Кин кинэ? Пурга ворме!

Удмурт Дунне
By Удмурт Дунне 29 февраля, 2012 09:40

Кин кинэ? Пурга ворме!

Дышетӥсь Татьяна Юмина.

Удмурт кыл бадӟым инты басьтэ асьме улонын. Но сое азинтыны кулэ. Со понна радъясько трос кулэ ужрадъёс. Одӥгез соос пӧлысь — удмурт кылын ортчем эчешонъёс (дебатъёс). Радъяськизы соос Ижысь Гуманитарной лицейын.

3-тӥ тулыспалэ дебатъёслэн полуфиналзы радъяськиз. Но, жаляса верано, вуиз 2 команда гинэ: Ижысь 56 номеро гимназия но Пичи Пурга гимназия. Соослэсь «кыл ожмаськонзэс» эскерон понна быръемын вал нимысьтыз жюри. Отчы пыризы гажано адямиос: нырысетӥ удмурт «Узы-боры» кинолэн продюсерез Пётр Палган, «Уйпал кизили» Ксения Воронцова, гимназиысь дышетӥсь но «Выжы» огазеяськонлэн кивалтӥсез Ангелина Решетникова (со ик валтӥсь судья но вал), УдГУ-ысь удмурт филология факультетысь Настя Петрова но мон. Ачим сярысь ке, мон нырысьсэ улонам сюри таӵе ужрадэ. Бӧрысь валай: жюри луыны секыт ӧвӧл, дунъет сётыны тунсыко.

Дебатъёс кутскизы пус чӧлтон бордысен. Темаез таӵе: ЕГЭ кулэ яке ӧвӧл? ЕГЭ-лы пумит вераськизы 56 номеро гимназиысь куинь чебер, йӧно нылъёс. Ог-огзылэсь малпанъёссэс юнматӥзы соос. Кылсярысь, пусйизы созэ но: визьдэ золъян понна репетиторъёсын ужано, нош таос уно коньдон кыско. Со сяна, ЕГЭ, пе, пачкатэ: литератураын С частяз верамын, эссе 200 кыллэсь кузьгес медаз луы шуыса. Нош тросэз пиналъёс таӵе «лимитэн» асьсэлэсь малпанъёссэс быдэсак уг шараяло. Та пумысен слайдъёс но возьматӥзы.

Ижъёслы пумит султӥзы пичи пургаос: ЕГЭ, пе, кулэ. Сыӵе амалэн сётоно экзаменлы дышетскись ачиз быгатэ Интернет вотэс пыр дасяськыны, книгаос лыдӟыны. ЕГЭ юрттэ куанерзэ но, узырзэ но адямиез оградэ пуктыны — приёмной комиссия экзаменын люкам баллъёсты гинэ эскере уго.

Cобере командаос ог-огзылы юанъёс сётъязы. Ваньзэ чакласа, баллъёсты лыдъяса, шараяськиз вормись — Пичи Пурга гимназия. Котьма ке но ижъёслы ӝожомыны мугез ӧй вал — трослы бере ӧз кыле.

* * *

10-тӥ тулыспалэ ортчиз дебатъёслэн финалзы. Вылӥын верам командаос сяна, лицее вуизы на Кизнер ёросысь Вуж Кармыж школаысь но Ижысь Кузебай Герд нимо гимназиысь дышетскисьёс. Таосты ваньзэсты пумитаса, кыл вераз

Удмуртиысь егитъёсын ужа­нъя министр Владимир Соловьёв:

— Валасько: эчешыса гинэ вань ужпумъёсыз сэрттыны-пертчыны уз луы, но малпаськыны со туж умой инъет. Нош малпаськоно ни выль сямен. Туала арын тодэм-валамдэ гинэ усьтыса, тырмыт ӧвӧл ни — котыр ласянь творческой луоно. Котькуд адямилэн 80 процентэз азинскемез-ӝутӥськемез кылдэ егит дырысен. Котыр ласянь усто луэмез потэ дышетскемез, тыршемез, теориез практикае берыктыны быгатэмез бордысь. 20 процентэз азинскемез потэ ни государство бордысь, макем со юрттоз. Вунэтоно ӧвӧл созэ но: котьку вормисе потыны уг луы, но ужрадъёсы одно пыриськоно. Нюръяськон сётэ кужым.

Таӵе кылъёс бере дебатэ вуэмъёслэн мылкыдзы эшшо но ӝутӥськиз. Уката устогес возьматӥзы асьсэдыз. Кык аудиторие люкаськизы. Одӥгаз — Вуж Кармыж школа но 56 номеро гимназия, мукетаз — К. Герд нимо гимназия но Пичи Пурга гимназия. Нюръяськизы таӵе темаосъя: «Улонын аслыд гинэ оскиськоно» но «Аслыд гинэ оскиськыны уг яра улонын».

Ужрад пумын тодмо луиз: нырысетӥ луиз 56 номеро гимназия. Кыкетӥ луиз Вуж Кармыж школа, куинетӥ — Пичи Пурга гимназия, ньылетӥ — К. Герд нимо гимназия. Дипломъёс басьтӥзы 2 усто спикеръёс: Марина Федосеева (56 номеро гимназия) но Даниил Герасимов (Пичи Пурга гимназия).

Ваньзы пусъемын дипломъёсын но дуно кузьымъёсын.

Оскон юнмаз: таӵе ужрадъёс улонамы радъяськизы ке, удмурт кыл интыяз уз сылы, сое яратозы эшшо юнгес, со воштӥськоз, чебергес луоз но золгес данъяськоз.

Анна Загумённова.

Удмурт Дунне
By Удмурт Дунне 29 февраля, 2012 09:40