмын 1 сюрс 200 квартира пуктыны, туэ — эшшо сомында ик.

Пусъёно, егит семьяос сокем мыло-кыдо пыриськыны ӧдъязы та программае, эсьмаса, кылем арын ӝутыны чаклам юртъёсысь вань квартираос арлэн шораз ик вузаса быдтэмын вал ини. Кылдӥз дефицит. Президент Александр Волков, Лэсьтӥськонъя, архитектурая но улон инты политикая министерство сюлмаськемъя туэ пуктыны чаклам юртъёс ӝутскыны ӧдъязы ни кылем арын ик октябрь-ноябрь толэзьёсы. Туэ 10-тӥ январьлы егит семьяослы вузамын 3 сюрс 686 квартира. Арлэн пумозяз, валамон, та лыдпус эшшо уноялоз на.

Капчиятэм кредитлэсь процентъёссэ пытсаны шаермылэн бюджетысьтыз 2009-тӥ-2010-тӥ аръёсы висъяськиз 148 миллион 400 сюрс манет. Со пӧлысь 6 миллион 600 сюрсэз кошкиз куинетӥ нылпи ваем семьяослы 200 сюрс манет тыр юрттэт висъяны. Кылем арын процентъёсты ворсаны висъяськиз 225 миллион 700 сюрс манет, нош туэлы чакламын 300 миллион манет.

«Улон инты — егитъёслы» программаез улонэ пыӵатон лэсьтӥськон удысэз но азинтыны юрттӥз. Та удысэ 4 миллиард 534 сюрс манет тыр инвестициос вуттэмын. Та уксёен ӝутэмын ни, озьы ик матысь аръёсы пуктыны чакламын выль улон юртъёс. Кылсярысь, туэ но вуоно ар куспын шаерамы пуктэмын луоз 105 сюрс квадрат метр улон инты — ваньзэ-ӧвӧлзэ 23 юрт.

Улон инты басьтыны вуттымтэ семьяос тунсыкъясько: кӧня дыр ӵоже быдэсъяськоз на та программа? Кызьы иворто Лэсьтӥськонъя, архитектурая но улон инты политикая министерствоысь специалистъёс, программа радъяське министерство, шаерысьтымы муниципал кылдытэтъёс но лэсьтӥськонъя огазеяськонъёс куспын юнматэм огкылъя. Соя кӧня юрт пуктыны чакламын, сомында ик висъяськозы улон сэрегъёс. Программа азинтӥськоз, огкылъя чаклам вань квартираосты пуктытозь но соосты егит семьяослы вузатозь. Та программа йылпумъяськем бере улон инты капчиятэм амалэн висъяськоз куинь но солэсь тросгес пинал ваем семьяослы гинэ. Ватсано на: «Улон инты — егитъёслы» программа быдэсъяськиз шаермылэн ваньмаз городъёсаз, озьы ик Дэри, Воткинск но Балезино ёросъёсын.

Елена Тугашова.

Удмурт Дунне
By Удмурт Дунне Февраль 10, 2012 10:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<